မင်းအောင်လှိုင်၏ လုပ်ရပ်များအတွက် ဂုဏ်ယူသည်ဟု အငြိမ်းစား ထိပ်ပိုင်း စစ်တပ်အရာရှိများ ပြော
မတ် ၂၇၊ ၂၀၂၅
တိုင်းပြည်ကို မတရားအာဏာသိမ်းကာ နိုင်ငံတစ်ဝန်း စစ်ရာဇဝတ်မှုတွေ ကျူးလွန်နေတဲ့ စစ်ခေါင်းဆောင် မင်းအောင်လှိုင်ရဲ့ လုပ်ရပ်တွေကို ဂုဏ်ယူတယ်လို့ အငြိမ်းစား စစ်တပ်အရာရှိတွေက ပြောကြားလိုက်ပါတယ်။
အငြိမ်းစား စစ်တပ်အရာရှိတွေကို စစ်ခေါင်းဆောင် မင်းအောင်လှိုင်က နေပြည်တော်မှာ တော်လှန်ရေးနေ့ (တပ်မတော်နေ့) အခမ်းအနား မတိုင်မီ ဂါရ၀ပြုချိန်မှာ ပြောကြားလိုက်တာပါ။ စစ်တပ်အရာရှိဟောင်းတွေရဲ့ ကိုယ်စား သမ္မတဟောင်း ဦးသိန်းစိန်က မင်းအောင်လှိုင်ရဲ့ လုပ်ရပ်တွေကို ဂုဏ်ယူတယ်လို့ ဆိုပါတယ်။
စစ်ခေါင်းဆောင်ရဲ့ ဦးဆောင်မှုနဲ့ တပ်မတော်အရေးကိစ္စတွေ၊ တိုင်းပြည်တည်ငြိမ်ရေးတွေနဲ့အတူ လူမှုစီးပွားတိုးတက်ရေးကို နေ့မအား ညမအား ဆောင်ရွက်နေတာကို ဂုဏ်ယူတယ်လို့ ပြောကြားလိုက်တာလည်း ဖြစ်ပါတယ်။
တပ်မတော်ရဲ့ အစဉ်အလာတွေကို မပြတ်ထိန်းသိမ်း သွားဖို့လည်း အရေးကြီးတယ်လို့ သမ္မတဟောင်း ဦးသိန်းစိန်က ဆိုပါတယ်။
ပြည်ပကျူးကျော်မှုအတွက် ကာကွယ်ရေး၊ ပြည်တွင်းဆူပူသောင်းကျန်းမှုကို တားဆီးရေးတို့သာမက အမျိုး၊ ဘာသာ၊ သာသနာနဲ့ ယဉ်ကျေးမှုတို့ မပျောက်ပျက်ရေးတို့ကိုပါ ထိန်းသိမ်းကာကွယ်စောင့်ရှောက်ပေးနေတယ်လို့လည်း မင်းအောင်လှိုင်က အငြိမ်းစား တပ်မတော်အရာရှိတွေနဲ့ တွေ့ဆုံစဉ် ပြောကြားခဲ့ပါသေးတယ်။
စစ်အာဏာသိမ်းပြီးနောက်ပိုင်းပြုလုပ်တဲ့ တပ်မတော်နေ့အခမ်းအနားတွေမှာ ဦးသိန်းစိန်အပါအဝင် အငြိမ်းစား စစ်အရာရှိတွေကို ဖိတ်ကြားလေ့ရှိပြီး မင်းအောင်လှိုင်နဲ့ စစ်ကောင်စီအဖွဲ့ဝင်တွေက ဂါရ၀ပြုပွဲကို ပုံမှန် ကျင်းပလေ့ရှိပါတယ်။
နှစ်စဉ် ဂါရ၀ပြုပွဲတွေတိုင်းမှာ စစ်အာဏာရှင်ဟောင်း သန်းရွှေကိုတော့ မြင်တွေ့ရလေ့မရှိပါဘူး။