ပဲခူးအနောက်ခြမ်းမှ ပညာရေးဝန်ထမ်းများ မဲရုံမှူး သင်တန်းအတွက် နေပြည်တော် သွားရမည်ဟုဆို
ဇွန် ၂၉၊ ၂၀၂၅
ပဲခူးတိုင်းအနောက်ခြမ်း မြို့နယ်တွေက ပညာရေးဝန်ထမ်းတွေကို စစ်ကောင်စီက တရားမဝင် ရွေးကောက်ပွဲအတွက် မဲရုံမှူးသင်တန်းပေးဖို့ နေပြည်တော်ကို စတင်ပို့ဆောင်နေပြီ ဖြစ်တယ်လို့ ဒေသခံ ပညာရေးဝန်ထမ်းတွေထံက သိရပါတယ်။
အဆိုပါ မဲရုံမှူးသင်တန်းကို လာမယ့် ၄/၅ ရက်အတွင်း နေပြည်တော်မှာ သွားရောက်သင်ကြားရမှာ ဖြစ်ပြီး စစ်ကောင်စီရဲ့ လုံခြုံရေးယာဉ်တန်းနဲ့ သွားရောက်ရမှာ ဖြစ်တယ်လို့ သိရပါတယ်။
“သာယာဝတီ၊ မင်းလှ၊ အုတ်ဖို့က group တစ်ခုဖြစ်မှာပေါ့။ ကြို့ပင်ကောက်၊ မိုးညို၊ ဇီးကုန်းတို့ဆို group တစ်ခုပေါ့။ အဲ့လို အသုတ်လိုက်သွားရမှာ” လို့ ပဲခူးတိုင်းအနောက်ခြမ်းရှိ အမည်မဖော်လိုတဲ့ ပညာရေးဝန်ထမ်းတစ်ယောက်က မောင်းကို ပြောပါတယ်။
သင်တန်းတက်ရာမှာ ပညာရေးဝန်ထမ်းအားလုံးကို နေပြည်တော် ခေါ်ယူသင်တန်းတက်စေတာမျိုး မဟုတ်ဘဲ မဲရုံတစ်ရုံကို ကိုယ်စားလှယ်တစ်ယောက်က သင်တန်းသွားတက်ရမှာဖြစ်ပြီး သင်တန်းဆင်းပြီးရင်တော့ ကျန်တဲ့သူတွေကို ပြန်လည်သင်ကြားပေးရတဲ့ ပုံစံမျိုးဖြစ်ကာ မဲရုံရှိသလောက် ကိုယ်စားလှယ်တွေ သင်တန်းသွားတက်ရမှာ ဖြစ်တယ်လို့ သူက ဆိုပါတယ်။
“အခု မဲကိစ္စနဲ့ ပတ်သက်ရင် အကုန်လုံးက လုံခြုံရေးတွေနဲ့ပဲ လုပ်နေတာ။ ဘာလို့လဲဆိုတော့ အရှေ့မှာတုန်းကလည်း သန်းခေါင်စာရင်း ကောက်တာ ပညာရေးဝန်ထမ်းတွေပဲ လုပ်ရတာ အဲ့တုန်းကဆို ကြောက်ကြောက်နဲ့ လုပ်ကြရတာကိုး။ တချို့ရွာတွေဆို သွားတောင် မကောက်ဘူး။ ရမ်းချလိုက်တာပဲ။ ပုံမှန်ကတော့ တစ်အိမ်တက် တစ်အိမ်ဆင်း ကောက်ရမှာပေါ့လေ” လို့ အထက်ပါ ပညာရေးဝန်ထမ်းက ဆိုပါတယ်။
အဆိုပါသင်တန်းမှာ မူလတန်းပြ၊ အလယ်တန်းပြနဲ့ အထက်တန်းပြ ပညာရေးဝန်ထမ်းတွေ ပါဝင်ပြီး သင်တန်းတက်ရမယ့် ပညာရေးဝန်ထမ်း စစ်တပ်မိသားစုဝင်တွေတောင် လုံခြုံရေးယာဉ်တန်းနဲ့ သင်တန်းသွားတက်ရမှာကို ကြောက်လန့်နေကြတယ်လို့ ဆိုခဲ့ပါတယ်။
ပုံစာ – ၂၀၂၀ ခုနှစ်က ပညာရေးဝန်ထမ်းများကို မဲရုံမှူးသင်တန်းပေးနေစဉ် (ပုံဟောင်း)
