မင်းလှမြို့နယ်အတွင်း တော်လှန်ရေးတပ်များနှင့် စစ်ကောင်စီတပ် တိုက်ပွဲဖြစ်ပွား၊ စစ်တပ်က ၅၀ ထက်မနည်း သေဆုံးပြီး တော်လှန်ရေးရဲဘော် ၁ ဦးကျဆုံး…
ဇူလိုင် ၁၉၊ ၂၀၂၅
ပဲခူးတိုင်း၊ မင်းလှမြို့နယ်အတွင်းရှိ ပဲခူးရိုးမမှာ တော်လှန်ရေးတပ်တွေနဲ့ စစ်ကောင်စီတပ်တို့ တိုက်ပွဲဖြစ် ပွားရာ စစ်တပ်က ၅၀ ထက်မနည်း သေဆုံးပြီး တော်လှန်ရေးရဲဘော် ၁ ယောက် ကျဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ က ဒီနေ့ ထုတ်ပြန်ပါတယ်။
ဇူလိုင်လ ၁၃ ရက် နေ့လယ်ပိုင်းက မင်းလှမြို့နယ်အပိုင် ပဲခူးရိုးမထဲရှိ စပါးကြီးချောင်းမှာ စခန်းချထားတဲ့ စစ်ကောင်စီတပ်သားတွေကို တော်လှန်ရေးရဲဘော်တွေက ရှောင်တခင် ဝင်ရောက်တိုက်ခိုက်ခဲ့ရာ ၂ နာရီကြာ တိုက်ပွဲဖြစ်ပွားခဲ့ပြီး စစ်ကောင်စီတပ်သား ၃၀ ကျော် သေဆုံးခဲ့တယ်လို့ သိရပါတယ်။
အထိနာသွားတဲ့ စစ်ကောင်စီတပ်ဟာ ဇူလိုင် ၁၄ ရက် မနက်ပိုင်းမှာတော့ အင်အား ၄၀၀ ခန့်နဲ့ ခါချဉ်တောင်ပေါ်ကို စစ်ကြောင်းထိုးလာရာ ၄၈ ပေါက်၊ ဥတစ်လုံးတောင်နဲ့ ခါချဉ်တောင်တွေမှာ တိုက်ပွဲ ၃ ကြိမ်ဖြစ်ပွားခဲ့တယ်လို့ သိရပါတယ်။
စစ်ကောင်စီတပ်က လက်နက်ကြီးတွေ ဒရုန်းတွေသုံးပြီး တိုက်ခိုက်ခဲ့တာကြောင့် တော်လှန်ရေးရဲဘော်တွေ ခါချဉ်တောင်စခန်းကနေ ဆုတ်ခွာပေးခဲ့ရတယ်လို့ သိရပါတယ်။
အဆိုပါတိုက်ပွဲတွေအတွင်း စစ်ကောင်စီတပ်က ၅၀ ထက်မနည်း သေဆုံးကာ စစ်ကောင်စီတပ် ဒရုန်းနဲ့ တိုက်ခိုက်မှုကြောင့် တော်လှန်ရေးရဲဘော် ဇာမဏီကျဆုံးခဲ့ပြီး ဆိုင်ကယ် ၂ စီး၊ မိုးကာ၊ ဆိုလာပြား၊ ဆန်အိတ်တွေနဲ့ အခြားပစ္စည်းအချို့ ဆုံးရှုံးခဲ့ရတယ်လို့ သိရပါတယ်။
စစ်ကောင်စီနဲ့ တိုက်ပွဲတွေ ဆက်လက်ဖြစ်ပွားနိုင်တဲ့အတွက် ပြည်သူတွေအနေနဲ့ ရိုးမအတွင်း သွားလာမှုတွေ မပြုလုပ်ဖို့နဲ့ စစ်ဆင်ရေးတွေ ဆက်လက်ဖော်ဆောင်နိုင်အောင် ထောက်ပံ့ကူညီပေးဖို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ က မေတ္တာရပ်ခံထုတ်ပြန်ထားပါတယ်။