ဧရာဝတီတိုင်းအတွင်း တပ်ရင်းတွေအလိုက် ပြုတ်ပြုတ်ပြုန်း ထားတာကြောင့် စစ်ကောင်စီ တွေ့သမျှလူ ဆွဲခေါ်ကာ လုံခြုံရေးယူခိုင်းနေ
ဇန်နဝါရီ ၃၊ ၂၀၂၅
ရခိုင်ပြည်နယ်မှာ အကြီးအကျယ် ရှုံးနိမ့်ထားတဲ့ စစ်ကောင်စီဟာ ဧရာဝတီတိုင်းအတွင်း ရခိုင်နဲ့ ထိစပ်နေတဲ့ မြို့နယ်တွေမှာ လုံခြုံရေးတင်းကြပ်ကာ ခံစစ်အတားအဆီးတွေ လုပ်ဆောင်နေပါတယ်။
တကယ်တမ်း ဧရာဝတီတိုင်းထဲက စစ်အင်အားတွေကိုလည်း ရခိုင်တိုက်ပွဲတွေဆီ စစ်လွှတ်ကာ ဆုံးရှုံးခဲ့ရတဲ့ စစ်ကောင်စီဟာ အခုလို ဧရာဝတီတိုင်းအတွက် လုံခြုံရေးတင်းကြပ်ရာမှာ စစ်ရေးအကြောင်း သေချာမသိတဲ့ အရပ်သားတွေ၊ မီးသတ်တွေကို ဖိအားပေး စေခိုင်းနေတယ်လို့ သိရပါတယ်။
စစ်ကောင်စီအတွက် အာရက္ခတပ်တော် AA နဲ့ ထိပ်တိုက်ရင်ဆိုင်ရတဲ့ ရခိုင်ဒေသ တိုက်ပွဲတွေဟာ ရခိုင်မှာ ဆုံးရှုံးရုံသာမက ဧရာဝတီတိုင်းက အနောက်တောင်တိုင်း စစ်ဌာနချုပ် (နတခ) လက်အောက်ခံ တပ်ရင်းတပ်ဖွဲ့ အင်အားတွေလည်း အလုံးအရင်းနဲ့ လျော့ကျသွားတာ ဖြစ်ပါတယ်။
မောင်းအနေနဲ့ စုံစမ်းကြည့်ရသလောက် ကျုံပျော်အခြေစိုက် အမှတ် ၃၆ ခြေလျင်တပ်ရင်း (ခလရ ၃၆) ဟာ ရခိုင်ပြည်နယ် ရမ်းဗြဲတိုက်ပွဲအတွင်း လေယာဉ်ပေါ်က ဆင်းပြီး မကြာခင်မှာပဲ တော်လှန်ရေးတပ်ဖွဲ့တွေရဲ့ တိုက်ခိုက်ခြင်းခံရကာ တပ်ရင်းတစ်ရင်းလုံး ကုန်လုနီးပါး ဖြစ်ခဲ့တယ်လို့ သိရပါတယ်။
ဒါ့အပြင် ဟင်္သာတအခြေစိုက် ခလရ ၁၈၊ ပုသိမ်အခြေစိုက် ခလရ ၃၈၊ မြန်အောင်အခြေစိုက် ခလရ ၅၁၊ အိမ်မဲအခြေစိုက် ခလရ ၆၃၊ မြောင်းမြအခြေစိုက် ခလရ ၉၃၊ ပုသိမ်အခြေစိုက် ခမရ ၂၇၁ နဲ့ သာပေါင်းအခြေစိုက် ခမရ ၃၀၈ တပ်တွေဟာ AA ရဲ့ ဂွမြို့သိမ်းတိုက်ပွဲ အပါအဝင် ရခိုင်ဒေသ စစ်ပွဲတွေမှာ တပ်ရင်းအလိုက် ဖွဲ့စည်းပုံပျက်ကာ သေဆုံးမှုတွေ များခဲ့တယ်လို့ သိရပါတယ်။
မအူပင်အခြေစိုက် အမှတ် ၂၇ ခြေလျင်တပ်ရင်း (ခလရ ၂၇) ဟာလည်း ရှမ်းပြည်နယ် နောင်ချိုတိုက်ပွဲမှာ တပ်ရင်းလိုက် ဖွဲ့စည်းပုံပျက်ကာ ထိခိုက်ဒဏ်ရာရသူတချို့သာ ဧရာဝတီတိုင်းထဲကို ပြန်ရောက်လာခဲ့တယ်လို့ နတခ မှာရှိတဲ့ သတင်းရင်းမြစ်တွေအပြင် တပ်ရင်းတွေနဲ့ နီးစပ်တဲ့ သတင်းရင်းမြစ်တွေက ပြောပါတယ်။
