စစ်ခေါင်းဆောင်၏ ခရီးစဉ်ပြီးနောက် ရုရှားသံအမတ် လာရောက်တွေ့ဆုံမှု အနုမြူဓာတ်ပေါင်းဖို တည်ဆောက်ရေးဖြစ်လာနိုင်
နိုင်မင်းလွင်/ဧရာဝတီတိုင်းမ်
မတ် ၂၂ ရက်
အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်၏ ရုရှားခရီးစဉ်ပြီးနောက် မြန်မာနိုင်ငံသို့ ရုရှားသံအမတ် လာရောက်တွေ့ဆုံမှုသည် အနုမြူဓာတ်ပေါင်းဖို တည်ဆောက်ရန် ကိစ္စရပ်များ ဖြစ်လာနိုင်ဖွယ်ရှိကြောင်း CDM အရာရှိနှင့် လေ့လာသူတို့က ထောက်ပြသည်။
မြန်မာနိုင်ငံဆိုင်ရာ ရုရှားသံအမတ်ကြီး H.E. Mr. Iskander Azizov သည် နေပြည်တော်သို့ ယခုရက်ပိုင်းက လာရောက်ခဲ့ပြီး စစ်ခေါင်းဆောင်နှင့် တွေ့ဆုံကာ နှစ်နိုင်ငံကြား ကာကွယ်ရေးအပါအဝင် ကဏ္ဍပေါင်းစုံ၌ ပူးပေါင်းဆောင်ရွက်ရေး ဆွေးနွေးခဲ့ဟု စစ်ကောင်စီ၏ ထုတ်ပြန်ချက်အရ သိရသည်။
ယင်းအခြေအနေအရ မြန်မာ-ရုရှားဆက်ဆံရေး ဘက်စုံပိုမို ပူးပေါင်းလာနိုင်ပြီး ကမ္ဘာ့အခင်းအကျင်း မတည်ငြိမ်ချိန် ရွေးချယ်စရာ များများမရှိသည့် စစ်ခေါင်းဆောင်အနေဖြင့် ဖက်တစ်ဖက်ကို ပြေးကပ်ခြင်းဖြစ်ကြောင်း မြန်မာ့အရေး လေ့လာသူတစ်ဦးက ဧရာဝတီတိုင်းမ်ကို ပြောသည်။
“အနုမြူဓာတ်ပေါင်းဖို ဆောက်လုပ်ဖို့ ကိစ္စတွေ ဆက်ဖြစ်နိုင်ပါတယ်။ သတင်းတွေအရ ၅၅ မဂ္ဂါဝပ် စက်ရုံသေး နှစ် ခု ဆောက်မယ်။ ထားဝယ်ကတော့ ကျွန်တော်အမြင် ကြာဦးမယ်။ မြေဦးထား သလောက်ပဲ ဖြစ်နိုင်မယ်” ဟု မြန်မာ့အရေး လေ့လာသူက ဆိုသည်။
စစ်ကောင်စီကမူ အဆိုပါတွေ့ဆုံမှုအတွင်း စစ်ခေါင်းဆောင်၏ ရုရှားခရီးစဉ်၌ နှစ်နိုင်ငံအကြား ဆွေးနွေးရရှိခဲ့သည့် သဘောတူညီချက်များကို ဆက်လက်အကောင်အထည် ဖော်ဆောင်သွားရန်နှင့် ကာကွယ်ရေး ကဏ္ဍပေါင်းစုံ ပူးပေါင်းဆောင်ရွက်ရေး ဆွေးနွေးခဲ့ကြောင်း ထုတ်ပြန်ထားသည်။
မြန်မာနိုင်ငံတွင် နျူကလီးယား သုတေသနဌာန တည်ထောင်ရန် ပြီးခဲ့သည့် ၂၀၁၅ ခုနှစ်က ရုရှားနိုင်ငံနှင့် လက်မှတ်ရေးထိုးခဲ့ပြီး စစ်တပ် အာဏာသိမ်းပြီးနောက် နျူကလီးယား နည်းပညာကို အသုံးချရန် နည်းမျိုးစုံ ကြိုးပမ်းလာကြောင်း သိရသည်။
အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်သည် ယခုလအတွင်း ရုရှားနိုင်ငံသို့ သွားရောက်ခဲ့ပြီး သမ္မတ ပူတင်နှင့် တွေ့ဆုံကာ မြန်မာနိုင်ငံ၌ အသေးစား နျူကလီးယား ဓာတ်ပေါင်းဖို (ဓာတ်အားပေးစက်ရုံ) တည်ဆောက်ရေးအပါအဝင် သဘောတူညီချက် ၁၀ ခုကို လက်မှတ်ရေးထိုး ခဲ့ကြောင်း သိရသည်။
ယင်းနျူကလီးယား ပိုင်ဆိုင်ခွင့်သည် စစ်ခေါင်းဆောင်များ၏ အိမ်မက်ဖြစ်ပြီး ထိုအတွက် ပဲခူး နှင့် နေပြည်တော်ဝန်းကျင်တွင် စက်ရုံတည်ဆောက်သွားရန် စီစဉ်နေကြောင်း သတင်းရင်းမြစ်ထံက သိရသော်လည်း ဧရာဝတီတိုင်းမ် သတင်းဌာနအနေဖြင့် သီးခြားအတည် မပြုနိုင်သေးပေ။
“သူတို့ သဘောတူညီချက်တွေထဲမှာလည်း ပါလာပြီးသား။ စစ်တပ်မှာ နျူကလီးယားနဲ့ ပတ်သက်တဲ့ အိမ်မက်ရှိတယ်။ နောက်ပြီး သူတို့လိုနေတာ လက်နက်တွေ။ ဒါကို သူတို့အနေနဲ့ အကောင် အထည်ဖော်သွားမယ့် အနေအထားရှိတယ်” ဟု CDM ဗိုလ်ကြီး လင်းထက်အောင်က ဧရာဝတီတိုင်းမ် ကို ပြောသည်။
လက်ရှိတွင် မြန်မာ-ရုရှား ကုန်သွယ်ရေးသည် လက်နက်ဝယ်ယူမှု ကိန်းဂဏန်းများအပါအဝင် အမေရိကန်ဒေါ်လာ ၂ ဘီလီယံသာ ရှိနေပြီး အိမ်နီးချင်းလည်းဖြစ် အမေရိကန်ဒေါ်လာ ၄ ဘီလီယံကို နှစ်နိုင်ငံ နယ်စပ်ကုန်သွယ်ရေး လုပ်နေသည့် ထိုင်းနိုင်ငံထက်ပင် နည်းပါးနေကြောင်း လေ့လာသူ များထံက သိရသည်။
ဓာတ်ပုံ-စစ်ကောင်စီ