စစ်ခေါင်းဆောင်ကို ICC ဖမ်းဝရမ်းထုတ်ဖို့ လျှောက်ထားချက် ဗြိတိန်အမတ်တချို့ အဆိုတင်
~~~
■ စစ်ကောင်စီခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို ဖမ်းဝရမ်းထုတ်ဖို့ နိုင်ငံတကာ ရာဇဝတ်တရားရုံး (ICC) ရှေ့နေရဲ့တောင်းဆိုချက်ကို ကြိုဆိုကြောင်း ဗြိတိန်လွှတ်တော်အမတ်တွေက လွှတ်တော်ကို လက်မှတ်ရေးထိုး အဆိုတင်သွင်းလိုက်ပါတယ်။
ဗြိတိန်တစ်သီးပုဂ္ဂလအမတ် လေးဦး၊ မြောက်စကော့တစ် နေရှင်နယ်လစ်ပါတီက အမတ်တစ်ဦးနဲ့ ဒီမိုကရက်တစ်ယူနီယံနစ်ပါတီ အမတ်တစ်ဦး စုစုပေါင်း ခြောက်ဦးက ဒီအဆိုကို ဒီဇင်ဘာလ ၁၀ ရက်နေ့က တင်သွင်းခဲ့တာလို့ ဗြိတိန်နိုင်ငံဆိုင်ရာ အမျိုးသားညီညွတ်ရေးအစိုးရ (NUG) ကိုယ်စားလှယ် ဒေါက်တာသက်ကိုကိုက RFA ကို ပြောပါတယ်။
“ကျွန်တော်တို့ NUG အနေနဲ့ ဒါကို ကြိုဆိုပါတယ်၊ အခုလို တင်သွင်းလိုက်တာဟာ ပြစ်မှုကျူးလွန်သူတွေအတွက် တာဝန်ယူမှု၊ တာဝန်ခံမှု ဖြစ်ကိုဖြစ်ရမယ်၊ ပြည်သူလူထုကို မတရားလုပ်ခဲ့တဲ့သူတွေဟာ အချိန်တန်ရင် တရားဥပဒေနဲ့ ရင်ကို ရင်ဆိုင်ရမယ်ဆိုတာ ရှိပါတယ်၊ ဘယ်သူပဲ လုပ်ခဲ့လုပ်ခဲ့ပေါ့”
၂ဝ၁၇ ခုနှစ်က ရခိုင်ပြည်နယ်က ရာထောင်ချီတဲ့ ရိုဟင်ဂျာတွေ ဘင်္ဂလားဒေ့ရှ်နိုင်ငံထဲ ထွက်ပြေးခိုလှုံခဲ့ရတဲ့ အကြမ်းဖက်မှုတွေ အပါအဝင် နိုင်ငံတကာဥပဒေတွေ၊ စစ်ရာဇဝတ်မှုတွေ၊ လူမျိုးတုံးသတ်ဖြတ်မှုတွေနဲ့ ဗိုလ်ချုပ်မှူးကြီးမင်းအောင်လှိုင် ဆက်စပ်နေကြောင်း ယုံကြည်ရတဲ့ သက်သေတွေအပေါ် အခြေခံပြီး တောင်းဆိုတာကို လွှတ်တော်က အသိအမှတ်ပြုကြောင်း အဲဒီအဆိုမှာ ထည့်သွင်းထားပါတယ်။
ဗြိတိန်အမတ်တွေပူးပေါင်းပြီး အဆိုတင်သွင်းလိုက်တဲ့အပေါ် အားရမိတယ်လို့ ဗြိတိန်အခြေစိုက် မြန်မာရိုဟင်ဂျာအသင်း (BROUK) ရဲ့ ဥက္ကဋ္ဌ ဦးထွန်းခင်က ပြောပါတယ်။
“ဒါက အင်မတန်မှ ကျွန်တော်တို့အတွက် အားရတယ်၊ ဘာလို့လဲဆိုတော့ ယူကေအစိုးရအပေါ်မှာလည်း ဖိအားရှိလာမယ်၊ ယူကေအစိုးရကလည်း စစ်ခေါင်းဆောင် မင်းအောင်လှိုင်အတွက် ဖမ်းဝရမ်း တကယ်ထွက်လာတဲ့အချိန်မှာ ဖမ်းပေးဖို့ ဘယ်လိုနည်းနဲ့မဆို ကြိုးစားပေးလိမ့်မယ်လို့ ကျွန်တော် ယုံကြည်ပါတယ်ခင်ဗျ”
ဒါ့အပြင် ဖမ်းဝရမ်းထုတ်မယ်ဆိုရင် ဗြိတိန်အပါအဝင် ICC မှာ လက်မှတ်ထိုးထားတဲ့ နိုင်ငံတွေရဲ့ နယ်မြေကို ရောက်တာနဲ့ ဖမ်းဆီးဖို့ တာဝန်ရှိတဲ့အကြောင်းလည်း အဆိုမှာ ပါဝင်ပါတယ်။
ရိုဟင်ဂျာတွေအပေါ်ကျူးလွန်တဲ့ ရာဇဝတ်မှုတွေအတွေက် မြန်မာစစ်ခေါင်းဆောင်ကို ဖမ်းဝရမ်းထုတ်ဖို့ ICC ရှေ့နေချုပ် ကာရင်ခန်း (Karim Khan) က ICC ကို နိုဝင်ဘာလ ၂၇ ရက်နေ့က တင်ပြလျှောက်ထားခဲ့တာပါ။
ဗိုလ်ချုပ်မှူးကြီးမင်းအောင်လှိုင်ကို ဖမ်းဝရမ်းထုတ်ဖို့ နိုင်ငံတကာ ရာဇဝတ်တရားရုံး (ICC) ရှေ့နေရဲ့တောင်းဆိုချက်ကို မြန်မာနိုင်ငံဆိုင်ရာ အထူးအကြံပေးကောင်စီ (SAC-M)၊ အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့ (AI)၊ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရား (IIMM)၊ Burma Campaign UK အဖွဲ့၊ မြန်မာရိုဟင်ဂျာအသင်း (BROUK) စတဲ့ အဖွဲ့အစည်းတွေက ကြိုဆိုကြောင်း အသီးသီးထုတ်ပြန်ထားကြပါတယ်။
___
၂၀၂၁ ခုနှစ် မတ်လ ၂၇ ရက် နေပြည်တော်၌ ကျင်းပသည့် တပ်မတော်နေ့ စစ်ရေးပြအခမ်းအနားတွင် တွေ့ရသည့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်။ (Photo : Reuters)
#ICC #ဗြိတိန်အမတ် #လွတ်လပ်တဲ့အာရှအသံ #rfaburmese
