နေပြည်တော်တွင် မင်းအောင်လှိုင်နှင့် ဗိုလ်ချုပ်များ ရယူထားသော မြေကွက်များအနီး အဆင့်မြင့် အိမ်ရာစီမံကိန်း ၃ ခု တည်ဆောက်ရေး ရင်းနှီးမြှုပ်နှံသူများကို စစ်ကောင်စီက ဖိတ်ခေါ်
ရန်ကုန်၊ဒီဇင်ဘာ ၁၅
နေပြည်တော်၊ ဇမ္ဗူသီရိမြို့နယ်အတွင်း မင်းအောင်လှိုင်နှင့် ဗိုလ်ချုပ်များ ရယူထားသော မြေကွက်များအနီးတွင် အဆင့်မြင့် အိမ်ရာစီမံကိန်း ၃ ခု တည်ဆောက်ရေး ရင်းနှီးမြှုပ်နှံသူများကို စစ်ကောင်စီက ဖိတ်ခေါ်ထားသည်။
နေပြည်တော် ဇမ္ဗူသီရိမြို့နယ်အတွင်းရှိ မြေဧက ၁၀၀ နီးပါးတွင် အဆင့်မြင့် အိမ်ရာစီမံကိန်း ၃ ခု တည်ဆောက်ရန် လုပ်ငန်းရှင်နှင့် ကုမ္ပဏီများကို ဒီဇင်ဘာလ ၃၁ ရက်နေ့ နောက်ဆုံးထားလျှောက်ရန် စစ်ကောင်စီက ဖိတ်ခေါ်နေခြင်းဖြစ်သည်။
နေပြည်တော်၊ ပျဉ်းမနား – တောင်ညိုလမ်း၏ အရှေ့ဘက် သုခတော်ဝင်အိမ်ရာအနီး မြေဧရိယာ ၃၀ ဧကခန့်ရှိ စီမံကိန်းနေရာ ၁ ၊ ပျဉ်းမနား- တောင်ညိုလမ်း၏ အရှေ့ဘက်၊ DENKO စက်သုံးဆီအရောင်းဆိုင်အနီး၊ မြေဧရိယာ ၃၀ ဧကခန့်ရှိ စီမံကိန်းနေရာ၂ နှင့် ဓနသိဒ္ဓိရပ်ကွက်၊ တော်ဝင်သီရိလမ်း၏ အနောက်ဘက်၊ သံတမန်ဇုန်အနီး၊ မြေဧရိယာ ၃၀ ဧကခန့်ရှိ စီမံကိန်းနေရာ ၃ တို့တွင် အဆင့်မြင့်အိမ်ရာစီမံကိန်း ၃ ခုကို တည်ဆောက်မည်ဖြစ်ကြောင်း သိရှိရသည်။
အဆိုပါ အိမ်ရာများကို အလုံးစုံ ရင်းနှီးမြှုပ်နှံတည်ဆောက်ရန် Developer လုပ်ငန်းရှင်/ကုမ္ပဏီများကို စစ်ကောင်စီက ဖိတ်ခေါ်ထားသော် လည်း ယင်းပတ်ပတ်လည်ရှိ မြေကွက်များကို စစ်ကောင်စီ၏ ဗိုလ်ချုပ်များက ရယူထားပြီးဖြစ်ကြောင်း နေပြည်တော်အခြေစိုက် အိမ်ခြံမြေအကျိုးဆောင်တစ်ဦးက ဆိုသည်။
“အခု စီမံကိန်း ၁ ၊ စီမံကိန်း ၂ နဲ့ စီမံကိန်း ၃ လုပ်မယ့်နေရာတွေက အရင် ဗိုလ်ချုပ်တွေရော အခု ဗိုလ်ချုပ်တွေရော မြေကွက်တွေက နေရာဦးပြီးသားနေရာတွေပါ။ ဥပမာ- သံတမန်ဇုန် ပတ်ပတ်လည်ဆိုရင် ကြံ့ခိုင်ရေး ဗိုလ်ချုပ်တွေနဲ့ လက်ရှိ ဗိုလ်ချုပ်ကြီးတွေရဲ့ မြေကွက်တွေ ၊ ပေ ၁၀၀ ပတ်လည်ကစလို့ ဧကချီပြီး ယူထားကြတာ။ ဦးထားကြတာ။ သူတို့ ယူလို့ ရပြီးတော့မှ အဲဒီအနားတွေမှာ စီမံကိန်းလုပ်တာပါ” ဟု နေပြည်တော်အခြေစိုက် အိမ်ခြံမြေအကျိုးဆောင်တစ်ဦးက ဆိုသည်။
အကြမ်းဖက်စစ်ကောင်စီတပ်မှ ဗိုလ်ချုပ်များ ရယူထားသော မြေကွက်များသည် စီမံကိန်းနေရာဖြစ်သော အချက်အချာကျသည့် နေရာများဖြစ်၍ အမှန်တကယ် စီမံကိန်းများ အသက်ဝင်လာပါက သိန်းသောင်းချီ တန်ကြေးရှိမည်ဖြစ်ကြောင်း နေပြည်တော်အိမ်ခြံမြေစျေးကွက် ကျွမ်းကျင်သူများက ဆိုကြသည်။
“ဒီသံတမန်ဇုန်ဆိုတာက သံရုံးနဲ့ သံအမတ်နေအိမ်မြေနေရာတွေ။ အဲဒါတွေက အကောင်အထည်လည်းဖော်နေတယ်။ တကယ်တမ်းသံရုံးတွေ ဖွင့်လာရင် အဲဒီနေရာတွေက အရမ်းတန်ကြေးတက်မယ့်နေရာတွေ။ ပြောချင်တာက နေပြည်တော်မှာ မြေကွက်တွေကတော့ ဗိုလ်ချုပ်နဲ့ သူတို့ အသိုင်းအ၀ိုင်းလွတ်တဲ့မြေကွက်ဆိုတာမျိုးမရှိဘူးလို့တောင် ပြောရမယ်” ဟု နေပြည်တော် အိမ်ခြံမြေစျေးကွက်ကျွမ်းကျင်သူက ရှင်းပြသည်။
သို့ရာတွင် အကြမ်းဖက်စစ်ကောင်စီက NLD အစိုးရလက်ထက် သမ္မတဦးဝင်းမြင့် အပါအဝင် NLD အစိုးရဝန်ကြီးများ အတွက် ချထားပေးခဲ့သည့် နေပြည်တော်ဥတ္တရသီရိနှင့် ဒက္ခိဏသီရိမြို့နယ်များရှိ မြေကွက် ၃၆ ကွက်၏ နှစ် ၃၀ မြေငှားစာချုပ်ဂရန်များကို ပယ်ဖျက်ကြောင်း နိုဝင်ဘာ၂၇ ရက်နေ့ထုတ် စစ်ကောင်စီဝါဒဖြန့် သတင်းစာတွင် ကြေညာခဲ့သည်။
ဓာတ်ပုံ- အကြမ်းဖက် မင်းအောင်လှိုင်နှင့် ကြူကြူလှ။
