စစ်တွေတွင် တိုက်ပွဲ ပိုမိုပြင်းထန် ၊ AA က အဓိကကျသည့်စခန်းများကို ထိုးစစ်ဆင်
ဓါတု
မဇ္ဈိမ။ ။ စစ်တွေမြို့နယ်တွင် တိုက်ပွဲပိုမိုပြင်းထန်လာပြီး အာရက္ခတပ်တော်(AA)က စစ်ကောင်စီ အထိုင်ချထားသည့် အဓိကကျသော တပ်စခန်းများကို တောက်လျှောက်ထိုးစစ်ဆင်နေကြောင်း စစ်ရေးသတင်းရင်းမြစ်များက ပြောသည်။
စစ်တွေမြို့ပြင် ပါဒလိတ်နှင့် အမြင့်ကျွန်း၊ ကြွီတဲကျေးရွာမှ အထိုင်ချတပ်စခန်းများ၊ ကွမ်းတောင်ကျေးရွာနှင့် ရွှေမင်းဂံဘက်သို့ AAက ထိုးစစ်ဆင်နေရာ ဖေဖော်ဝါရီလ ဒုတိယပတ်အတွင်းမှ ယနေ့ ( ဖေဖော်ဝါရီလ ၁၆ ရက် ) အထိ တိုက်ပွဲများ ပိုမိုပြင်းထန်လာကြောင်း ဒေသတွင်းစစ်ရေးသတင်းရင်းမြစ်က မဇ္စျိမကိုပြောသည်။
“စစ်တွေကတော့ တောက်လျှောက်တိုက်ပွဲဖြစ်နိုင်တဲ့ အနေအထားမှာရှိတယ်။ ဟိုဘက် ဒီဘက်ကမ်း လှမ်းမြင်နေရတော့ အနီးကပ်သဘောမျိုးပေါ့။လက်နက်ကြီးတွေနဲ့ အပြန်အလှန်ပစ်နေကြတာ ဒီနေ့အထိပစ်နေတုန်းပဲ ။ နှစ်ဖက်အထိအခိုက်တွေကအတိအကျမသိရသေးဘူး”ဟု ၎င်းကပြောသည်။
စစ်တွေမြို့ပေါ်တွင်ရဲတပ်ရင်း၊ ရဲအကူတပ်ရင်းနှင့် ကမ်းနားဘက်ရှိ ရေတပ်စခန်းသာရှိနေခြင်းကြောင့် အာရက္ခတပ်တော်(AA) အနေဖြင့် စစ်ကောင်စီတပ်စခန်းများ အခြေစိုက်ထားသည့် ကျန်နေရာများကိုသာ အဓိက ပစ်မှတ်ထားတိုက်ခိုက်နေ၍ ထိုးစစ်မှာ မြို့ပေါ်သို့ မရောက်လာနိုင်ကြောင်း CDM ဗိုလ်ကြီးဇင်ယော်ကသုံးသပ်သည်။
“အဓိက မိန်းက သက်ကယ်ပြင်ဒကစလည်းရှိတယ် တိုင်းမှူးလည်းရှိတော့ ဒကစကျပြီဆိုတာနဲ့ မြို့ထဲကရဲတွေကအလံဖြူထောင်ပြီးတော့ထွက်လာမယ့်အနေအထားပဲ။ ဒါပေမဲ့ သက်ကယ်ပြင်လိုနေရာကို အဓိကတိုက်စစ်မျက်နှာစာထားပြီး လုပ်မယ်ဆိုရင် AA တို့အနေနဲ့ စစ်တွေမြို့ထဲကနေ ခြေကုပ်ယူပြီးတိုက်ရမယ့်အနေအထားမဟုတ်ဘူး ။ အဲ့ဒီတော့ မြို့ကိုဖျက်ဆီးမှာက စစ်တပ်ကပဲ ဖျက်ဆီးလိမ့်မယ်။ ဒါကြောင့်မြို့ထဲမှာ တိုက်ပွဲရောက်လာနိုင်စရာ ပြင်းထန်လာနိုင်စရာမရှိဘူးလို့ ပြောရမှာပဲလို့ ထင်ပါတယ်”ဟု ၎င်းကမဇ္စျိမကိုပြောသည်
