စစ်အာဏာသိမ်းပြီး လူငယ်များကို အတင်းအကျပ် စစ်မှုထမ်းခိုင်းနေသည့် မြန်မာစစ်ကောင်စီကို ICC တရားရုံးသို့ လွှဲပြောင်းရန် Fortify Rights က ILO ညီလာခံသို့ တောင်းဆို

စစ်အာဏာသိမ်းပြီး လူငယ်များကို အတင်းအကျပ် စစ်မှုထမ်းခိုင်းနေသည့် မြန်မာစစ်ကောင်စီကို ICC တရားရုံးသို့ လွှဲပြောင်းရန် Fortify Rights က ILO ညီလာခံသို့ တောင်းဆို
ရန်ကုန်၊ ဇွန် ၂
မြန်မာစစ်ကောင်စီ၏ အလုပ်သမားများအပေါ် အတင်းအကျပ်စေခိုင်းခြင်း နှင့် အတင်းအကျပ်စစ်မှုထမ်းစေခြင်း အပါအဝင် အလုပ်သမားအခွင့်အရေးနှင့် လူ့အခွင့်အရေးချိုးဖောက်မှုများအတွက် မြန်မာစစ်ကောင်စီ ကို ICC
ကမ္ဘာ့ ရာဇဝတ်တရားရုံးသို့ လွှဲပြောင်း ပေးရန် Fortify Rights က အပြည်ပြည်ဆိုင်ရာ အလုပ်သမားအဖွဲ့ချုပ် (ILO)ထံသို့ တောင်းဆိုလိုက်သည်။
အကြမ်းဖက် စစ်ကောင်စီကို အလုံးစုံ စီးပွားရေးပိတ်ဆို့မှုဖြင့် အရေးယူရေး အဆုံးအဖြတ်ပေးရန်ရှိနေသည့် ၁၁၃ ကြိမ်မြောက် ကမ္ဘာ့အလုပ်သမားအဖွဲ့ချုပ်၏ ညီလာခံမှာ ယနေ့ဇွန်လ ၂ ရက်နေ့ ဆွစ်ဇာလန်နိုင်ငံ၊ ဂျနီဗာတွင် စတင်ကျင်းပနေသည်။
Fortify Rights က ILO ညွှန်ကြားရေးမှူးချုပ် Gilbert Houngbo ထံသို့ ယနေ့ စာပေးပို့လိုက်ပြီး မြန်မာနိုင်ငံအခြေ အနေကို နိုင်ငံတကာ ရာဇဝတ်ခုံရုံးICC သို့ လွှဲပြောင်းခြင်း၊ ပစ်မှတ်ထား ပိတ်ဆို့အရေးယူမှုများ၊ ပြည်ပရောက် အလုပ် သမားသမဂ္ဂများနှင့် အခြားလူ့အခွင့်အရေး ကာကွယ်စောင့်ရှောက်သူများကို ပံ့ပိုးကူညီခြင်းများ အပါ အဝင် လိုအပ်သော အရေးယူမှုများ ဆောင်ရွက်ပေးရန် အကြံပြုထားသည်။
“မြန်မာစစ်ကောင်စီက အခြေခံအလုပ်သမားအခွင့်အရေးတွေကို စနစ်တကျ ငြင်းပယ်နေပါတယ်။ILO အဖွဲ့ဝင်နိုင်ငံတွေအနေနဲ့ စစ်ကောင်စီရဲ့ ချိုးဖောက်မှုတွေကို အရေးယူရပါ့မယ်။ မြန်မာစစ်ကောင်စီကို အပြည်ပြည်ဆိုင်ရာ ရာဇဝတ်ခုံရုံးICC ကို လွှဲပြောင်းပေးပြီး ပြည်ပရောက် မြန်မာအလုပ်သမားသမဂ္ဂတွေနဲ့ အလုပ် သမားအဖွဲ့အစည်းတွေကို ပံ့ပိုးကူညီရပါ့မယ်” ဟု Fortify Rights မှ အကြီးတန်းရှေ့နေ Patrick Phongsathorn က ပြောသည်။
၂၀၂၃ ခုနှစ် သြဂုတ်လ ၄ ရက်နေ့ထုတ် ILO စုံစမ်းရေးကော်မရှင်၏ အစီရင်ခံစာတွင် မြန်မာစစ်ကောင်စီက အခြေခံအရပ်သားများ၏ အခွင့်အရေးများကို ချိုးဖောက်နေပြီး ILO ၏ အလုပ်သမားအခွင့်အရေးနှင့် အဓမ္မခိုင်းစေမှု တားဆီးရေး ဆိုင်ရာ သဘောတူညီချက်များကို ချိုးဖောက်ခဲ့ကြောင်း ထုတ်ဖော်ထားသည်။
