ရခိုင်နှင့်ထိစပ်လျက်ရှိသော ပဲခူးတိုင်းရှိ မိုးထိတောင်စခန်း၊ ဧရာ၀တီတိုင်းရှိ ပွိုင့် ၂၆၃ စခန်းနှင့်ပွိုင့် ၃၆၉ စခန်းတို့ကို AA က တိုက်ခိုက်သိမ်းပိုက်လိုက်ပြီး ရခိုင်-မကွေးအစပ်ရှိ စစ်တပ်စစ်ကြောင်းများကို ချေမှုန်း
🟥 စစ်တွေလည်း AA နှင့် စစ်ကောင်စီတပ်များအကြား အပြန်အလှန် ပစ်ခတ်မှုများဖြစ်နေ
ရန်ကုန်၊ ဇန်နဝါရီ ၂၈
ရခိုင်ပြည်နှင့်ထိစပ်လျက်ရှိသော ပဲခူးတိုင်းရှိ မိုးထိတောင်စခန်း၊ ဧရာ၀တီတိုင်းရှိ ပွိုင့် ၂၆၃ စခန်းနှင့်ပွိုင့် ၃၆၉ စခန်းတို့ကို AA က တိုက်ခိုက်သိမ်းပိုက်လိုက်ပြီး ရခိုင်-မကွေးအစပ်ရှိ စစ်တပ်စစ်ကြောင်းများကို ချေမှုန်းတိုက်ခိုက်နိုင်ကြောင်း AA က ယမန်နေ့ညပိုင်း တရားဝင် သတင်းထုတ်ပြန်သည်။
AA က ရက္ခိုင်ရိုးမတောင်တန်းတစ်လျှောက်ရှိ အကြမ်းဖက်စစ်ကောင်စီ၏ လက်ကျန်စခန်းများကို တစ်ခုပြီးတစ်ခု ထိုးစစ်ဆင်တိုက်ခိုက်လျက်ရှိရာ ပဲခူးတိုင်းဘက်မှ တန်ပြန်ထိုးစစ်ဆင်တိုက်ခိုက်လျက်ရှိသောကြောင့် ပဲခူးတိုင်း-ရက္ခိုင် အစပ်နေရာများနှင့် ရက္ခိုင်ရိုးမတောင်တန်းထက်တွင် တိုက်ပွဲများမှာ နေ့တိုင်းဖြစ်ပွားလျက်ရှိကြောင်း သိရှိရသည်။
ဇန်နဝါရီလ ၂၁ ရက်နေ့ နံနက် ၆ နာရီ ၃၀ မိနစ်အချိန် ရက္ခိုင်ပြည်၊ တောင်ကုတ်မြိုနယ်နှင့်အစပ် ပဲခူးတိုင်း၊ ပန်းတောင်းမြို့နယ်အတွင်း ရက္ခိုင်ရိုးမတောင်တန်းရှိ စစ်ကောင်စီ၏ မိုးထိတောင်စခန်းကို စတင်ထိုးစစ်ဆင်တိုက်ခိုက်ခဲ့ပြီး ဇန်နဝါရီလ ၂၆ ရက်နေ့ နံနက် ၁၁ နာရီ ၁၀ မိနစ်အချိန်တွင် အပြီးသတ် သိမ်းပိုက်နိုင်ခဲ့ကြောင်း၊ စစ်ကောင်စီ၏ စစ်အသုံးအဆောင်၊ လက်နက်ခဲယမ်းနှင့် အလောင်းတချို့ကို သိမ်းဆည်းရရှိခဲ့ကြောင်း သိရှိရသည်။
အလားတူ ဇန်နဝါရီလ ၂၆ ရက်နေ့ မွန်းလွဲ ၂ နာရီ ၂၈ မိနစ်အချိန် ဧရာဝတီ-ရက္ခိုင်အစပ် (သို့) ဧရာဝတီတိုင်းအတွင်းရှိ ပွိင့် ၂၆၃ စခန်းကို AA က သိမ်းပိုက်နိုင်ခဲ့ပြီး ယင်းစခန်းကို ဇန်နဝါရီလ ၂၇ ရက်၊ မွန်းလွဲ ၁ နာရီ ၃၈ မိနစ်အချိန် လေကြောင်း၊ လက်နက်ကြီးပစ်ကူများဖြင့် ထိုးစစ်ဆင်တိုက်ခိုက်လျက်ရှိသောကြောင့် တိုက်ပွဲများ ပြင်းထန်လျက်ရှိကြောင်း သိရှိရသည်။
ထို့အတူ ဇန်နဝါရီလ ၂၁ ရက်နေ့၊ ညနေ ၅ နာရီ ၅၀ မိနစ်အချိန်တွင် ဧရာ၀တီ-ရက္ခိုင်အစပ် (သို့မဟုတ်) ဧရာ၀တီတိုင်းအတွင်းရှိ ပွိုင့် (၃၆၉) စခန်းကိုလည်း AA က တိုက်ခိုက်သိမ်းပိုက်ရရှိခဲ့ကြောင်း သိရှိရသည်။
ဇန်နဝါရီလ ၂၇ ရက်နေ့ ရခိုင်ပြည်နှင့် မကွေးတိုင်းအစပ် ငဖဲမြို့ နယ်၊ ဂုတ်စီးရိုးကျေးရွာအနီး အမ်း-ပဒါန်း ကားလမ်း တွင် စစ်ကောင်စီ၏ တမခ ၉၉ လက်အောက်ခံ ခမရ ၄၁၉ ၊ ၁၄ တပ်ရင်းတို့ ပူးပေါင်းစစ်ကြောင်းနှင့် AA တို့အကြား နာရီဝက်ခန့် တိုက်ပွဲဖြစ်ပွားခဲ့ကြောင်း၊ AA ၏ တန်ပြန်ခုခံစစ်ကို မယှဉ်နိုင်သော စစ်ကောင်စီတပ်များက ဂုတ်စီးရိုးကျေးရွာဘက်သို့ ဆုတ်ခွာသွားခဲ့ရကြောင်း၊ ဆုတ်ခွာထွက်ပြေးသွားသော စစ်ကောင်စီတပ်များကို လိုက်လံရှင်းလင်း တိုက်ခိုက်လျက်ရှိရာ စစ်သား အလောင်းနှင့် လက်နက်ခဲယမ်းအချို့ ကိုထပ်မံသိမ်းဆည်းရမိခဲ့ကြောင်း သိရှိရသည်။
AA က သိမ်းပိုက်ရန် ကျန်ရှိနေသော စစ်တွေမြို့ အနီးပတ်ဝန်းကျင်တွင်လည်း နှစ်ဖက် အပြန်အလှန် လက်နက်ကြီး၊ စနိုက်ပါ၊ ဒရုန်းပစ်ခတ်တိုက်ခိုက်မှုများမှာ နေ့တိုင်းရှိနေခဲ့ကြောင်း သိရှိရသည်။