မိတ္ထီလာမှာ သားအမိနှစ်ဦး သတ်ဖြတ်ခံရမှု သမီးရည်းစား အဆက်ဖြတ်တာ မကျေနပ်လို့ သတ်ဖြတ်ဟုဆို၊
ရပ်ကွက်က ဝိုင်းဖမ်းလို့ ကျူးလွန်သူ သုံးဦးကို ဖမ်းမိ၊
ဒေါ်လာ/MFP၊ ဒီဇင်ဘာ – ၃၀
မန္တလေးတိုင်း၊ မိတ္ထီလာမြို့မှာ မနေ့က ညဦးပိုင်းအချိန် သားအမိ နှစ်ဦးတည်း ရှိနေတဲ့ နေအိမ်ကို လူသုံးဦးက ဝင်ရောက်ပြီး အိမ်ရှင် သားအမိနှစ်ဦး စလုံးကို ဓားနဲ့ထိုး သတ်ဖြတ်ခဲ့မှုဟာ သမီးရည်းစား ကိစ္စကြောင့် ဖြစ်တယ်လို့ စစ်အုပ်စု ရဲမှတ်တမ်းမှာ ဖော်ပြပါတယ်။
ဒီဇင်ဘာလ ၂၉ရက် ည ၇နာရီကျော်အချိန်က မိတ္တီလာမြို့၊ ကျီတော်ကုန်းရပ်ကွက်၊ ဝမ်းတော်ပြည့်တိုးချဲ့ နယ်မြေ ၈ က နေအိမ်မှာ အမျိုးသမီး နှစ်ဦးတည်း ရှိနေချိန် လူငယ်သုံးဦးက ဝင်ရောက် သတ်ဖြတ်ခဲ့တာ ဖြစ်ပါတယ်။
သေဆုံးသူတွေဟာ ဒေါ်တင်မာဝင်း၊ ၅၃ နှစ်နဲ့ သမီးဖြစ်သူ မခိုင်ယဉ်ထွေး၊ ၁၉ နှစ်တို့ ဖြစ်ပြီး သတ်ဖြတ်သူတွေဟာ တောင်သာမြို့နယ်၊ သဘွတ်စုကျေးရွာအုပ်စုနေ ခန့်ဇော်ဟိန်း ၁၇ နှစ်၊ တပ်ကုန်းမြို့၊ ဆရာစံရပ်ကွက်၊ နယ်မြေ ၄ နေ စွမ်းပြည့်ပိုင် ၂၀ နှစ်နဲ့ တပ်ကုန်းမြို့ ဘုရင့်နောင်ရပ်ကွက်နေ ထက်မင်းခန့် ၂၂ နှစ်တို့ ဖြစ်တယ်လို့ စစ်အုပ်စု ရဲမှတ်တမ်းမှာ ဖော်ပြပါတယ်။
အဲ့ဒီ သတ်ဖြတ်မှုနဲ့ ပတ်သက်ပြီး ကျူးလွန်သူတွေကို ရပ်ကွက်က ဝိုင်းဖမ်းပြီး ရဲလက်အပ်လို့ ရဲက စစ်ဆေး မေးမြန်းရာ သမီးရည်းစားကိစ္စ အဆက်ဖြတ်သွားရာက အခုလို လူသတ်မှု ဖြစ်ပွားကြောင်း ကျူးလွန်သူတွေက ထွက်ဆိုတယ်လို့ စစ်အုပ်စုက ဆိုပါတယ်။
“၎င်းတို့အား မေးမြန်ခဲ့ရာ ယင်းနေ့ ည ၇ နာရီအချိန်တွင် စွမ်းပြည့်ပိုင်မှ သစ်သားရိုးတပ် အရိုးအသွား ရှစ်လက်မ ခန့်ရှိ ဓါးဦးချွန် တစ်ချောင်းအား အသင့် ကိုင်ဆောင်၍ လည်းကောင်း၊ ခန့်ဇော်ဟိန်းမှ သံရိုးတပ် အရိုးအသွား ၁၂ လက်မခန့်ရှိ ဓါးဦးချွန် တစ်ချောင်းအား အသင့်ကိုင်ဆောင်၍ လည်းကောင်း၊ ထက်မင်းခန့် နှင့်အတူ ၎င်းတို့ သုံးဦးသည် စွမ်းပြည့်ပိုင်နှင့် လွန်ခဲ့သော နှစ်လခန့်က လူငယ်သဘာဝ ချစ်ကြိုက်ခဲ့ကြပြီး အဆက်အသွယ် ဖြတ်သွားခဲ့သည့် မခိုင်ယဥ်ထွေး အား မကျေနပ်သဖြင့် ၎င်း၏ နေအိမ်သို့ သွားရောက်ခဲ့ကြောင်း၊ မခိုင်ယဥ်ထွေး၏ နေအိမ်သို့ ရောက်ရှိစဥ် နေအိမ်တံခါး ဖွင့်ခိုင်းရာ ဒေါ်တင်မာဝင်း မှ တံခါးဖွင့်ပေးသဖြင့် နေအိမ်ဧည့်ခန်းအတွင်း စကားများ ရန်ဖြစ်ရာ ဒေါ်တင်မာဝင်း က ပတ်ဝန်းကျင်သို့ အော်ဟစ် အကူအညီ တောင်းခဲ့သောကြောင့် စွမ်းပြည့်ပိုင် က အသင့်ပါလာသော ဓါးဖြင့် မခိုင်ယဥ်ထွေး အား ထိုးသတ်ခဲ့ကြောင်း၊ ခန့်ဇော်ဟိန်းက ဒေါ်တင်မာဝင်းအား ထိုးသတ်ခဲ့ပြီး ထက်မင်းခန့်မှ ဝိုင်းဝန်းချုပ်နှောင် ပေးခဲ့ခြင်းဖြစ်ကြောင်း ၎င်းတို့၏ ထွက်ဆိုချက် အရ သိရသည်” လို့ စစ်အုပ်စု ရဲမှတ်တမ်းမှာ ဖော်ပြပါတယ်။
မိခင်ဖြစ်သူ ဒေါ်တင်မာဝင်းမှာ ယာလည်ပင်းပြတ်ရှဒဏ်ရာ၊ ဝမ်းဗိုက်အလယ် ထိုးသွင်းဒဏ်ရာ သုံးချက်၊ ရင်ညွန့် ထိုးသွင်းဒဏ်ရာ တစ်ချက်၊ ဝဲ-လက်ခလယ် ပြတ်ရှဒဏ်ရာ၊ ဝဲ-နံစောင်းထိုးသွင်းဒဏ်ရာ တစ်ချက်၊ စုစုပေါင်း ဓားဒဏ်ရာ ခုနှစ်ချက်၊ သမီးဖြစ်သူ မခိုင်ယဉ်ထွေးမှာ ဝဲ-ရင်အုံ ထိုးသွင်းဒဏ်ရာ နှစ်ချက်၊ ဝဲ-နံစောင်းထိုးသွင်းဒဏ်ရာ တစ်ချက်၊ ဆီးခုံပေါ်ပြတ်ရှဒဏ်ရာ တစ်ချက်၊ နောက်ကျော ထိုးသွင်းဒဏ်ရာ သုံးချက်၊ ဝဲ/ယာခါးထိုးသွင်းဒဏ်ရာ နှစ်ချက်၊ ဝဲ-ပေါင်ရင်း ပြတ်ရှဒဏ်ရာ တစ်ချက်၊ စုစုပေါင်း ဓားဒဏ်ရာ ၁၀ ချက်နဲ့ နေိအိမ်ဧည့်ခန်း ထဲမှာပဲ သေဆုံးခဲ့တယ်လို့ ဆိုပါတယ်။
မိတ္ထီလာမြို့ဟာ စစ်အုပ်စုနဲ့ ပျူစောထီးတွေ ကြီးစိုးထားတဲ့ မြို့ဖြစ်ပြီး မိတ္ထီလာမှာ စစ်အုပ်စုရဲ့ အမှတ် ၉၉ ခြေမြန်တပ်မ ဌာနချုပ် (တပ်မ ၉၉)နဲ့ ရှမ်းတဲလေတပ်စခန်း အပါအဝင် စစ်အုပ်စု တပ်ရင်းတပ်ဖွဲ့ ၄၀ ကျော် အခြေပြုထားတဲ့ မြို့ဖြစ်ပါတယ်။ မိတ္ထီလာမြို့ပေါ် နေထိုင်သူ အများစုဟာ စစ်အုပ်စု လက်အောက်ခံတွေ၊ စစ်အုပ်စုနဲ့ ပတ်သက်ဆယ်နွှယ်သူတွေ ဖြစ်တယ်လို့ မြို့ခံတွေက ပြောပါတယ်။
စစ်အာဏာသိမ်းပြီးနောက်ပိုင်း မိတ္ထီလာ အပါအဝင် မန္တလေးတိုင်းအတွင်း လူသတ်မှု၊ လုယက်မှု၊ ဓားပြမှုတွေ ဆက်တိုက် ဖြစ်ပွားနေပြီး စစ်အုပ်စု ဖွဲ့စည်းထားတဲ့ ပြည်သူ့စစ် အမည်ခံ ပျူစောထီးနဲ့ သွေးသောက်တွေ ကိုယ်တိုင်ကလည်း လူသတ်မှု၊ လုယက်မှု၊ ဓားပြမှုတွေ ကျူးလွန်နေတာ ဖြစ်ပါတယ်။