ILO စုံစမ်းရေးကော်မရှင်၏ အစီရင်ခံစာတွင် စစ်ကောင်စီက အလုပ်သမဂ္ဂအဖွဲ့ဝင်များကို သတ်ဖြတ်ခြင်း၊ နိုင်ထက်စီးနင်းဖမ်းဆီးခြင်း၊ အတုအယောင်ရုံးတင်စစ်ဆေးခြင်း၊ ပြစ်ဒဏ်ချမှတ်ခြင်း၊ ဖမ်းဆီးခြင်း၊ ညှင်းပန်းနှိပ်စက်ခြင်း၊ ခြိမ်းခြောက်ခြင်း၊ ခြိမ်းခြောက်ခြင်း၊ စောင့်ကြည့်ခြင်း၊ ပြည်နှင်ခြင်း၊ ၎င်းတို့၏ အခြေခံအရပ်သားလွတ်လပ်ခွင့်များ ဆုံးရှုံးခြင်း၊ ၎င်းတို့၏ အလုပ်သမားသမဂ္ဂအဖွဲ့ဝင်များနှင့် လုပ်ငန်းဆောင်ရွက်မှုများကြောင့် လုပ်ငန်းခွင်တွင် ဖိနှိပ်ခံရခြင်းများ ကျူးလွန်ခဲ့ကြောင်း၊ အမျိုးသမီးအလုပ်သမားသမဂ္ဂခေါင်းဆောင်များကို လိင်ပိုင်းဆိုင်ရာ အကြမ်းဖက်ခဲ့ကြောင်း ဖော်ပြထားသည်။
စစ်တပ်က ပေါ်တာဆွဲခြင်းနှင့် လူသားဒိုင်းများအပါအဝင် စစ်ဘက်ဆိုင်ရာ စစ်ဆင်ရေးများအတွင်း “စနစ်တကျနှင့် ကျယ်ကျယ်ပြန့်ပြန့်” အဓမ္မစေခိုင်းမှုများ လုပ်ဆောင်နေကြောင်း ILO စုံစမ်းရေးကော်မရှင်က ထုတ်ဖော်ထား သည်။
Fortify Rights ၏ စုံစမ်းစစ်ဆေးမှုတွင် ရိုဟင်ဂျာလက်နက်ကိုင်အဖွဲ့များက ဘင်္ဂလားဒေ့ရှ်နိုင်ငံရှိ ဒုက္ခသည်စခန်းများမှ ရိုဟင်ဂျာဒုက္ခသည်များကို ပြန်ပေးဆွဲပြီး စစ်မှုထမ်းခိုင်းရန် မြန်မာစစ်စစ်ကောင်စီနှင့် ပူးပေါင်းလုပ်ဆောင်နေကြောင်း ၊ ရိုဟင်ဂျာလက်နက်ကိုင်အဖွဲ့များက ၂၀၂၄ ခုနှစ် မတ်လမှ မေလအထိ ရိုဟင်ဂျာဒုက္ခသည် ၁၇၀၀ ခန့်ကို အတင်းအဓမ္မစုဆောင်းခဲ့ကြောင်း သိရှိရသည်။
ILO ညွှန်ကြားရေးမှူးချုပ်ထံသို့ Fortify Rights ကပေးပို့သည့်စာတွင် ILO အဖွဲ့ဝင်နိုင်ငံများအနေဖြင့် မြန်မာစစ်ခေါင်းဆောင်များနှင့် စွမ်းဆောင်ရည်များအပေါ် ပစ်မှတ်ထား ပိတ်ဆို့အရေးယူမှုများ ချမှတ်ကာ မြန်မာနိုင်ငံကို ကုန်သွယ် မှုသဘောတူညီချက်များမှ ဆိုင်းငံ့ထားရန် တိုက်တွန်းထားသည်။
“မြန်မာနိုင်ငံက ပြည်သူတွေဟာ စစ်ကောင်စီရဲ့ လုပ်ရပ်တွေကြောင့် ဆိုးရွားစွာ ထိခိုက်ခံစားနေကြရပါတယ်။ILO ရဲ့ ဖွဲ့စည်းပုံအခြေခံဥပဒေ ပုဒ်မ ၃၃ အရ အရေးယူဆောင်ရွက်ခြင်းက စစ်အာဏာရှင်တွေအတွက် လက်နက်၊ ငွေကြေးနှင့် တရားဝင်မှုတို့ကို ပြတ်တောက်စေနိုင်လို့ အကြမ်းဖက်အုပ်စိုးမှုကို အဆုံးသတ်သွားစေရန် အထောက်အကူ ဖြစ်စေနိုင်ပါတယ်။ Fortify Rights အနေနဲ့ ILO အဖွဲ့ဝင်နိုင်ငံတွေနဲ့ အဖွဲ့အစည်းတွေကို မြန်မာစစ်ကောင်စီအပေါ် ဖြစ်နိုင်သမျှ အပြင်းထန်ဆုံး အရေးယူမှုတွေပြုလုပ်ပေးဖို့အတွက် တောင်းဆိုထားပါတယ်။” ဟု Fortify Rights မှ Senior Advocate ဖြစ်သူ Patrick Phongsathorn က ပြောဆိုသည်။
ILO အဖွဲ့ဝင်နိုင်ငံများအနေဖြင့် စစ်အစိုးရ ကိုယ်စားလှယ်အားလုံးကို ဆိုင်းငံ့ထားရန်နှင့် အမျိုးသားညီညွတ်ရေးအစိုးရကို အသိအမှတ်ပြု အပြည့် အဝ ဆက်ဆံရန်လည်း Fortify Rights က ဆက်လက်တောင်းဆိုထားသည်။