မြင်းခြံ – နဘူးအိုင်လမ်းပိုင်းမှာ စစ်ကြောင်းဆုတ်လာတဲ့စစ်သားတွေ မိုင်းဆွဲခံရပြီး စစ်ကြောင်းမှူးအပါ ၁၃ယောက်သေ
ဒီဇင်ဘာ ၁၊ ၂၀၂၄
မန္တလေးတိုင်း၊ မြင်းခြံ-နဘူးအိုင်လမ်းပိုင်းမှာ စစ်ကြောင်းပြန်ဆုတ်လာတဲ့ အကြမ်းဖက်စစ်သားတွေ မိုင်းဆွဲတိုက်ခိုက်ခံရပြီး စစ်ကြောင်းမှူးအပါအဝင် စစ်သား ၁၃ယောက် သေဆုံးကြောင်း ရွှေခြံသားပြောက်ကျားတပ်ဖွဲ့ ထံက သိရပါတယ်။
နိုဝင်ဘာ ၃၀ရက်၊ မနေ့က မနက်အစောပိုင်းမှာ မြင်းခြံမြို့မြောက်ဘက်၊ သစ်ရုံကျေးရွာနဲ့ ထန်းတောကြီးရွာတွေကို စစ်ကြောင်းဝင်မီးရှို့ရင်း အသက် ၆၀အရွယ် အမျိုးသမီး၁ယောက်ကို ပစ်သတ်ခဲ့တဲ့ အင်အား ၁၀၀ပါ အကြမ်းဖက်စစ်ကြောင်းကို ပြောက်ကျားတပ်ဖွဲ့ဝင်တွေက မြင်းခြံ-နဘူးအိုင်လမ်းပိုင်းပေါ် ပဒေသာမိုင်းတွေနဲ့ဖောက်ခွဲတိုက်ခဲ့တာ ဖြစ်ပါတယ်။
“သစ်ရုံနဲ့ ထန်းတောကြီးရွာတွေကို တိုက်ပွဲမရှိဘဲ သက်သက်မီးဝင်ရှို့ခဲ့တာပါ။ အဲ့ဒါ ကျနော်တို့က လမ်းကစောင့်နေပြီး ကုက္ကဲရဲစခန်းနားအရောက် မနက် ၁၀နာရီလောက်မှာ ပဒေသာမိုင်းအတွဲလိုက် ဆွဲခဲ့တာ။ ခြေလျင်စစ်ကြောင်းဆိုတော့ အများကြီးထိတယ်။ လေပေါ်မြောက်သွားတဲ့သူတွေရော လဲကျသွားတွေရော အများကြီးပါပဲ။ ” လို့ ရွှေခြံသားပြောက်ကျားတပ်ဖွဲ့ တာဝန်ရှိသူက မောင်းကိုပြောပါတယ်။
သစ်ရုံနဲ့ ထန်းတောကြီးရွာတွေကို မြင်းခြံ အခြေစိုက် အမှတ်-၁၅ ခြေမြန်တပ်ရင်း (ခမရ ၁၅) စစ်အုပ်စုတွေနဲ့ လယ်သစ်ရွာ ပျူစောထီးတွေက ဝင်ရောက်မီးရှို့ဖျက်ဆီးခဲ့တာဖြစ်ပြီး ပျက်စီးတဲ့ အိမ်ခြေအတိအကျ အတည်မပြုနိုင်ခြင်းတော့ မရှိသေးပါဘူး။
မိုင်းဆွဲခံရပြီးနောက်ပိုင်း စစ်အုပ်စုတွေက လက်နက်ကြီးလက်နက်ငယ်တွေနဲ့ ပတ်ဝန်းကျင်ကိုရမ်းသမ်းပစ်ခတ်ခဲ့သလို ကုက္ကဲရဲစခန်းနားက ဒရောကြီးကျေးရွာကိုပါ ဝင်ရောက်မီးရှို့ခဲ့ကြောင်း သိရပါတယ်။
ဒါ့အပြင် မြင်းခြံမြို့နယ်အတွင်းက မြောက်ကျွန်းရွာဘက်မှာလည်း ပြည်သူ့ကာကွယ်ရေးတပ်တွေနဲ့ စစ်အုပ်စုကြား ထိတွေ့တိုက်ပွဲတွေရှိကြောင်း သိရပါတယ်။
ပုံစာ – ရွှေခြံသားပြောက်ကျားတပ်ဖွဲ့ရဲ့မိိုင်းဆွဲမစ်ရှင်တစ်ခု (ပုံဟောင်း)
