စစ်တောင်းမြစ်အရှေ့ဘက်ကမ်းကို အင်အားအလုံးရင်းသုံး စစ်ကြောင်းထိုးသည့် စစ်ကောင်စီတပ်နှင့် နေပြည်တော် PDF တပ်ရင်းများ တိုက်ပွဲဖြစ်
စစ်ကောင်စီဘက် ဗိုလ်တွေအပါ အယောက် ၄၀နီးပါးသေပြီး ထိခိုက်ဒဏ်ရာရသူအများပြားနှင့်စစ်ကြောင်းလိုက် ပြန်ဆုတ်သွား
ဇူလိုင် ၁၇၊ ၂၀၂၅
ပဲခူးတိုင်း၊ ရေတာရှည်မြို့နယ်မှာ စစ်တောင်းမြစ်အရှေ့ဘက်ကမ်းကျေးရွာတွေဆီ အင်အားအလုံးရင်းနဲ့ ဝင်ရောက်လာတဲ့ အကြမ်းဖက်စစ်ကြောင်းနဲ့ ထိတွေ့တိုက်ပွဲဖြစ်ပွားပြီး စစ်ကောင်စီဘက်က ဗိုလ်အဆင့်ရှိသူတွေအပါ အယောက် ၄၀ နီးပါးကျဆုံးကာ ထိခိုက်ဒဏ်ရာရသူ အများအပြားနဲ့ ပြန်လည်ဆုတ်ခွာသွားကြောင်း နေပြည်တော်တိုင်းစစ်ဌာန စစ်တောင်းမြစ်ဝှမ်း(ရေတာရှည်) စစ်ဆင်ရေးတာဝန်ရှိသူ ဗိုလ်ဇင်ယော်က မောင်းကိုပြောပါတယ်။
ပြီးခဲ့တဲ့ ဇူလိုင်လ ၇ရက်နေ့ မနက်ပိုင်းက
စစ်တောင်းမြစ်အနောက်ဘက်ကမ်းကနေ အင်အားဖြည့်တင်းလာတဲ့ အကြမ်းဖက်စစ်ကောင်စီတပ်တွေဟာ ကရင်ချောင်းတံတား (ကျွဲရိုင်းပြင်)ကို ဖြတ်ရင်း
မြစ်အရှေ့ဘက်ကမ်း ပိန္ဒဲပင် ကျေးရွာဆီ စစ်ကြောင်း ၃ခုဖြန့် ဝင်ရောက်ခဲ့တယ်လို့ သိရပါတယ်။
တောင်ငူ၊ ဆွာနဲ့ ရေတာရှည်အခြေစိုက် ခလရတပ်ရင်းတွေက အင်အား ၂၀၀ ခန့်ပါတဲ့ အထက်ပါအကြမ်းဖက်စစ်ကြောင်းကို တော်လှန်ရေးတပ်တွေခုခံတိုက်ခိုက်ရင်း မနက် ၈နာရီအချိန်ကစလို့ နေ့လည် ၁နာရီအထိ အပြန်အလှန် ထိတွေ့တိုက်ပွဲ အပြင်းအထန် ဖြစ်ပွားခဲ့တယ်လို့ သိရပါတယ်။
အဲ့ဒီနောက် တစ်နေ့လုံးနီးပါး ထိတွေ့တိုက်ပွဲငယ်တွေပါ ဆက်လက်ဖြစ်ပွားခဲ့ပြီး စစ်ကောင်စီက ကာဆုတ်ဆုတ်ရင်း စစ်တောင်းမြစ်အနောက်ဘက်ကိုစစ်ကြောင်းလိုက် ပြန်ဆုတ်ခွါသွားခဲ့တယ်လို့ နေပြည်တော်တိုင်းစစ်ဌာန စစ်တောင်းမြစ်ဝှမ်း(ရေတာရှည်) စစ်ဆင်ရေးတာဝန်ရှိသူ ဗိုလ်ဇင်ယော်က ပြောပါတယ်။
“၇ရက်နေ့က စစ်ကြောင်း ၃ကြောင်း ဖြန့်တက်လာတာမှာ ၂ကြောင်းနဲ့ ထိတွေ့မှုဖြစ်တယ်။ တကယ်တမ်း သူတို့ အင်အား ဖြန့်သုံးထားတာ ၅၀၀ လောက်ရှိတယ်။ ဒါပေမယ့် တကယ်တမ်းထိုးတော့ အင်အား ၂၀၀လောက်နဲ့ပေါ့။ ပိန္ဒဲပင်ရွာဘက်ကို ပစ်ထိုးထိုးပြီးဝင်လာတာပေါ့။ အင်တောတွေ၊ လျှုတွေကွယ်ပြီး တက်လာတာပါ။ ကျနော်တို့က သူတို့ပစ်ဝင်လာတာကို ၃ခါလောက်စောင့်ပြီးမှ တွန်းတိုက်ခဲ့တာပါ။ သူတို့ဘက်က လက်နက်ကြီး ၁၂၀ မမ တွေ တောက်လျှောက်သုံးခဲ့တယ်။ ကျနော်တို့က ခုခံရင်းတန်ပြန်ထိုးစစ်ဆင်ခဲ့တာပါ။” လို့ ဗိုလ်ဇင်ယော်က ပြောပါတယ်။
