ဧရာဝတီတိုက်ပွဲအတွင်း ဒဏ်ရာရရှိလာသည့် စစ်ကောင်စီ၏ ဗျူဟာမှူးတစ်ဦး သေဆုံး၍ လုံခြုံရေးအများအပြားဖြင့် မီးသဂြိုဟ်
ဧရာဝတီတိုင်းမ်
မတ် ၃ ရက်
ဧရာဝတီတိုင်း၊ပုသိမ်မြို့နယ် အနောက်တောင် တိုင်း စစ်ဌာနချုပ်ရှိ မဆရ ၄ တွင် ရှေ့တန်းမှ ဒဏ်ရာပြင်း ထန်၍ ဆေးကုသမှုခံယူနေသည့် စစ်ကောင်စီ၏ ဗျူဟာမှူးတစ်ဦး သေဆုံးသွားကြောင်း သိရသည်။
ယနေ့ မတ် ၃ ရက် နံနက် ၉ နာရီ ၅၀ မိနစ်
ခန့်တွင် သေဆုံးသည့် ဗျူဟာမှူး၏ အလောင်းကို ပုသိမ်၊ ရွှေမြင်တင်မီးသဂြိုဟ်စက်သို့ သယ်ဆောင်လာပြီး မီးသဂြိုဟ်ခဲ့ကြောင်း သိရသည်။
နာရေးသို့ စစ်ကောင်စီ စစ်ကားများ၊ မီနီဘတ်စ်များ၊ အိမ်စီးကားများအပါအဝင် လုံခြုံရေးယူထားသည့် ကားစုစုပေါင်း ၃၆ စီးဖြင့် ရွှေမြင်တင်သုဿာန်တွင် လာရောက် ပြုလုပ်သွားခြင်းဖြစ်ကြောင်း သတင်းအထူးတပ်ဖွဲ့ ပုသိမ်ထံမှ သိရသည်။
“သာပေါင်းတိုက်ပွဲကနေ ဒဏ်ရာရလို့ ပုသိမ်မဆရမှာ ဆေးကုသပေးနေတဲ့ ဗျူဟာမှူးသေသွားတာလို့ ပြောတယ်။ လုံခြုံရေးအပြည့်ယူပြီး သဂြိုဟ်တယ်။ သတင်းဖုံးဖိထားချင်ပေမယ့် ဗျူဟာမှူးအဆင့်ဆိုတော့ နာရေးကို ဒီလောက်တော့လုပ်ပေးရပုံပေါ်တယ်။ နေ့တိုင်းလိုလို နတခထဲ လူနာတွေပို့နေတာ တွေ့ရတယ်”ဟု ပုသိမ်ဒေသခံတစ်ဦးက ဧရာဝတီတိုင်းမ်ကို ပြောသည်။
ပြီးခဲ့သည့် ဖေဖော်ဝါရီ ၂၇ ရက်နေ့မှစ၍ သာပေါင်း မြို့နယ်တွင် တိုက်ပွဲပြန်လည်ဖြစ်ပွားနေပြီး AA နှင့် ပူး ပေါင်းတပ်များက ကမွန်းချဉ်ကုန်းကို ထိုးစစ်ဆင်တိုက်ခိုက်ခဲ့ကြောင်း စစ်ရေးသတင်းရင်းမြစ်ထံမှ သိရသည်။
စစ်ကောင်စီက တိုက်ပွဲဖြစ်ပွားရာနေရာသို့ သာပေါင်း မြို့မှ ဖောကားလေးစီးပါ စစ်အင်အားအပြည့်ပို့ဆောင်ခဲ့ပြီး စက်တပ်လေထီးများဖြင့်ပါ ဗုံးကြဲတိုက်ခိုက်ကာ အပြင်းအထန်ခုခံခဲ့ရကြောင်း သိရသည်။
တိုက်ပွဲအတွင်း ဒဏ်ရာရရှိသူများနှင့် သေဆုံးသူများကို သာပေါင်းနှင့် ပုသိမ်မြို့တို့သို့ ခေါ်ဆောင်လာပြီး ဆေးကုသခြင်း၊ မီးသဂြိုဟ်ခြင်းများ ပြုလုပ်ခဲ့ကြကြောင်း သိရသည်။
စစ်ကောင်စီနာရေးအခမ်းအနားမြင်ကွင်းတစ်ခု (ပုံဟောင်း)
#ဧရာဝတီတိုင်း #တိုက်ပွဲ #စစ်ကောင်စီတပ် #ဗျူဟာမှူး #သေဆုံး #မီးသဂြိုဟ် #Ayeyarwaddy_Times