မင်းတုန်းမြို့ပေါ် ရဲစခန်းနှင့် စစ်တပ် တပ်စွဲထားသော နေရာများအနီး နေထိုင်သော ပြည်သူများ မနက်ဖြန် နောက်ဆုံးထား၍ ရှောင်ရှားကြရန် PDF တပ်ဖွဲ့က အသိပေး
ရန်ကုန်၊ စက်တင်ဘာ ၉
မကွေးတိုင်း၊ မင်းတုန်းမြို့ပေါ် ရဲစခန်းနှင့် အကြမ်းဖက် စစ်တပ် တပ်စွဲထားသော နေရာများအနီး နေထိုင်သော ပြည်သူများအနေဖြင့် မနက်ဖြန် နောက်ဆုံးထား၍ ရှောင်ရှားကြရန် အသိပေးချက် ထုတ်ပြန်ထားကြောင်း မင်းတုန်းမြို့နယ် ပကဖ တာ၀န်ခံ ကိုဗဟိန်းက ရန်ကုန်ခေတ်သစ် မီဒီယာသို့ ပြောဆိုသည်။
စက်တင်ဘာလ ၈ ရက်နေ့ ညပိုင်းတွင် မင်းတုန်းမြို့နယ် ပကဖ က မင်းတုန်းမြို့ပေါ် ရဲစခန်း၊ မိုက်ခရို အစရှိသည့် အကြမ်းဖက် စစ်သားနှင့် ရဲများ အခြေစိုက်ရာ နေရာများ အနီးရှိ ပြည်သူများ အနေဖြင့် စက်တင်ဘာလ ၁၀ ရက်နေ့ နောက်ဆုံးထားပြီး ဘေးလွတ်ရာ နေရာများကို ကြိုတင်ရှောင်ရှားထားကြရန် အထူးသတိပေး ကြေညာချက် ထုတ်ပြန်ခဲ့ကြောင်း သိရသည်။
ပြည်သူများ ကြုံတွေ့လာရနိုင်သော တိုက်ပွဲအန္တရာယ်များမှ ကင်းဝေစေရန် မေတ္တာရှေ့ထား၍ ကြိုတင် သတိပေးအပ်ကြောင်း၊ ယင်းနေရာများသည် မည်သည့် အချိန် တိုက်ပွဲဖြစ်မည်မှာ မသေချာသော်လည်း အချိန်မရွေး တိုက်ပွဲဖြစ်နိုင်သော နေရာများဖြစ်သည်မှာ သေချာကြောင်း၊ ထို့ကြောင့် ပြည်သူများအနေဖြင့် မနေသင့်သော အရပ်ဖြစ်၍ တော်လှန်ရေးကာလအတွင်း အဆိုပါနေရာများနှင့် အနီးကပ်နေထိုင်ခြင်း လုံး၀မပြုလုပ်ကြပါရန် အထူးသတိပေးအပ်ခြင်းဖြစ်ကြောင်း မင်းတုန်းမြို့နယ် ပကဖ တာ၀န်ခံ ကိုဗဟိန်းက ရှင်းပြသည်။
“ပြည်သူတွေ အနေနဲ့က စစ်ရေးကိစ္စတွေကို မပေါ့ဆစေဘဲနဲ့ ကြိုတင် ပြင်ဆင်ထားဖို့ လိုအပ်ပါတယ်။ ဒါကြောင့် ကျန်တော်တို့ ထုတ်ပြန်ချက်တွေကိုပါဝင် ပူးပေါင်းစေချင်ပါတယ်” မင်းတုန်းမြို့နယ် ပကဖ တာ၀န်ခံ ကိုဗဟိန်းက ပြောဆိုသည်။
မင်းတုန်းမြို့နယ်၊ ရွာသစ်ကျေးရွာ စာသင်ကျောင်းကို စစ်တပ်က လေကြောင်းဖြင့် ဗုံးကျဲ တိုက်ခိုက်
