စစ်ကောင်စီ၏ ရွေးကောက်ပွဲအစီအစဥ်များကို ငြင်းပယ်ဟု နိုင်ငံတကာရွေးကောက်ပွဲဆိုင်ရာအဖွဲ့များ ပူးတွဲကြေညာ
001
မဇ္ဈိမ။ ။ တရားဥပဒေနှင့် မညီသည့် မြန်မာစစ်အုပ်စု၊ စစ်ကောင်စီက ၂၀၂၅ ခုနှစ်တွင် ကျင်းပမည့် ရွေးကောက်ပွဲအမည်ခံ အစီအစဥ်များကို ပြတ်ပြတ်သားသား ငြင်းပယ်ကြောင်း နိုင်ငံတကာ ရွေးကောက်ပွဲကျွမ်းကျင်သူများနှင့် အဖွဲ့အစည်းများ ယမန်နေ့ (ဖေဖော်ဝါရီလ ၆) က ပူးတွဲကြေညာချက်ထုတ်ပြန်သည်။
ဒီမိုကရေစီနှင့် ရွေးကောက်ပွဲဆိုင်ရာအကူအညီပေးရေး နိုင်ငံတကာအဖွဲ့အစည်း( International IDEA) ၊ လွတ်လပ်သောရွေးကောက်ပွဲများဆိုင်ရာ အာရှကွန်ရက် (ANFREL)နှင့် ကလပ်ဒီမက်ဒရစ်အသင်း (Club de Madrid)တို့က ပူးတွဲကြေညာခြင်းဖြစ်သည်။
နိုင်ငံတကာ အသိုက်အဝန်းအနေဖြင့် တရားဝင်မှုမရှိသည့်ရွေးကောက်ပွဲအတွက် စစ်ကောင်စီအား မည်သည့် နည်းပညာ၊ အထောက်အကူပစ္စည်း သို့မဟုတ် နိုင်ငံရေးအရပံ့ပိုးမှု မပေးရန်၊ ၂၀၂၀ ပြည့်နှစ် နိုဝင်ဘာတွင်ကျင်းပခဲ့သည့် ရွေးကောက်ပွဲရလဒ်ကို ကာကွယ်ရန်၊ မြန်မာနိုင်ငံတွင် ဒီမိုကရေစီပြန်လည်ထူထောင်ရန်၊ ၂၀၂၂ ခုနှစ် ကုလသမဂ္ဂ လုံခြုံရေးကောင်စီဆုံးဖြတ်ချက် ၂၆၆၉ ကို အကောင်အထည်ဖော်ရန်၊ စစ်အုပ်စုကို အရေးယူပိတ်ဆို့ရန်နှင့် အနာဂတ်ကာလတွင် စစ်မှန်သည့် ရွေးကောက်ပွဲများဖြစ်ပေါ်လာစေရန် အခြေခံအုတ်မြစ်များတည်ဆောက်ရာတွင် မြန်မာ့ဒီမိုကရေစီညွန့်ပေါင်းအဖွဲ့နှင့်အတူဆောင်ရွက်ရန် ယင်းအဖွဲ့များက တောင်းဆိုတိုက်တွန်းသည်။
“စစ်မှန်သည့်ရွေးကောက်ပွဲများသည် တရားဝင်မှုရှိသော အုပ်ချုပ်မှု၏ အခြေခံအုတ်မြစ်ဖြစ်သည့် မြန်မာပြည်သူလူထု၏ ဆန္ဒကို လွတ်လွတ်လပ်လပ်ဖော်ပြခွင့်ပေးသော၊ ပွင့်လင်းပြီး ယှဥ်ပြိုင်မှုရှိသော ပတ်ဝန်းကျင်တခုလိုအပ်သည်” ဟု ကြေညာချက်တွင် ဆိုသည်။
