မြဝတီ ကော့ကရိတ် အာရှလမ်းပိုင်းမှာ KNLA ဦးဆောင်တဲ့ တော်လှန်ရေးတပ်တွေနဲ့ အကြမ်းဖက်စစ်တပ် BGF ပူးပေါင်းတပ်ဖွဲ့တွေ တိုက်ပွဲဖြစ်

မြဝတီ ကော့ကရိတ် အာရှလမ်းပိုင်းမှာ KNLA ဦးဆောင်တဲ့ တော်လှန်ရေးတပ်တွေနဲ့ အကြမ်းဖက်စစ်တပ် BGF ပူးပေါင်းတပ်ဖွဲ့တွေ တိုက်ပွဲဖြစ်
ဒီဇင်ဘာ ၃၊ ၂၀၂၄
ကရင်ပြည်နယ်၊ မြဝတီ ကော့ကရိတ် အာရှလမ်းပိုင်းမှာ KNLA ဦးဆောင်တဲ့ တော်လှန်ရေးတပ်ဖွဲ့တွေနဲ့ BGF အကြမ်းဖက်စစ်တပ် ပူးပေါင်းတပ်ဖွဲ့တွေ တိုက်ပွဲဖြစ်ပွါးနေကြောင်း ဒေသခံတွေဆီက သိရပါတယ်။
ဒီဇင်ဘာလ ၂ရက်နေ့ ညပိုင်းကတည်းက ထိတွေ့ တိုက်ပွဲတွေ စတင်ဖြစ်ပွားနေပြီး ဒီဇင်ဘာလ ၃ရက် ဒီနေ့ မနက် ၁၀နာရီလောက်အထိ ပစ်ခတ်သံတွေကြားနေရတယ်လို့ ပြောကြပါတယ်။
“အကြမ်းဖက်စစ်တပ်ပူးပေါင်း BGF တပ်ဖွဲ့တွေနဲ့ KNLA ဦးဆောင်တဲ့ တော်လှန်ရေးတပ်ဖွဲ့တွေ တိုက်ပွဲ ဖြစ်နေတာ။ အကြမ်းဖက်စစ်တပ်က ဒရုန်းတွေနဲ့ဗုံးကြဲတာ၊ လက်နက်ကြီးတွေနဲ့ ပစ်ခတ်တာတွေလုပ်နေပြီး တိုက်ပွဲဆက်လတ်ပြင်းထန်နေသေးတယ်” လို့ KNLA ဦးဆောင်တဲ့ တော်လှန်ရေးတပ်ဖွဲ့ဝင်တစ်ယောက်က မောင်းကိုပြောပါတယ်။
“ခလရ ၉၇ အကြမ်းဖက်စစ်တပ်ထဲကနေလည်း အာရှလမ်းပိုင်းတွေကို လက်နက်ကြီးပစ်ကူတွေ ပေးနေတယ်။ ဂျိုင်းတံတားနဲ့ ကျုံဒိုးဘက်အခြမ်းကနေလည်း BGF တပ်တွေ နေရာယူထားပြီး အောင်ချမ်းသာ ဘုန်းကြီးကျောင်းမှာလည်း အကြမ်းဖက်စစ်တပ်က တပ်စွဲပြီး ပိတ်ဆို့တာတွေ လုပ်နေတယ်”လို့ အထက်ပါ တော်လှန်ရေးတပ်ဖွဲ့ဝင်က ဆက်ပြောပါတယ်။
ဒီဇင်ဘာ ၁ရက်နေ့ကလည်း ကရင်ပြည်နယ် ကြာအင်းဆိပ်ကြီး မြို့နယ်ထဲကို အကြမ်းဖက်စစ်တပ်က ဒရုန်းတွေနဲ့ ကင်းထောက်တာတွေ လုပ်ခဲ့ပြီး တော်လှန်ရေးတပ်ဖွဲ့တွေ ရှိမယ်ထင်တဲ့ နေရာတွေကို လက်နက်ကြီးတွေနဲ့ ရမ်းသမ်းပစ်ခတ်ခဲ့သေးတယ်လို့ တော်လှန်ရေးတပ်ဖွဲ့ဝင်တွေဆီက သိရပါတယ်။
ပုံစာ – ကရင်ပြည်နယ်အတွင်းက BGF တပ်ဖွဲ့ဝင်တချို့ (ပုံဟောင်း)