စစ်ကိုင်းတစ်မြို့လုံး ၈၀ ရာခိုင်နှုန်း ပြိုကျပျက်စီးပြီး လတ်တလောသေဆုံးသူ စာရင်း ၅၀ နီးပါး အတည်ပြုနိုင်ကာ ထိခိုက်သေဆုံးသူ ရာချီ ရှိနိုင်ကာ ကယ်ဆယ်ရေးလုပ်မည့်သူမရှိ၊ မီးသတ်ဌာနတစ်ခုလုံး ပြိုကျပျက်စီးနေ
ရန်ကုန်၊ မတ် ၂၉
စစ်ကိုင်းမြို့ တစ်မြို့လုံး ယမန်နေ့ လှုပ်ခတ်သော ငလျင်ကြောင့် ၈၀ ရာခိုင်နှုန်း ပြိုကျပျက်စီးပြီး လတ်တလောသေ ဆုံးသူ စာရင်း ၅၀ နီးပါး အတည်ပြုထားနိုင်ကာ ကူညီကယ်ဆယ်ရေး လုပ်ပေးမည့်သူမရှိ ဖြစ်နေကြောင်း စစ်ကိုင်းမြို့မှ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
“စစ်ကိုင်းက မန္တလေးထက်တောင် အသေအပျောက်များနိုင်တယ်။ မြတ်ကိုယ်ပိုင်သင်တန်ကျောင်းမှာ ကလေးတွေ စာသင်နေတုန်းပြိုကျတာ ကလေးအားလုံးဆုံးတယ်။ ပိနေတယ်။ လေးကျွန်းမြေအုတ်ကျောင်းမှာလည်း ယဉ်ကျေးလိမ္မာသင်တန်းသားတွေ ဖွင့်နေတုန်း ပြိုကျတာ ကလေးတစ်ဝက်နီးပါး ပါသွားတယ်။ အခုက စာရင်းကောက်ဖို့ နေနေသာသာ ကယ်ဆယ်ရေးကို မစနိုင်တာ” ဟု စစ်ကိုင်းအခြေစိုက် ကယ်ဆယ်ရေး လုပ်ရန် ကြိုးပမ်းနေသော ပရဟိတအဖွဲ့ဝင်တစ်ဦးက ဆိုသည်။
စစ်ကိုင်းမြို့နှင့် မန္တလေးမြို့တို့ကို ဆက်သွယ်ထားသော စစ်ကိုင်းတံတားအသစ်မှာလည်း အက်ကွဲကြောင်းများ ဖြစ်ပေါ်နေခြင်းနှင့် ချည်းကပ်လမ်းများ ပြိုကျသဖြင့် ကုန်းလမ်းဆက်သွယ်ရေး ပြတ်တောက်နေကြောင်း၊ ပြည်သူများမှာ ဇက်ရေယာဉ်များဖြင့်သာ စစ်ကိုင်းနှင့် မန္တလေးအကြား ကူးသန်းနေရကြောင်း သိရှိရသည်။
“မန္တလေးဘက်က ကယ်ဆယ်ရေးတွေ ဒီဘက်ကို မလာနိုင်ဘူး။ တစ်မြို့လုံးကတော့ အပျက်အစီးတွေကို ထိုင်ကြည့်နေရတာ” ဟု ပြည်သူတစ်ဦးက ဆိုသည်။
စစ်ကိုင်းမြို့ပေါ်တွင် ဗလီ ၃ လုံး ပြိုကျခဲ့ပြီး လတ်တလော စာရင်းများအရ ၄၅ ဦးသေဆုံးကြောင်း၊ သေဆုံးသူ များတွင် အတည်ပြုထားပြီး အလောင်းများမှာ အပျက်အစီးများအောက်တွင် ပိမိနေကြောင်း သိရှိရသည်။