အနောက်တောင်တိုင်း စစ်ဌာနချုပ် (နတခ) လက်အောက်ခံ တပ်ရင်း ၁၀ ရင်းထက်မနည်း ရှိခဲ့တဲ့အထဲမှာ တပ်ရင်း ၇ ရင်းလောက်က ရှေ့တန်းစစ်မျက်နှာမှာ ဖွဲ့စည်းပုံပျက်ပြီး မသန်စွမ်းတွေနဲ့ နောက်ချန်အင်အားတွေသာ ရှိတော့တယ်လို့ သိရပါတယ်။
ဒါကြောင့် ဧရာဝတီတိုင်းကို ရခိုင်ဘက်ကနေ စစ်မီးကူးလာမှာ ကြောက်နေတဲ့ စစ်ကောင်စီဟာ အကြောင်းအမျိုးမျိုးပြ ဖမ်းဆီးထားတဲ့ အရပ်သားတွေနဲ့ စစ်တပ်ထဲက သတင်းပေးတွေကို လှည့်ကင်းနဲ့ စစ်တပ်လုံခြုံရေးအဖြစ် ပြန်လည်အသုံးပြုနေတယ်လို့ သိရပါတယ်။
ပြီးခဲ့တဲ့ ဒီဇင်ဘာ ၁၈ ရက်နေ့မှာ မင်းအောင်လှိုင်က ဧရာဝတီတိုင်း ပုသိမ်မြို့အခြေစိုက် အနောက်တောင်တိုင်း စစ်ဌာနချုပ် တိုင်းမှူးနေရာကို အပြောင်းအလဲ ပြုလုပ်ခဲ့ပြီး ဒုစစ်ခေါင်းဆောင် စိုးဝင်းကလည်း ရခိုင်ပြည် ဂွမြို့မှာ တိုက်ပွဲပြင်းထန်နေစဉ် ဒီဇင်ဘာ ၂၇ ရက်မှာ ပုသိမ်ကို သွားရောက်ခဲ့ပါသေးတယ်။
ဖွဲ့စည်းပုံပျက်ပြားပြီး ဖရိုဖရဲဖြစ်နေတဲ့ ဧရာဝတီတိုင်းထဲက စစ်တပ်အသိုင်းအဝိုင်းကို ဒုစစ်ခေါင်းဆောင် စိုးဝင်းက စိတ်ဓာတ်မြှင့်တင်ရေး လုပ်ရင်း AA ဝင်လာရင် တုံ့ပြန်နိုင်ရေး ပြင်ဆင်ထားဖို့လည်း မှာကြားခဲ့ပါတယ်။ အဲ့လိုမျိုး စိုးဝင်း ရောက်ရှိကာ သူ့စစ်တပ်ကို စိတ်ခွန်အားပေးနေချိန်မှာပဲ ရခိုင်ကို အပို့ခံရမယ့် ဧရာဝတီတိုင်းထဲက စစ်သားတချို့ ထွက်ပြေးခဲ့ကြသေးတယ်လို့ သိရပါတယ်။
အခုဆိုရင် စစ်ကောင်စီက ဧရာဝတီတိုင်းထဲ AA ဝင်လာမှာကို ကြောက်လန့်နေပေမယ့် ဖရိုဖရဲဖြစ်နေတဲ့ တပ်ရင်းတွေကို ပြန်စုစည်းဖို့ မလုပ်နိုင်တော့ဘဲ အရပ်သားပြည်သူတွေ အပါအဝင် ရသမျှလူ ဆွဲခေါ်ပြီး လုံခြုံရေးတာဝန်ယူခိုင်းနေတာပဲ ဖြစ်ပါတယ်။
ပုံစာ – ၂၀၂၄ ဒီဇင်ဘာလအတွင်း ပုသိမ်မြို့ကို ဒုစစ်ခေါင်းဆောင် စိုးဝင်း လာရောက်ခဲ့စဉ်
