ရန်ကုန်ရှိ မင်္ဂလာဒုံလေတပ်ကို ယမန်နေ့ညပိုင်း ရှော့တိုက်ဒုံးများဖြင့် ပစ်ခတ်တိုက်ခိုက်၊ နေပြည်တာ်တွင်လည်း အသေခံဒရုန်းဖြင့် စစ်ကောင်စီ၏အေလာလေတပ်နေရာများကို တိုက်ခိုက်
ရန်ကုန်၊ နိုဝင်ဘာ ၆
ရန်ကုန်မင်္ဂလာဒုံလေတပ်ကို ရှော့တိုက်ဒုံးများဖြင့် ယမန်နေ့ညပိုင်းတွင် ပစ်ခတ်မှုဖြစ်ပွားခဲ့ပြီး ပြင်းထန်သော ပေါက်ကွဲမှု တချို့ဖြစ်ပွားခဲ့ကြောင်း ရန်ကုန်မြို့မှ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။
ယမန်နေ့ နိုဝင်ဘာလ ၅ ရက်နေ့ ည ၁၁ နာရီ ၃၅ မိနစ်အချိန် ရန်ကုန်၊ မင်္ဂလာဒုံလေတပ်သို့ ရှော့တိုက်ဒုံး ပစ်ခတ်သံနှင့်အတူ ပြင်းထန်သော ပေါက်ကွဲမှု ဖြစ်ပွားခဲ့ကြောင်း၊ ပေါက်ကွဲမှုမှာ နှစ်ကြိမ် ဖြစ်ပွားခဲ့ပြီး ပထမ ပေါက်ကွဲမှုမှာ အနီးပတ်ဝန်းကျင်ရှိ နေအိမ်များ တုန်ခါသည်အထိ ပြင်းထန်ခဲ့ကြောင်း သိရှိရသည်။
“မနေ့ည ၁၁ နာရီ ၃၅ မိနစ်မှာ လေတပ်နားက အိမ်တွေပါတုန်တယ်။ ကျနော်တို့ ရပ်ကွက်က မင်္ဂလာဒုံလေတပ် လေယာဉ် Control တာဝါတိုင်နဲ့နီးတယ်။ အဲဒီအနားမှာ ပေါက်ကွဲမှုဖြစ်တာ။ အတော်ကို ပြင်းထန်တဲ့ ပေါက်ကွဲမှုပါ” ဟု မင်္ဂလာဒုံလေတပ်အနီး နေထိုင်သူ ပြည်သူတစ်ဦးက ဆိုသည်။
ယင်းနောက် ယမန်နေ့ ည ၁၁ နာရီ ၄၀ မိနစ်အချိန်တွင်လည်း ထပ်မံ၍ ပေါက်ကွဲသံထပ်မံပေါ်ပေါက်ခဲ့သော်လည်း ပထမအကြိမ်လောက် ပြင်းထန်မှု မရှိခဲ့ကြောင်း သိရှိရသည်။
မင်္ဂလာဒုံလေတပ်မှ စစ်ဘက်သတင်းရင်းမြစ်တချို့ကလည်း မင်္ဂလာဒုံလေတပ်သို့ ဦးတည်သော ရှော့တိုက်ဒုံး ပစ်ခတ်တိုက်ခိုက်မှုများဖြစ်ပွားခဲ့ကြောင်း ရန်ကုန်ခေတ်သစ်သတင်းဌာနထံသို့ အတည်ပြု ပြောဆိုကြသည်။
ထို့ပြင် နေပြည်တော်ကောင်စီနယ်မြေ၊ လယ်ဝေးမြို့နယ်ရှိ အေလာလေတပ်သို့လည်း ယမန်နေ့ နံနက်ပိုင်းတွင် အသေခံဒရုန်းများဖြင့် ပစ်ခတ်တိုက်ခိုက်မှုများဖြစ်ပေါ်ခဲ့ကြောင်း စစ်ကောင်စီက သတင်းထုတ်ပြန်သည်။
နေပြည်တော်ကောင်စီနယ်မြေရှိ အရေးကြီးအဆောက်အဦများနှင့် နေရာဌာနများအား ဖောက်ခွဲဖျက်ဆီးရန်နှင့် လယ်ဝေးမြိုနယ်အတွင်းသို ဒေသန္တရလုပ် Fixed Wing အချို စမ်းသပ်ပစ်လွှတ်ခြင်းဖြင့် ဖောက်ခွဲရေးလုပ်ရပ်များ လုပ်ဆောင်နိုင်ရန် ကြုံတွေ့ခဲ့ရကြောင်း သိရှိရသည်။
နေပြည်တော်ကောင်စီနယ်မြေအတွင်းသို့ ဝင်လာသော Fixed Wing ဒရုန်းများကို စစ်ကောင်စီက ပစ်ခတ်ဟန့်တားခဲ့ကြောင်း ၊ ဒရုန်း Fixed Wing ၃ စီးသည် လမ်းခရီးတွင် ပျက်ကျပျက်စီးခဲ့ကြောင်း၊ လယ်ဝေးမြိုနယ်၊ ကြောင်ရေကျေးရွာအနီး ၁ စီး၊ ကြံခင်းစုကျေးရွာအနီး ၁ စီးနှင့် နနွင်းအိုင်ကျေးရွာအနီး ၁ စီးတို့တွင် ဒရုန်းများကို ဗုံးသီးများနှင့်အတူ ရှာဖွေတွေ့ရှိခဲ့ကြောင်း ၊ လူနှင့် အဆောက်အဦများ ထိခိုက်ပျက်စီးမှုမရှိခဲ့ကြောင်း စစ်ကောင်စီက သတင်းထုတ်ပြန်သည်။
ဓာတ်ပုံ- ယမန်နေ့ နံနက် ၈ နာရီကျော်အချိန် နေပြည်တော်လယ်ဝေးမြို့နယ်၊ အေလာ လေတပ်အတွင်း ပျံသန်း ဝင်ရောက်လာသော အသေခံဒရုန်းများ။