“ပြင်ဦးလွင် ဈေးကွက်တင်တော့မှာလား”
မန္တလေးတိုင်း သပိတ်ကျင်းမြို့ကို တော်လှန်ရေးတပ်တွေက အပြီးပိုင် တိုက်ခိုက် သိမ်းပိုက်လိုက်ပြီးနောက် ပြင်ဦးလွင်မှာ ရှိနေတဲ့ အခြေစိုက် တပ်ရင်းတွေနဲ့ စစ်တက္ကသိုလ်၊ စစ်သင်တန်းကျောင်းတွေက အရာရှိတွေဟာ သူတို့ရဲ့ မယားတွေနဲ့ မိသားစုဝင်တွေကို တိတ်တဆိတ် စစ်ရှောင်ခိုင်းလိုက်ပြီဖြစ်ကြောင်း ဖရဲသီးက သတင်းပေးပို့လာပါတယ်။
ရမခ လားရှိုး အသိမ်းခံရပြီးနောက် ပြင်ဦးလွင်ရှိ တပ်ထောက်ခံ အများအပြားဟာ ပြင်ဦးလွင်ကို စွန့်ခွာ ထွက်ပြေးရာမှာ ပြင်ဦးလွင် တပ်နယ်က အရာရှိကြီးတချို့ရဲ့ မိသားစုဝင်တွေပါ ပါဝင်ခဲ့ပြီး တချို့ မိသားစုဝင်တွေဟာ ဆက်လက် ကျန်ရှိနေခဲ့ကြောင်း၊
ဩဂုတ်လ ၂၇ ရက်နေ့ ဒီကနေ့မှာတော့ ပြင်ဦးလွင် တပ်နယ်က အရာရှိတွေရဲ့ မယားတွေနဲ့ မိသားစုဝင်တွေကို ကိုယ့်အစီအစဉ်နဲ့ကိုယ် တိတ်တဆိတ် စစ်ရှောင်ခိုင်းတာကြောင့် ပြင်ဦးလွင်ကနေ ခိုးကြောင်ခိုးဝှက် ထွက်ခွာနေကြပြီဖြစ်ကြောင်း၊
အောက်ခြေက အခြားအဆင့် စစ်သည်တွေရဲ့ မိသားစုဝင်တွေကိုတော့ သက်ဆိုင်ရာ တပ်မှူးတွေက တပ်ကနေ ထွက်ခွာခွင့် မပေးတာကြောင့် လက်ရှိအချိန်အထိ စစ်တပ်တွေထဲမှာပဲ ပိတ်မိနေဆဲဖြစ်ကြောင်း သိရှိရပါတယ်။
#4C_TruthNews
ပြင်ဦးလွင်မြို့တွင် လက်နက်ကြီးပစ်ခတ်သံများ ဆက်တိုက်ထွက်ပေါ်နေ
▪️တိုက်ပွဲပြင်းထန်နေသော တောင်းခမ်းကို သသနတပ်က ပစ်ကူပေးနေခြင်းဟု မြို့ခံများပြော
မိထက်/People’s Spring
ပြင်ဦးလွင်မြို့ရှိ စစ်ကောင်စီတပ်က တိုက်ပွဲဖြစ်နေသော တောင်းခမ်းကျေးရွာသို့ လက်နက်ကြီးပစ်ကူဆက်တိုက်ပေးနေကြောင်း အဆိုပါမြို့ခံများက ပြောသည်။
ယနေ့(ဩဂုတ် ၂၇ရက်) ညနေ ၆နာရီခန့်မှစတင်၍ လက်နက်ကြီးပစ်ခတ်သံများ ဆက်တိုက်ကြားနေရခြင်းဟု ဒေသခံများက ပြောသည်။