■ မြေပြင်တွင် စစ်ကြောင်းထိုးနေသည့် စစ်တပ်က ခုန်တိုင်ရွာမှ ပြည်သူ ၄၀ ကျော်ကို လူသားဒိုင်း အဖြစ် ဖမ်းဆီးပြီး ရွာလယ်ခေါင်တွင် တပ်စွဲထား
ရန်ကုန်၊ စက်တင်ဘာ ၉
မကွေးတိုင်း၊ မင်းတုန်းမြို့နယ်၊ ရွာသစ်ကျေးရွာ စာသင်ကျောင်းကို အကြမ်းဖက် စစ်တပ်က လေကြောင်းဖြင့် ဗုံးကျဲ တိုက်ခိုက်ခဲ့ကြောင်း မင်းတုန်းမြို့နယ် ပကဖ တာ၀န်ခံ ကိုဗဟိန်းက ရန်ကုန်ခေတ်သစ် မီဒီယာသို့ ပြောဆိုသည်။
ယနေ့ စက်တင်ဘာလ ၉ ရက်နေ့ ည ၈ နာရီ ၁၅ မိနစ်ခန့်တွင် မင်းတုန်းမြို့နယ်၊ ရွာသစ်ကျေးရွာ စာသင်ကျောင်းကို အကြမ်းဖက် စစ်တပ်က Jet fighter ဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ်၏ လေကြောင်း တိုက်ခိုက်မှု အတွင်း ပြည်သူများ ထိခိုက်မှု မရှိသော်လည်း ကျောင်း အဆောက်အဦးနှင့် အနီးအနားရှိ ပြည်သူပိုင် နေအိမ်များ ပျက်စီးမှု ရှိကြောင်း သိရသည်။
ထို့ပြင် မြေပြင်တွင် စစ်ကြောင်းထိုးနေသည့် အကြမ်းဖက် စစ်ကောင်စီ တပ်သားများကလည်း ယနေ့ ည ၈ နာရီ ၁၅ မိနစ်ခန့်တွင် ခုန်တိုင်ကျင်းကျေးရွာကို ရောက်ရှိလာပြီး ကျေးရွာနေ ပြည်သူ ၄၀ ကျော်ကို လူသားဒိုင်း အဖြစ် ဖမ်းဆီးကာ ရွာလယ်ခေါင်တွင် တပ်စွဲထားကြောင်း သိရှိရသည်။
” ပထမ က ပြည်သူ ၃ ဦးလောက်ပဲ ဖမ်းမိတာ ဖမ်းမိတဲ့သူတွေကို သတ်ပစ်မယ်လို့ ခြိမ်းခြောက်ပြီး တိမ်းရှောင်နေတဲ့ သူတွေကို လိုက်ခေါ်ခိုင်းတာ မလာတဲ့သူတွေကို နေအိမ်တွေ မီးရှို့မယ် PDF တွေလို့ သတ်မှတ်ပြီး တွေ့တဲ့အချိန် ဖမ်းမယ် သတ်မယ်ဆိုပြီး ခြိမ်းခြောက်ပြီး လိုက်ခေါ်တာ အဲလိုခြိမ်းခြောက်ခေါ်ပြီး ဖမ်းမိတဲ့ သူတွေကို ဘေးပတ်ပတ်လည်းမှာထားပြီး သူတို့က ရွာလယ်ခေါင်မှာ တပ်စွဲနေတာ စစ်ခွေးက ရွာထဲက ပြည်သူတွေ မွေးမြူထားတဲ့ ကြက်တွေ ဝက်တွေကို သတ်ဖြတ် စားသောက်နေကြတယ်။ လေကြောင်းနဲ့ ဗုံးကျဲသွားတာတော့ ပြည်သူတွေ ထိခိုက်မှုမရှိဘူး။ နေအိမ်တွေ ပျက်စီးမှုတော့ရှိတယ်” ဟု မင်းတုန်းမြို့နယ် ပကဖ တာ၀န်ခံ ကိုဗဟိန်းက ပြောဆိုသည်။