ပုသိမ်မြို့ ၊အမှတ် ၆ စစ်အခြေခံလေ့ကျင့်ရေးတပ်မှ စစ်မှုထမ်း အပတ်စဉ် ၅ သင်တန်းဆင်း တပ်သားသစ်များကို ရှမ်းပြည်နယ်သို့ ပို့ဆောင်စဉ် မိုင်းဆွဲ တိုက်ခိုက်ခံရပြီး တပ်သားသစ် ၈ ဦးသေဆုံး
ရန်ကုန်၊ ဒီဇင်ဘာ ၁၁
ဧရာဝတီတိုင်း၊ ပုသိမ်မြို့ အမှတ် ၆ စစ် အခြေခံ လေ့ကျင့်ရေးတပ်မှ စစ်မှုထမ်း အပတ်စဉ် ၅ သင်တန်းဆင်း တပ်သားသစ်များကို ရှမ်းပြည်နယ်သို့ ပို့ဆောင်စဉ် မိုင်းဆွဲ တိုက်ခိုက်ခံရပြီး တပ်သားသစ် ၈ ဦးသေဆုံးခဲ့ကြောင်း ပုသိမ် သတင်းအထူးတပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြော ဆိုသည်။
ဒီဇင်ဘာလ ၇ ရက်နေ့ ပုသိမ်မြို့-အမှတ် ၆ စစ်အခြေခံ လေ့ကျင့်ရေးတပ် (ရွှေမြင်တင်) မှ ဗိုလ်ကြီး ကျော်ငွေ နှင့် ဗိုလ်ကြီး ဇော်ဇော် တို့ ဦးစီး သင်ကြားသော စစ်မှုထမ်း အပတ်စဉ် ၅ မှ သင်တန်းဆင်း တပ်သားများကို ရှမ်းပြည်နယ်သို့ ပို့ဆောင်စဉ် လမ်း တွင် မိုင်းဆွဲခံရပြီး ၈ ဦးသေဆုံးခဲ့ကြောင်း သိရသည်။
သေဆုံးသူ စစ်မှုထမ်းတပ်သားသစ် ၈ ဦးသည် ကန်ကြီးထောင့်မြို့နယ်မှ စစ်မှုထမ်းတပ်သားသစ် ၃ ဦး၊ မြောင်းမြမြို့နယ်မှ ၁ ဦး၊ ဝါးခယ်မမြို့နယ်မှ ၂ ဦး၊ ရေကြည်မြို့နယ်မှ ၂ ဦး တို့ဖြစ် ကြောင်း သိရှိရသည်။
အဆိုပါ အပတ်စဉ် ၅ သင်တန်းဆင်း ကျောင်းသားများကို နိုဝင်ဘာလ ၂၉ ရက်နှင့် ၃၀ ရက်နေ့တို့တွင် ခမရ-၁၀၄ (ကျိုက်မရော) ၊ ခမရ-၂၀၈ (မော်လမြိုင်) ၊ခမရ-၅၅၅ (ကရသူရိ) ၊ ရခိုင်ပြည်နယ်နှင့် ရှမ်းပြည်နယ်တို့ကို အင်အားများခွဲ၍ ပို့ဆောင်ခဲ့ပြီး တပ် သား သစ်များကို မိခင်တပ်ရင်း အဖြစ် ခံယူစေကာ ရှေ့တန်းပို့ပြီး ကျန်အင်အားများကို တပ်ရင်းတွင် ကင်းစောင့်ခိုင်းကြောင်း သိရသည်။
“သေဆုံးသူ ၈ ဦးထဲမှာ စစ်မှုထမ်း တပ်သားသစ် အဖြစ် စုဆောင်းခံရသူနဲ့ အခကြေးငွေနဲ့ အစားထိုးခံသူတွေပါတယ်။ ရှမ်း ပြည်နယ် လမ်းပိုင်းတစ်ခုမှ မိုင်းဆွဲ ခံရတာလို့ သိရတယ်။ ၇ ရက်နေ့ မိုင်းဆွဲခံရတာ” ဟု ပုသိမ် သတင်းအထူးတပ်ဖွဲ့မှ တာဝန်ရှိသူ တစ်ဦးက ပြောဆိုသည်။
ဓာတ်ပုံ- ကရင်နီတွင် မိုင်းဆွဲခံထားရသော အကြမ်းဖက်စစ်ကောင်စီတပ်၏ စစ်ကားတစ်စီး။ (ပုံအဟောင်းဖြစ်ပါသည်။)