အာဏာသိမ်းပြီးနောက် အတိုက်အခံနိုင်ငံရေးပါတီများကို ပိတ်ပင်သည့် ပြင်းထန်သောဥပဒေ၊ နိုင်ငံရေးခေါင်းဆောင်များနှင့် ဒီမိုကရေစီအရေးတက်ကြွလှုပ်ရှားသူများကို ဖမ်းဆီးအကျဥ်းချခြင်း၊ သတင်းမီဒီယာများကို ပြင်းထန်စွာ ကန့်သတ်တားမြစ်ခြင်းနှင့် မဲစာရင်းအတွက် အခြေခံအဖြစ် စစ်အုပ်စုက ကောက်ခံထားသည့် ယုံကြည်ဖွယ်ရာမရှိသည့် သန်းခေါင်စာရင်းကောက်ယူမှုတို့အပါအဝင် လက်ရှိအခြေအနေများအောက်တွင် မြန်မာနိုင်ငံ၌ စစ်မှန်သည့် ရွေးကောက်ပွဲတခု ကျင်းပရန် မဖြစ်ကြောင်းလည်း ပြောသည်။
ထို့ပြင် ဒီမိုကရေစီနည်းကျ ရွေးကောက်ပွဲများဆိုင်ရာ နိုင်ငံတကာစံသတ်မှတ်ချက်များ သို့မဟုတ် ရွေးကောက်ပွဲသမာသမတ်ကျမှုအတွက် ကတိကဝတ်များနှင့်အညီ ဖြစ်လာနိုင်ရန်လည်း မရှိဘဲ စစ်ကောင်စီ၏ အဆိုပါလုပ်ငန်းစဥ်သည် တရားမဝင်အစိုးရတရပ်ကို အုတ်မြစ်ချပြီး တရားဝင်မှုရှိလာအောင် ကြိုးပမ်းမှုတခုထက် မပိုကြောင်းလည်း ထောက်ပြသည်။
အဆိုပါ အတုအယောင်ရွေးကောက်ပွဲသည် မြန်မာနိုင်ငံအတွက် ငြိမ်းချမ်းရေး၊ တည်ငြိမ်ရေးကို ဆောင်ကြဥ်းပေးလိမ့်မည်မဟုတ်ဘဲ ယင်းအစား သဘောထားကွဲလွဲမှုများ ပိုမိုနက်ရှိုင်းလာခြင်း၊ အင်အားသုံး တုံ့ပြန်မှုများ မြင့်တက်လာစေခြင်း၊ အာဏာရှင်အုပ်ချုပ်မှုကို ခိုင်မာစေခြင်းနှင့် စစ်အာဏာသိမ်းမှုကြောင့် ဖြစ်ပွားခဲ့ရသည့် ပဋိပက္ခကို ပိုမိုဆိုးရွားလာစေခြင်းတို့ ဖြစ်စေလိမ့်မည်ဟုလည်း ပူးတွဲကြေညာချက်တွင် ဖော်ပြထားသည်။
စစ်ကောင်စီဘက်က ယခု ၂၀၂၅ ခုနှစ်အတွင်း ရွေးကောက်ပွဲပြုလုပ်ပေးမည်ဖြစ်ကြောင်း ပြောဆိုထားဖူးသည်။ ပြီးခဲ့သည့် ဇန်နဝါရီလ ၃၁ ရက်နေ့တွင်လည်း အမျိုးသားကာကွယ်ရေးနှင့် လုံခြုံရေးကောင်စီအစည်းအဝေး(ကာ၊လုံ) ခေါ်ပြီး ရွေးကောက်ပွဲနှင့် တည်ငြိမ်အေးချမ်းရေး အကြောင်းပြချက်ဖြင့် အရေးပေါ်ကာလကို သက်တမ်းခြောက်လ ထပ်တိုးထားသည်။
လက်ရှိတွင် အမျိုးသားညီညွတ်ရေးအစိုးရ(NUG) အပါအဝင် တော်လှန်ရေးအင်အားစုများကလည်း စစ်ကောင်စီ၏ ရွေးကောက်ပွဲကို လက်မခံကြောင်း ပြောဆိုထားကြသည်။
စာတည်း – သန့်ဇော်(သန်လျင်)
ပုံအညွှန်း – စစ်ခေါင်းဆောင် မင်းအောင်လှိုင်နှင့် စစ်ကောင်စီထံ မှတ်ပုံတင်ထားသည့်ပါတီများမှ တာဝန်ရှိသူများ ၂၀၂၄ ခုနှစ် ဖေဖော်ဝါရီလအတွင်းက တွေ့ဆုံစဥ် (ဓါတ်ပုံ – CINCDS)။
#mizzima
#news
