မုံရွာမြို့ရှိ အနောက်မြောက်တိုင်း စစ်ဌာနချုပ်ကို ရော့ကတ်ဒုံးများဖြင့် ပစ်ခတ် တိုက်ခိုက်မှု စစ်တပ်ဘက်မှ သေဆုံးမှုများပြားပြီး ဆီဂိုဒေါင်၊ စခန်းရုံးနှင့် ရိက္ခာဂိုဒေါင် တို့လည်း မီးလောင်ပေါက်ကွဲဟုဆို

မုံရွာမြို့ရှိ အနောက်မြောက်တိုင်း စစ်ဌာနချုပ်ကို ရော့ကတ်ဒုံးများဖြင့် ပစ်ခတ် တိုက်ခိုက်မှု စစ်တပ်ဘက်မှ သေဆုံးမှုများပြားပြီး ဆီဂိုဒေါင်၊ စခန်းရုံးနှင့် ရိက္ခာဂိုဒေါင် တို့လည်း မီးလောင်ပေါက်ကွဲဟုဆို
ရန်ကုန်၊ ဇွန် ၂၉

စစ်ကိုင်းတိုင်း၊ မုံရွာမြို့ရှိ အနောက်မြောက်တိုင်း စစ်ဌာနချုပ်ကို ရှော့တိုက် ရော့ကတ်ဒုံးများဖြင့် ပစ်ခတ် တိုက် ခိုက်ခဲ့ရာ စစ်တပ်ဘက်မှ အရာရှိ ၃ ဦး အပါအဝင် ၂၂ ဦးသေဆုံးပြီး ဆီဂိုဒေါင်၊ စခန်းရုံးနှင့် ရိက္ခာဂိုဒေါင် တို့လည်း မီးလောင်ပေါက်ကွဲခဲ့ကြောင်း Chindwin Rocket Brother -CRB တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဇွန်လ ၂၇ ရက်နေ့ ညနေ ၅ နာရီ ၃၀ မိနစ်ခန့်အချိန် မုံရွာမြို့နယ် အခြေစိုက် အနောက်မြောက်တိုင်း စစ်ဌာနချုပ် (နမခ) ကို တော်လှန်ရေး တပ်ဖွဲ့များက ရှော့တိုက် ရော့ကတ်ဒုံး ၁၀ လုံးဖြင့် ပစ်ခတ် တိုက်ခိုက်ခဲ့ကြောင်း သိရသည်။
ထို တိုက်ခိုက်မှုအတွင်း စစ်ဌာနချုပ်တိုင်းရုံးမှ အရာရှိ ၂ ဦး၊ အရာရှိ ဇနီး ၄ ဦး နှင့် စစ်သည် ၁၂ ဦး ပွဲချင်းပြီး သေဆုံးခဲ့ပြီး အပြင်းအထန်ဒဏ်ရာရသော အရာရှိ ၄ ဦး ၊ စစ်သည် ၁၅ ဦး၊ ဗိုလ်မှူးများ၏ ကလေး ၂ ဦးကို ယင်းနေ့ ညနေ ၆ နာရီခန့်တွင် ကုတင် ၃၀၀ တဆ(ခွဲ) ၄ တပ်ဆေးရုံသို့ ပို့ဆောင်ခဲ့ကြောင်း အဆိုပါ အဖွဲ့၏ ပြောဆိုချက်အရ သိရှိရသည်။
ဇွန်လ ၂၈ ရက်နေ့တွင် အဆိုပါ ပြင်းထန်ဒဏ်ရာရရှိသူများထဲမှ အရာရှိ ၁ ဦး၊ ဗိုလ်မှူးကလေး ၁ ဦး နှင့် စစ်သည် ၂ ဦး ထပ်မံသေဆုံးခဲ့ကြောင်း၊ သေဆုံးသူများကို ယနေ့ ဇွန်လ ၂၉ ရက်နေ့တွင် နမခ စစ်သချိုင်းနှင့် အလုံမြို့ သရဏဂုံ သချိုင်းတွင် နာရေးများပြုလုပ်ခဲ့ကြောင်း သိရသည်။
ထို့ပြင် တိုက်ခိုက်မှုအတွင်း နမခ စစ်တိုင်းရုံး အတွင်းရှိ ဆီဂိုဒေါင် ပေါက်ကွဲကာ တန့် ၂ လုံး ပျက်စီးခဲ့ပြီး စခန်းရုံးနှင့် ရိက္ခာဂိုဒေါင်တွဲမီးလောင်ကာ (RB=12/14) လိုင်းခန်းလည်း ထိမှန်ပျက်စီးခဲ့ကြောင်း၊ အရာရှိရိပ်သာတွင် ရပ်ထားသော အိမ်စီးကား ၂ စီး မီးလောင်ပျက်စီးခဲ့ကြောင်း သိရှိရသည်။
“စစ်ခွေးသေစာရင်း ထပ်တိုးတာကတော့ အခုလောလောဆယ် တော့ အဲ့လောက်ပါပဲ။ ပြောချင်တာကတော့ ကျနော်တို့ကိုလည်းဝိုင်းဝန်းကူညီပေးဖို့ပြောချင်ပါတယ်”ဟု Chindwin Rocket Brother -CRB မှ တာဝန်ရှိသူကပြောဆိုသည်။
တော်လှန်ရေးတပ်၏ ရော့ကတ်များဖြင့် ပစ်ခတ်တိုက်ခိုက်မှုကြောင့် မုံရွာမြို့ရှိ အနောက်မြောက်တိုင်း စစ်ဌာန ချုပ်အတွင်း သေဆုံးမှုများနှင့်ပတ်သက်၍ မြေပြင်အခြေအနေကို ရန်ကုန်ခေတ်သစ်အနေဖြင့် သီးခြား အတည်ပြုနိုင်ခြင်းမရှိပေ။
အဆိုပါ တိုက်ခိုက်မှုကို ချင်းတွင်းရော့ကတ်ညီနောင် (Chindwin Rocket Brothers -C.R.B)ဦးဆောင်၍ မဟာမိတ်အဖွဲ့များဖြစ်သော ချိုမိုင်မိုင်(ကနီ)၊Anonymous Heroes၊Chindwin Brothers တို့နှင့် ပူးပေါင်းဆောင်ရွက်ခဲ့ပြီး လေကြောင်းရန် နှင့် စစ်ရေးသတင်းပေးပို့သော အထက်ဗမာပြည်(Air Defense Force and Civil)အဖွဲ့ ကို အထူးပင်ကျေးဇူးတင်ရှိပါကြောင်း Chindwin Rocket Brother -CRB က ပြောဆိုသည်။