တည်ငြိမ်အေးချမ်းရေးကူညီပေး၍ တရုတ်ကို ကျေးဇူးတင်ကြောင်း စစ်ခေါင်းဆောင်ပြော၊
တရုတ်စီမံကိန်းများ အရှိန်အဟုန်မြှင့်တင်နိုင်မည့် အခင်းအကျင်း ဖော်ဆောင်မည်ဟုဆို
001
မဇ္ဈိမ။ ။ တရုတ်အနေဖြင့် မြန်မာနိုင်ငံ၏ လွတ်လပ်ရေးနှင့် အချုပ်အခြာအာဏာတည်တံ့ခိုင်မြဲရေးအပေါ် ထောက်ခံပြီး တည်ငြိမ်အေးချမ်းရေးကို အလေးထား ကူညီပေးနေသည့်အတွက် တရုတ်အစိုးရနှင့် တရုတ်နိုင်ငံသူ၊ နိုင်ငံသားအားလုံးကို ကျေးဇူးတင်ကြောင်း စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်က ယနေ့ (ဇန်နဝါရီလ ၂၅) တက်ရောက်သည့် တရုတ်နှစ်သစ် ကူးပွဲတော် အခမ်းအနားတွင် ပြောသည်။
စစ်ကောင်စီအနေဖြင့် ဒီမိုကရေစီလမ်းကြောင်းပေါ်ပြန်လည်လျှောက်လှမ်းနိုင်ရန်အတွက် ရှေ့လုပ်ငန်းစဉ်များ အကောင်အထည်ဖော်နေရာ အောင်မြင်သည့်အရွေ့များ ဖြစ်ပေါ်လာပြီး ယင်းမှာ အိမ်နီးချင်းဖြစ်သည့် တရုတ်နိုင်ငံ၏ အားပေးကူညီမှုကြောင့်ဟုလည်း သူကဆိုသည်။
“ဆက်လက်ပြီးတော့လည်း မြန်မာနိုင်ငံ၏ ငြိမ်းချမ်းရေးလုပ်ငန်းစဉ်များနဲ့ နိုင်ငံတော်ဖွံ့ဖြိုးတိုးတက်ရေးအတွက် ဆောင်ရွက်နေသည့် လုပ်ငန်းများမှာ ကူညီဆောင်ရွက်ပေးရန် ပန်ကြားလိုကြောင်း” စစ်ခေါင်းဆောင်က ပြောသည်။
ထို့ပြင် တရုတ်၏ BRI စီမံကိန်းများ၊ စီးပွားရေးစင်္ကြံစီမံကိန်းများကိုလည်း ထည့်သွင်းပြောဆိုပြီး မြန်မာနိုင်ငံအနေဖြင့် တရုတ်နိုင်ငံနှင့် ပူးပေါင်းဆောင်ရွက်နေသည့် စီမံကိန်းများ အရှိန်အဟုန်မြှင့်တင်နိုင်မည့် အခင်းအကျင်းကို ဖော်ဆောင်မည်ဖြစ်ကြောင်း ဆိုသည်။
စစ်ကောင်စီအနေဖြင့် တရုတ် – မြန်မာ နှစ်နိုင်ငံဆက်ဆံရေး၊ နှစ်နိုင်ငံပြည်သူများအကြား ချစ်ကြည်ရင်းနှီးရေး ပိုမိုတိုးတက်ခိုင်မာအောင် အလေးအနက်ထား ဆောင်ရွက်သွားမည်ဖြစ်ကြောင်းနှင့် တရုတ်၏ ယုံကြည်စိတ်ချရသည့် မိတ်ဆွေကောင်းနိုင်ငံအဖြစ် ဆက်လက်ရပ်တည်မည်ဖြစ်ကြောင်းလည်း ပြောသည်။
အာဏာသိမ်းပြီးနောက် နိုင်ငံတကာအသိုင်းအဝိုင်းတွင် ဖယ်ကျဉ်ခံထားရသည့် စစ်ကောင်စီနှင့် တရုတ်နိုင်ငံအကြား နီးကပ်သည့်ဆက်ဆံရေးဆက်လက်ရှိနေပြီး ပြီးခဲ့သည့် ၂၀၂၄ ခုနှစ် နိုဝင်ဘာလအတွင်းကလည်း စစ်ကောင်စီခေါင်းဆောင်အနေဖြင့် တရုတ်နိုင်ငံသို့ သွားရောက်ခဲ့သည်။
တရုတ်နှစ်သစ်ကူးနေ့ကိုလည်း စစ်ကောင်စီက မြန်မာနိုင်ငံ၏ ရုံးပိတ်ရက်အဖြစ်၂၀၂၄ ခုနှစ် ဇူလိုင်လတွင် သတ်မှတ်ခဲ့သည်။ ထိုသတ်မှတ်မှုသည် တရုတ်၏ မြန်မာအပေါ် ထားသည့်ရပ်တည်ချက်ကို အသိအမှတ်ပြုကြောင်း ဖော်ပြခြင်းဖြစ်ပြီး တရုတ်၏ ဆောင်ရွက်ချက်များကို အလေးအနက်ထောက်ခံခြင်းဖြစ်ကြောင်း စစ်ကောင်စီခေါင်းဆောင်က ယခု အခမ်းအနားတွင် ပြောဆိုခဲ့သည်။
ထို့ပြင် လက်ရှိတွင် နှစ်နိုင်ငံ ချစ်ကြည်ရင်းနှီးသည့် ဆက်ဆံရေးကို မလိုလားသည့် ပြည်တွင်း၊ ပြည်ပ အဖွဲ့များက သွေးခွဲနေကြောင်း၊ ထို့ကြောင့် နှစ်နိုင်ငံတာဝန်ရှိသူများနှင့် နိုင်ငံသူ၊ နိုင်ငံသားများက အထူးဂရုစိုက်ရန်လိုသည်ဟုလည်း ၎င်းက ထည့်သွင်းပြောဆိုခဲ့သည်။
ပုံအညွှန်း – စစ်ကောင်စီခေါင်းဆောင်နှင့် ဇနီးဖြစ်သူအား ရန်ကုန်တွင် ယနေ့ (ဇန်နဝါရီ ၂၅)ပြုလုပ်သည့် တရုတ်နှစ်သစ်ကူး အခမ်းအနားတက်ရောက်မှုအား တွေ့ရစဥ်
—————————————–