နေပြည်တော် စစ်ရေးပြအခမ်းအနားအတွက် ရောက်ရှိနေသည့် ရာနှင့်ချီသော စစ်ကောင်စီတပ်ဖွဲ့ဝင် အချင်းချင်း အရက်သောက်ရန်ဖြစ်ပြီး ဒုဗိုလ်မှူးကြီး အပါအဝင် ၁၈ ဦးဒဏ်ရာရ
==============
ဖြန်ဖြေမရသည့်အတွက် ကျင်စက်များသုံးကာလူစုခွဲခဲ့ရပြီး ဗိုလ်ချုပ်အဆင့်ရှိ စစ်ရေးပြမှူးက လာရောက် ဆဲဆိုသွား
ဧရာဝတီတိုင်းမ်
မတ် ၂၇ ရက်
နေပြည်တော်တွင် စစ်ကောင်စီက ကျင်းပမည့် နှစ် ၈၀ ပြည့် တော်လှန်ရေးနေ့(တပ်မတော်နေ့) အခမ်းအနားအတွက် စစ်ရေးပြရန် စုဝေးရောက်ရှိနေသည့် စစ်ကောင်စီတပ်ဖွဲ့ဝင်အချင်းချင်း ယမန်နေ့ မတ် ၂၆ ရက်နေ့ ညပိုင်းက အရက်သောက်စားကာ စကားများရန်ဖြစ်ခဲ့ကြပြီး ၁၈ ဦး ထိခိုက်ဒဏ်ရာရခဲ့ကြောင်း တပ်တွင်း သတင်းရင်းမြစ်ထံက သိရသည်။
စစ်ရေးပြအခမ်းအနားကျင်းပရာတွင် ပါဝင်မည့် တပ်ဖွဲ့ဝင်များ နေထိုင်ရာ နေပြည်တော် တည်းခိုရေး(၃) ရှိ အိပ်ဆောင် ၃ နှင့် ၄ မှ တပ်ဖွဲ့ဝင်များ အရက်သောက် စကားများရာမှ အုတ်ခဲ နှင့် တုတ်များအသုံးပြု၍ ပစ်ခတ်ရိုက်နှက်ကြခြင်းဖြစ်ပြီး တပ်ဖွဲ့ဝင် ၁၅ ဦး ခေါင်းကွဲကာ သွေးထွက်သံယိုဒဏ်ရာများရရှိခဲ့ပြီး သုံး ဦးမှာ စိုးရိမ်ရသည့် ဒဏ်ရာအပြင်းအထန်ရရှိခဲ့ကြောင်း သိရသည်။
ဒဏ်ရာရရှိသူများထဲတွင် ဒုတိယဗိုလ်မှူးကြီးအဆင့်ရှိ စစ်ကြောင်းတပ်ရင်းမှူးတစ်ဦး ပါဝင်ခဲ့ပြီး လက်ရှိတွင် သက်ဆိုင်ရာ အရာရှိများမှ ညတွင်းချင်း ရုံးတက်ဖြေရှင်းခဲ့ရကြောင်း CDM တပ်မတော်သားတစ်ဦးက ဧရာဝတီတိုင်းမ်ကို ပြောသည်။
စစ်ကောင်စီတပ်ဖွဲ့ဝင်များ တည်းခိုသည့် အိမ်ဆောင်တစ်ခုတွင် တပ်သား ၇၀၀ မှ ၉၀၀ အထိ ထားရှိထားပြီး အိပ်ဆောင် နှစ် ခုကြား ရန်ပွဲတွင် တပ်သား ရာနှင့်ချီပါဝင်ခဲ့သည့်အတွက် အမှတ်(၂)၊ တန်းမြင့်လေ့ကျင့်ရေးသင်တန်းကျောင်း (တကက-၂) မှ ဝင်ရောက် ထိန်းသိမ်းခဲ့သော်လည်း ဖြန်ဖြေမရသည့်အတွက် လုံခြုံရေးများထပ်မံခေါ်ယူကာ ကျင်စက်များသုံးကာ လူစုခွဲခဲ့ရပြီး ဗိုလ်ချုပ်အဆင့်ရှိ စစ်ရေးပြမှူးက လာရောက် ဆဲဆိုဆူပူသွားကြောင်း သိရသည်။
ယနေ့ မတ် ၂၇ ရက်နေ့တွင် ကျရောက်သည့် စစ်ကောင်စီ၏ နှစ် ၈၀ ပြည့် တပ်မတော်နေ့အထိမ်းအမှတ် စစ်ရေးပြ အခမ်းအနားကို ညနေပိုင်း တွင် ပြောင်းလဲလုပ်ဆောင်မည်ဖြစ်ပြီး လုံခြုံရေးကိုလည်း တင်းကျပ်စွာစီမံထားကြောင်း သိရသည်။
ဓာတ်ပုံ – အင်တာနက်