အဆိုပါနယ်မြေများတွင် ပြီးခဲ့သည့် ဖေဖော်ဝါရီလ ၈ ရက်ကစ၍ တိုက်ပွဲများစတင်ခဲ့ပြီး လက်ရှိတွင် ပြင်းထန်သည့်နေ၍ စစ်တွေကို AA က ပိတ်ဆို့ကာလက်နက်ကြီးများဖြင့် ပစ်ခတ်နေခြင်းဖြစ်ကြောင်း ဒေသခံများက ဆိုသည်။
စစ်ကောင်စီအနေဖြင့်လည်း လက်ရှိတိုက်ပွဲဖြစ်ပွားနေသည့် ပါဒလိတ်အစွန်ဖြစ်သည့် အမှတ်(၂၃၂) ခြေလျင်တပ်ရင်းနှင့် ကြွီတဲဘက်ရှိ အမှတ်(၃၄၄) ခြေမြန်တပ်ရင်းတို့တွင် လက်နက်ကြီးအထိုင်စခန်းများကို ခံစစ်အခိုင်အမာပြင်ဆင်ထားကြောင်းသိရသည်။
ယင်းခံစစ်အနေအထားမှာ ယခင်ကတိုက်ပွဲဖြစ်ပွားခဲ့သည့် ပုဏ္ဏားကျွန်း၊ ရသေ့တောင်၊ ကျောက်တော်၊ မြောက်ဦး၊ မောင်တော နှင့် ဘူးသီးတောင်ဘက်မှ တပ်ဆုတ်ပြီးထွက်ပြေးလာသည့် ခွာစစ် တပ်သားနှင့် ရဲတပ်သားအားလုံး စုစည်း ခံစစ်ဆင်နိုင်သည့်အနေအထားရှိကြောင်း CDM ဗိုလ်ကြီးဇင်ယော်ကဆိုသည်။
သို့သော်လည်းတပ်ပျက်ပြီး ပြေးလာသူများဖြစ်သောကြောင့် အာရက္ခတပ်တော်က အင်အားအလုံးအရင်းဖြင့် တိုက်မည်ဆိုလျှင် ထွက်ပေါက်မှာကုလားတန်မြစ်ဝသာရှိနေ၍ နဂိုပုံစံအတိုင်းလက်နက်ချနိုင်ကြောင်း ၎င်းကသုံးသပ်သည်။
စစ်တွေမြို့နယ်တွင် ဒေသကွပ်ကဲမှုစစ်ဌာနချုပ်(ဒကစ)၊ ခလရ(၂၀)၊ခလရ(၂၇၀)၊ခလရ(၂၃၂) ခမရ(၃၄၄)၊ခမရ(၃၅၄)၊ အမှတ် ၁၂နှင့်အမှတ်(၃၆) ရဲတပ်ရင်း စသည့် စုစုပေါင်း တပ်ရင်းတပ်ဖွဲ့ ၁၀ ခုထက်မနည်းရှိသည်။
စစ်တွေမြို့နယ်တွင်တိုက်ပွဲဖြစ်ပွားနေသော်လည်း ဌာနဆိုင်ရာရုံးဝန်ထမ်းများကိုအတင်းအကျပ်ရုံးတက်ခိုင်းပြီး ဝန်ထမ်းများကိုလည်း(Movement order)ခရီးသွားလာခွင့်အမိန့်ကိုလည်း ပြီးခဲ့သည့် ၂၀၂၄ နိုဝင်ဘာလကတည်းကပိတ်ပင်ထားခြင်းဖြစ်ကြောင်း ရုံးဝန်ထမ်းများထံကတဆင့်သိရသည်။
လက်ရှိတွင် အာရက္ခတပ်တော်(AA) ကစစ်တွေမြို့နယ်အပြင် ပြည်မနှင့်ရခိုင်ထိစပ်နေသည့် ရေကြည်၊ငဖဲမြို့နယ်များတွင်လည်း စစ်ကောင်စီတပ်စခန်းများကိုထိုးစစ်ဆင်လျက်ရှိသည်။
ပုံအညွှန်း- ပုဏ္ဏားကျွန်းမြို့မရဲစခန်းရှေ့ရှိ အာရက္ခတပ်တော်(AA)တပ်ဖွဲ့ဝင်များ
