ရွေးကောက်ပွဲကျင်းပပြီး အာဏာလွှဲအပ်မယ်၊ စစ်မြေပြင်မှာ အသက်နဲ့လဲ တာဝန်ထမ်းကြပါ ဟု ဗိုလ်လောင်းတွေကို မင်းအောင်လှိုင်ပြော
ဒီဇင်ဘာ ၈၊ ၂၀၂၄
နိုင်ငံအတွက် စစ်မြေပြင်မှာ အသက်နဲ့လဲပြီး တာဝန်ထမ်းဆောင်ပေးဖို့ အာဏာသိမ်းစစ်ခေါင်းဆောင် မင်းအောင်လှိုင်က ပြောကြားလိုက်ပါတယ်။
မန္တလေးတိုင်း၊ ပြင်ဦးလွင်မှာ ကျင်းပပြုလုပ်ခဲ့တဲ့ စစ်တက္ကသိုလ် ဗိုလ်လောင်းသင်တန်းအမှတ် ၆၆ သင်တန်းဆင်းပွဲမှာ မင်းအောင်လှိုင်က အခုလို ထည့်သွင်းပြောကြားခဲ့တာပါ။
ပြင်ဦးလွင်စစ်တက္ကသိုလ်သင်တန်းဆင်းပွဲ တက်ရောက်ခဲ့တဲ့ စစ်ခေါင်းဆောင် မင်းအောင်လှိုင်က သင်တန်းဆင်း ဗိုလ်လောင်းတွေကို နိုင်ငံတကာစစ်ပွဲဆိုင်ရာဥပဒေတွေနဲ့ ထိတွေ့တိုက်ခိုက်တဲ့ စည်းမျဉ်းတွေ လိုက်နာဖို့လည်း ပြောကြားခဲ့ပါတယ်။
မြေပြင်မှာ စစ်ကြောင်းထိုး၊ အရပ်သားလူနေအိမ်တွေကို မီးရှို့ဖျက်ဆီးပြီး အကြောင်းမဲ့ ဖမ်းဆီးနေတဲ့ စစ်ကောင်စီက သင်တန်းဆင်းဗိုလ်လောင်းတွေကို နိုင်ငံတကာစည်းမျဉ်းတွေ လိုက်နာဖို့ မင်းအောင်လှိုင်က ပြောကြားခဲ့တာပါ။
အချိန်အခါမရွေး ၊ ဒေသမရွေး ၊ ရာသီဥတုမရွေး တာဝန်ထမ်းဆောင်ကြရမှာဖြစ်လို့ တပ်ဖွဲ့ဝင်တွေအနေနဲ့ ကိုယ်ခန္ဓာကျန်းမာကြံ့ခိုင်မှုရှိကြဖို့လည်း မင်းအောင်လှိုင်က တိုက်တွန်းပြောကြားပါတယ်။
ဗိုလ်လောင်းသင်တန်းဆင်းတွေကို ရွေးကောက်ပွဲပြန်လည်ကျင်းပပေးမယ်လို့ ထည့်သွင်းပြောကြားခဲ့ ပြီး ရွေးကောက်ပွဲက ထွက်ပေါ်လာတဲ့အစိုးရကို နိုင်ငံတော် တာဝန်တွေလွှဲအပ်နိုင်ရေး ဆက်လက် လုပ်ဆောင်ရာမှာ ကျရာအခန်းကဏ္ဍကနေ ပါဝင်ဆောင်ရွက်သွားဖို့လည်း မင်းအောင်လှိုင်ကပြောကြားခဲ့ပါတယ်။