တအာင်းတပ်မတော်(TNLA)ဦးဆောင်သော တော်လှန်ရေးများက နောင်ချိုမြို့နယ် တောင်ခမ်းကျေးရွာရှိ စစ်ကောင်စီတပ်စခန်းများအား ထိုးစစ်ဆင်တိုက်ခိုက်မှုကြောင့် ယင်းနေရာသို့ ပြင်ဦးလွင်မြို့ အခြေစိုက် သိပ္ပံနှင့် သုတေသနနည်းပညာဌာနချုပ်(သသန)တပ်ရင်းမှ လက်နက်ကြီးများဖြင့် ပစ်ခတ်နေခြင်းဟု ကနဦးသိရပြီး အသေးစိတ်အတည်မပြုနိုင်သေး ကြောင်း မြို့ခံများက ပြောသည်။
” သသနတပ်ကနေ ပစ်နေတာ ၂ရက်ရှိပြီ။ အရင်ရက်က ပစ်တာ ဒီနေ့လောက်မများဘူး။ ဒီနေ့က ခပ်စိတ်စိတ်ပစ်နေတာ”ဟု ပြင်ဦးလွင်မြို့ခံတစ်ဦးက ပြောသည်။
သသနတပ်သည် ပြင်ဦးလွင်မြို့ရှိ ဒီဇင်ဘာခြံ အကျော်တွင်ရှိသည်။
“တောင်းခမ်းမှာ TNLAက အင်အား သုံးထောင်လောက်နဲ့ တက်လုံးနေတယ်ကြားတယ်။ အဲဒါကြောင့် ဒီကနေ ပစ်နေတာလို့ကြားတယ်”ဟု ပြင်ဦးလွင်မြို့ခံက ပြောသည်။
လက်နက်ကြီးပစ်ခတ်သံများသည် ပြင်ဦးလွင်မြို့ပေါ်အပြင် မြို့သစ်၊ ဒီဇင်ဘာခြံပတ်ဝန်းကျင်၊ အင်းယား၊ နောင်ခမ်းကြီးကျေးရွာတို့တွင် ကျယ်လောင်စွာကြားနေရသည်ဟု ဆိုသည်။
” အိမ်တောင်တုန်တယ်။ အရပ်သားတွေ နေစရာမရှိတော့ဘူး ပစ်ခတ်နေတာက။ စစ်တပ်က ဧကတစ်သောင်းနားမှာ လက်နက်ကြီးဆင်ပြီး တောင်ခမ်းဘက်ကိုပစ်နေတာပါ”ဟု ဒီဇင်ဘာခြံအနီးနေသူတစ်ဦးက ပြောသည်။
တောင်ခမ်းရွာရှိ စစ်ကောင်စီ၏ အမှတ် (၉၀၂) အမြောက်တပ်ရင်းကို TNLA)နှင့် PDF မဟာမိတ်များက ထိုးစစ်ဆင်တိုက်ခိုက်နေကြောင်းသိရပြီး အသေးစိတ်မသိရှိရသေးပေ။
အမှတ် (၉၀၂) အမြောက်တပ်ရင်း အပြင်းအထန် တိုက်ခိုက်ခံနေရ၍ ယမန်နေ့လည်း လေကြောင်းမှနှစ်ကြိမ်ပစ်ကူပေးခဲ့ရကြောင်း စစ်ကောင်စီလက်အောက်ခံတယ်လီဂရမ်ချန်နယ်များ၌ဖော်ပြထားသည်။
နောင်ချိုမြို့နယ် တောင်ခမ်းကျေးရွာ၊ (၆၀၄) တပ်ရင်းနှင့် မကျီးရေကျေးရွာမှ ခမရ(၃၅၄)တပ်ရင်းအတွင်း တိုက်ပွဲဖြစ်ပွားခဲ့ပြီး စစ်ကောင်စီတပ်မှ Y12 ဖြင့် (၃)ကြိမ် လာရောက်ဗုံးကြဲတိုက်ခိုက်ခဲ့သည်ဟု TNLAက ဩဂုတ် ၂၅ရက်တွင် သတင်းထုတ်ပြန် ထားသည်။
(နောင်ချိုမြို့နယ် တောင်းခမ်းရွာရှိ စစ်ကောင်စီတပ်အား တိုက်ခိုက်နေသော TNLAရဲဘော်များအား တွေ့ရစဉ်။ ဓာတ်ပုံ – TNLA)