NUG အပေါ်ထားတဲ့ ပြည်သူလူထုရဲ့ ယုံကြည်မျှော်လင့်ချက်တွေကို ရိုက်ချိုးမပစ်ဖို့ NUG ယာယီသမ္မတ ပြောကြား
ဒီဇင်ဘာ ၄၊ ၂၀၂၄
ပြည်သူတွေရဲ့ တော်လှန်ရေးအောင်မြင်စိတ်ကို ဘယ်သူကမှ ရိုက်ချိုးဖျက်ဆီးလို့ မရကြောင်း အမျိုးသားညီညွတ်ရေးအစိုးရ(NUG) ယာယီသမ္မတ ဒူဝါလရှီးလက ပြောကြားလိုက်ပါတယ်။
တိုင်းရင်းသားတပ်ဖွဲ့တွေနဲ့ ပြည်သူတွရဲ့ မျှော်လင့်ချက်ကို ရိုက်ချိုးလို့ မရဘဲ တော်လှန်ရေး အလုပ်တွေ ခွန်ပြည့်အားပြည့်လုပ်ဖို့ ယာယီသမ္မတက တိုက်တွန်းပြောကြားလိုက်တာပါ။
NUG အစိုးရအဖွဲ့ အစည်းအဝေးကို ဒီဇင်ဘာ ၃ရက် နေ့က ကျင်းပစဉ်မှာ ယာယီသမ္မတက အခုလို ပြောကြားလိုက်တာ ဖြစ်ပါတယ်။
“အမျိုးသားညီညွတ်ရေးအစိုးရအပေါ် တိုင်းရင်းသားလက်နက်ကိုင် အဖွဲ့အစည်းကြီးတွေနဲ့ ပြည်သူ လူထုတရပ်လုံးက ယုံကြည် မျှော်လင့်ချက်တွေ များစွာရှိကြပါတယ်။ ဒီမျှော်လင့်ချက်တွေ ယုံကြည်မှုတွေကို ကျွန်တော်တို့က ရိုက်ချိုးလို့ မရဘူး။ ကျွန်တော်တို့ဟာ လက်ရှိ နွေဦးတော်လှန်ရေးကို ဘယ်လောက် ခံယူချက်ခိုင်ခိုင်မာမာနဲ့ အပ်နှံထားကြောင်း လက်တွေ့ ပြသဖို့လိုပါတယ်။ ကျွန်တော်တို့အနေနဲ့ တင်းပြည့်ကျပ်ပြည့် ဆက်လက်လျှောက်လှမ်းရမယ့် အချိန်ကို ရောက်နေပြီဆိုတာ အားလုံး သိသင့်တယ်လို့ ထင်ပါတယ်”လို့ ပြောပါတယ်။
ပြီးခဲ့တဲ့ နိုဝင်ဘာ ၂၆ရက်က အစိုးရအဖွဲ့အစည်းအဝေးမှာလည်း ယာယီသမ္မတက နိုင်ငံပြင်ပရောက် NUG အစိုးရအဖွဲ့ဝင် ဝန်ကြီးတွေ၊ ဒုဝန်ကြီးတွေ ပြည်တွင်းကို ပြန်လာကြဖို့ တိုက်တွန်းပြောကြားထားပါသေးတယ်။