အဲ့ဒီနေ့ စစ်ကြောင်းထိုးဝင်ရောက်မှုမတိုင်ခင် ပြီးခဲ့တဲ့ ဇူလိုင်လ ၄ရက်နေ့ကလည်း စစ်တောင်းမြစ်ဝှမ်းအရှေ့ဘက်မှာရှိတဲ့ ရေလွဲကျေးရွာကို စစ်ကောင်စီတပ်တွေက သာလွန်အင်အားနဲ့ ဝင်ရောက်မီးရှို့ဖျက်ဆီးခဲ့ရာ နေအိမ် အလုံး၄၀နီးပါး မီးလောင်ပျက်စီးခဲ့တယ်လို့ သိရပါတယ်။
အဲ့လိုမျိုး မီးရှို့ဖျက်ဆီးနေတဲ့ စစ်ကောင်စီတပ်သားတွေကို တပ်ရင်းအမှတ် (၈၀၁၊ ၈၀၂၊ ၈၀၃၊ ၈၀၄၊၈၀၅၊ ၈၀၆၊ ၈၀၇၊ ၈၀၈၊ ၉၀၁)နဲ့ တပ်ရင်း (၃၅၀၄) စတဲ့ နေပြည်တော်တပ်ရင်းတွေက ပြန်လည်ထိုးစစ်ဆင်တိုက်ခိုက်ခဲ့ရာမှာတော့ စစ်ကောင်စီစစ်ကြောင်းတစ်ခုလုံး ကရင်ချောင်းကျေးရွာအထိ ဆုတ်ခွာခဲ့ရပြီး ဇူလိုင်လ ၇ရက်နေ့မှာတော့ အင်အားပြန်လည်ဖြည့်တင်းရင်း ဆက်လက်ဝင်ရောက်ခဲ့တာလို့ သိရပါတယ်။
တိုက်ပွဲအတွင်း စစ်ကောင်စီတပ်က ဗိုလ် ၄ယောက်အပါ စစ်သားအင်အား ၄၀နီးပါးသေဆုံးပြီး အယောက် ၂၀ နီးပါး ထိခိုက်ဒဏ်ရာရရှိခဲ့ကြောင်း၊ တော်လှန်ရေးပူးပေါင်းတပ်ဖွဲ့တွေကတော့ အထိအခိုက်မရှိခဲ့ကြောင်း သိရပါတယ်။
“စစ်ကြောင်း၃ခုမှာ ၁ကြောင်းက နောက်ကနေ ကာပစ်ပေးတယ်။ ထိခိုက်သေဆုံးမှုများခဲ့တာလည်း ကျနော်တို့ဆီ တက်လာတဲ့ ရှေ့စစ်ကြောင်း ၂ခုပါ။ သူတို့ဘက် ထိခိုက်သေဆုံးများပြီး အရေးပေါ်ကားတွေ၊ စစ်သုံးကားကြီးတွေပေါ် အလောင်းတွေနဲ့ ဒဏ်ရာရသူတွေကို ထိုးတင်ပြီး ကရင်ချောင်းတံတားအတိုင်း တောင်ငူဘက်ကို ပြန်ဆုတ်သွားပါတယ်။ တောင်ငူနဲ့ နေပြည်တော်ဆေးရုံတွေဆီ ပို့တယ်လို့ သိရတယ်။ သူတို့က ခြေလျင်တပ်ရင်းတွေဆိုတော့ မိခင်တပ်ရင်းတွေအထိ ပြန်ဆုတ်ပါတယ်။ ကာဆုတ်ဆုတ်တာဆိုတော့ ၃ရက်လောက်ကြာမှ အလုံးစုံသူတို့ပြန်ဆုတ်သွားတာပါ။” လို့ နေပြည်တော်တိုင်းစစ်ဌာန စစ်တောင်းမြစ်ဝှမ်း(ရေတာရှည်) စစ်ဆင်ရေးတာဝန်ရှိသူ ဗိုလ်ဇင်ယော်က ပြောပါတယ်။
ဒါ့အပြင် စစ်ကောင်စီတပ်တွေ ဆုတ်ခွာသွားတဲ့
နေရာတွေကို သွားရောက်ရှင်းလင်းရင်း ဗုံးသီးအကြွင်းအကျန်နဲ့ မိုင်းတွေကို အရပ်သားတွေထိခိုက်မှုမရှိစေနိုင်ဖို့ ပြန်လည်ရှင်းလင်းပေးခဲ့ရကြောင်းနဲ့ နယ်မြေတွေထိန်းသိမ်းထားကြောင်း Nay Pyi Taw PDF က ထုတ်ပြန်ပါတယ်။
ဒီတန်ပြန်ထိုးစစ်ဆင်တိုက်ခိုက်မှုကို စစ်ဆင်ရေးနယ်မြေအမှတ်-(၂)လက်အောက်ရှိ နေပြည်တော်တိုင်းစစ်ဌာန တပ်ရင်းတွေဖြစ်တဲ့ တပ်ရင်း (၈၀၁၊ ၈၀၂၊ ၈၀၃၊ ၈၀၄၊၈၀၅၊ ၈၀၆၊ ၈၀၇၊ ၈၀၈၊ ၉၀၁)နဲ့ တပ်ရင်း (၃၅၀၄) တပ်ရင်းနဲ့ NSA31တို့ ပူးပေါင်း လုပ်ဆောင်ခဲ့တယ်လို့ သိရပါတယ်။
ပုံစာ – နယ်မြေရှင်းလင်းရေး လုပ်ဆောင်နေသည့် နေပြည်တော် PDF တပ်ရင်းတပ်ဖွဲ့ဝင်များ