ဒုခေါင်းဆောင် ရန်ကုန်တွင် ပွဲတက်နေချိန် တပ်စခန်းများ အသိမ်းခံရ

ဒုခေါင်းဆောင် ရန်ကုန်တွင် ပွဲတက်နေချိန် တပ်စခန်းများ အသိမ်းခံရ
ဧရာဝတီ၊ မေ ၁၀၊ ၂၀၂၅

မေလ ၉ ရက်နေ့တွင် ကျရောက်သည့် ရုရှားနိုင်ငံ၏ မဟာမျိုးချစ်စစ်ပွဲကြီးအောင်ပွဲ နှစ် ၈၀ ကို ရန်ကုန်မြို့ရှိ Lotte Hotel ၌ ယမန်နေ့က ကျင်းပခဲ့ရာ စစ်ကောင်စီ ဒုဗိုလ်ချုပ်မှူးကြီး စိုးဝင်း တက်ရောက်ခဲ့ကြောင်း စစ်ကောင်စီ သတင်းထုတ်ပြန်သည်။
နိုင်ငံအတွင်း ဖြစ်ပွားနေသည့် တိုက်ပွဲများနှင့် စစ်ရေးများအား အဓိက ကိုင်တွယ်နေရသည့် ဒုစစ်ခေါင်းဆောင် ယင်းသို့ အခမ်းအနားသို့ တက်ရောက်နေချိန် ယမန်နေ့က KNU ၏ မြိတ်-ထားဝယ်ခရိုင်၏ ခရိုင်ဌာနချုပ်၊ တပ်မဟာဌာနချုပ်ဟောင်းဖြစ်သော ထီးခီးနယ်စပ် ဗျူဟာတပ်စခန်း၊ ကရင်ပြည်နယ် ဘားအံခရိုင် ပိုင်ကျုံ(တာကရယ်)မြို့နယ် ခလရ ၂၄ အခြေချတပ်စွဲထားသော လေးပနာဒီ(ခေါ်) တခေါ်ဘီခွီး တပ်စခန်းများကို KNLA၊ KNDO ပူးပေါင်းတပ်များက အပြီးသတ် တိုက်ခိုက်သိမ်းပိုက်ခဲ့သလို ပဲခူးတိုင်း၊ ရွှေကျင်မြို့နယ်အခြေစိုက် အမှတ် ၅၉၈ ခြေမြန်တပ်ရင်းဌာနချုပ်အား ကရင်အမျိုးသားလွတ်မြောက်ရေး တပ်မတော် (KNLA) ပူးပေါင်းတပ်တို့က သိမ်းပိုက်နိုင်ခဲ့သည်။
နှစ် ၈၀ ပြည့် ရင်ပြင်နီချီတက်ပွဲ အထိမ်းအမှတ် ညစာစားပွဲအခမ်းအနားသို့ စစ်ကောင်စီအဖွဲ့ဝင် မန်းငြိမ်းမောင်၊ ရန်ကုန်တိုင်း ဝန်ကြီးချုပ်၊ ပြည်သူ့ပါတီမှ ဦးကိုကိုကြီးနှင့်ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီမှ ဦးခင်ရီတို့လည်း တက်ရောက်ခဲ့ကြသည်။
#WhatsHappeningInMyanmar
#RejectMilitaryCoup