စစ်အာဏာရှင်တိုက်ပွဲတွေအတွင်း ရေစကြိုပကဖမှ ရဲဘော် ၁၈ဦးကျဆုံး
ဟာနာဆန်/People’s Spring
စစ်ကောင်စီကို တော်လှန်နေတဲ့ ရေစကြိုပကဖအဖွဲ့မှာ အာဏာသိမ်းကာလတလျှောက် တိုက်ပွဲများအတွင်းမှာ ရဲဘော် ၁၈ဦးအထိ ကျဆုံးခဲ့ရကြောင်း ပြည့်သူကာကွယ်ရေးတပ်ဖွဲ့ – ရေစကြိုမြို့နယ်(ပ.က.ဖ)က သတင်းထုတ်ပြန်ပါတယ်။
မကွေးတိုင်း၊ မြိုင်မြိို့နယ်၊ လင်းကတောနယ်မြေရဲစခန်း စခန်းသိမ်းတိုက်ပွဲမှာ ကျဆုံးခဲ့ရတဲ့ ရဲဘော်များ တစ်နှစ်ပြည့် အခမ်းအနားကို ရေစကြိုမြို့နယ်တနေရာမှာ ဒီနေ့(ဒီဇင်ဘာ၇ရက်) မနက်ပိုင်းက ပြုလုပ်ခဲ့တယ်လို့ ရေစကြိုပကဖက သတင်းထုတ်ပြန်ပါတယ်။
ပြီးခဲ့တဲ့ ၂၀၂၃ ဒီဇင်ဘာ ၇ ရက်က မြိုင်မြို့နယ်၊ လင်းကတောနယ်မြေရဲစခန်း စခန်းသိမ်းတိုက်ပွဲမှာ စခန်းသိမ်းခါနီး လေကြောင်းတိုက်ခိုက်ခံရလို့ ရေစကြိုပကဖအဖွဲ့နဲ့ တခြားမဟာမိတ်အဖွဲ့တွေက စုစုပေါင်း ရဲဘော်(၇)ဦးအထိ ကျဆုံးခဲ့ပါတယ်။ ရဲဘော်တွေကျဆုံးမှု တစ်နှစ်ပြည့်အထိမ်းအမှတ်အနေနဲ့ အခမ်းအနားပြုလုပ်ခဲ့တာလို့ သိရပါတယ်။
ရေစကြိုပကဖအနေနဲ့ အာဏာသိမ်းကာလတလျှောက် တိုက်ပွဲတွေမှာ ရဲဘော်(၁၈)ဦးအထိ ကျဆုံးခဲ့တယ်လို့ ရေစကြိုပကဖက အသိပေးပါတယ်။
“လင်းကတောတုန်းက အားလုံးပေါင်းကျတာ ၇ ဦးပါ။ ကျွန်တော်တို့တပ်ဖွဲ့ကတော့ ၃ ဦးပေါ့။ ကျန်တာတွေကတော့ တိုက်ပွဲအသီးသီးမှာ ကျဆုံးခဲ့တာပါ။ စခန်းသိမ်းတိုက်ပွဲတွေ၊ စစ်ကြောင်းအသီးသီးမှာ ကြားဖြတ်တိုက်ခိုက်တာတွေမှာ ကျခဲ့တာပါ။အစုလိုက်အပြုံလိုက်ကျတာကတော့ လင်းကတောနယ်မြေမှာ ဂျက်ဖိုက်တာနဲ့ Air Strike လုပ်လို့ ၇ ယောက်လုံး တပ်စိတ်တစ်စိတ်လုံးကျတာ အများဆုံးပေါ့။”လို့ ရေစကြိုပကဖအဖွဲ့ ပြန်ကြားရေးတာဝန်ခံက ပြောပါတယ်။
ဒီကနေ့အခမ်းအနားမှာ အမျိုးသားညီညွတ်ရေးအစိုးရ(NUG)အလံတော်အား အလေးပြုခြင်း၊
ခေတ်အဆက်ဆက် ဖက်ဒရယ်ဒီမိုကရေစီတိုက်ပွဲတွေမှာ ကျဆုံးခဲ့ရတဲ့ ရဲဘော်များအားအလေးပြုခြင်း၊ ပြည်သူ့ကာကွယ်ရေးတပ်ဖွဲ့ – ရေစကြိုမြို့နယ်(ပ.က.ဖ)မှာ တာဝန်ထမ်းဆောင်ရင်း ကျဆုံးခဲ့ရတဲ့ ရဲဘော်(၁၈)ဦးကို ဂုဏ်ပြုအလေးပြုခြင်း၊လင်းကတောနယ်မြေခန်းသိမ်းတိုက်ပွဲမှာ ကျဆုံးခဲ့ရတဲ့ ရဲဘော်များ တစ်နှစ်ပြည့်ခြင်းအတွက် အလံတစ်ဝက်လွှင့်ထူပြီး တစ်မိနစ်ငြိမ် သက်တာတွေ ပြုလုပ်ခဲ့တယ်လို့ ရေစကြိုပကဖက အသိပေးပါတယ်။
မနေ့က(ဒီဇင်ဘာ၆ရက်) မနက်၇နာရီခန့်ကလည်း ပခုက္ကူ-ရေစကြိုလမ်းပေါ်၊ ပခန်းကြီးရွာအနီးမှာ ရေစကြိုပကဖက ရဲဘော်နှစ်ဦး မောင်းလာတဲ့ကားကို စစ်ကောင်စီတပ်က ပစ်ခတ်လို့ ရဲဘော်တစ်ဦး ဒဏ်ရာရခဲ့ပါသေးတယ်။
ရဲဘော် ၂ ဦးလုံး လွတ်မြောက်ခဲ့ပေမဲ့ မောင်းလာတဲ့ ကားတစ်စီးနဲ့ ကားပေါ်ပါ ပစ္စတိုတစ်လက်၊ အီနာဂါဗုံးသီးအလုံး(၄၀)ခန့်၊ ငွေသားသိန်း(၄၀) ကျော် ဆုံးရှုံးခဲ့တယ်လို့ ရေစကြိုပကဖက ထုတ်ပြန်ထားပါတယ်။
လက်ရှိအချိန်ထိလည်း ရေစကြိုပကဖဟာ အာဏာသိမ်းစစ်တပ်ကို ဆက်လက်တော်လှန်တိုက်ခိုက်နေပြီး ဒီဇင်ဘာလဆန်းမှာပဲ စစ်ကောင်စီတပ်နဲ့ တိုက်ပွဲတွေ ဖြစ်ပွားခဲ့ပါသေးတယ်။
(လင်းကတောနယ်မြေရဲစခန်း စခန်းသိမ်းတိုက်ပွဲမှာ ကျဆုံးခဲ့ရတဲ့ ရဲဘော်များ တစ်နှစ်ပြည့် အခမ်းအနားအား ပြုလုပ်နေစဥ်။ဓာတ်ပုံ-ရေစကြိုပကဖ)