ရွှေဘိုမြို့နယ်အတွင်းရှိ စစ်ကောင်စီတပ် အထိုင်စခန်း ၄ ခုကို တိုက်ခိုက်သိမ်းပိုက်၊ ဒုတပ်ရင်းမှူး ဗိုလ်မှူးအား အရှင်ဖမ်းမိ (ရုပ်/သံ)
ဇူလိုင် ၁၁၊ ၂၀၂၅
———————————————————————————————-
စစ်ကိုင်းတိုင်း ရွှေဘိုမြို့နယ်အတွင်းရှိ စစ်ကောင်စီတပ်အထိုင်စခန်းတွေဖြစ်တဲ့ ဟင်္သာကြီးပျူရွာ၊ ဘိုးနတ်တောင်စခန်းကုန်း၊ တောင်လှဗျူဟာစခန်းကုန်းနဲ့ ဘိုးထွန်းကျော် ဗျူဟာစခန်းကုန်းတွေကို တိုက်ခိုက်သိမ်းပိုက်ခဲ့တယ်လို့ အမှတ် – ၉၇၀၆ တပ်ရင်းက သတင်းထုတ်ပြန်ထားပါတယ်။
ဇူလိုင်လ ၄ ရက်က တော်လှန်ရေးတပ်တွေ ပူးပေါင်းပြီး ရွှေဘိုမြို့နယ် ကျောက်မြောင်းမြို့ ဟင်္သာ ကြီးပျူစခန်းကုန်းနဲ့ ဘိုးနတ်တောင်ဗျူဟာစခန်းကုန်းတွေကို တပြိုင်နက်တည်း ထိုးစစ်တိုက်ခိုက်ခဲ့ရာ စစ်ကောင်စီတပ်ရဲ့ လေကြောင်း ဗုံးကြဲမှုတွေကြားကနေ ဟင်္သာကြီးပျူစခန်းကုန်းကို အပြီးသတ် သိမ်းပိုက်နိုင်ခဲ့တယ်လို့ သိရပါတယ်။
ပျူစခန်းကုန်းရှိ ဒုတပ်ရင်းမှူး ဗိုလ်မှူး ချမ်းလွင်မောင်ကို အရှင်ဖမ်းဆီးနိုင်ခဲ့ပြီး သူ့ရဲ့ တပ်ဖွဲ့ဟာ မခေါက်ရွာကို ထွက်ပြေးသွားတယ်လို့ သိရပါတယ်။
အဲဒီနောက် ခမရ ၁၂ ဦးဆောင်တဲ့ ဘိုးနတ်တောင်ဗျူဟာကုန်းကို အဲဒီနေ့ ညနေပိုင်းမှာ အပြီးသတ် သိမ်းပိုက်နိုင်ခဲ့ပြီး စခန်းထိုင်ထားတဲ့ စစ်ကောင်စီတပ်ရဲ့ G1 နဲ့အဖွဲ့ဟာ တောင်လှဗျူဟာကုန်းကို ဆုတ်ခွာထွက်ပြေးသွားတယ်လို့ သိရပါတယ်။ တော်လှန်ရေးပူးပေါင်းတပ်တွေဟာ တောင်လှဗျူဟာကုန်းကို ထပ်မံထိုးစစ်ဆင်တိုက်ခိုက်ခဲ့ရာ ဇူလိုင်လ ၅ ရက် မနက်အစောပိုင်းမှာ သိမ်းပိုက်နိုင်ခဲ့တယ်လို့ ဆိုပါတယ်။
ဒါ့အပြင် ဇူလိုင်လ ၇ ရက် ညနေပိုင်းမှာ ဘိုးထွန်းကျော်ဗျူဟာစခန်းကုန်းကို တိုက်ခိုက်သိမ်းပိုက်နိုင်ခဲ့ပါတယ်။ စခန်းသိမ်းတိုက်ပွဲတွေအတွင်း ခမရ ၁၂ ဒုတပ်ရင်းမှူး ဗိုလ်မှူးချမ်းလွင်မောင်ကို ဖမ်းဆီးရမိပြီး လက်နက်ခဲယမ်း အများအပြား သိမ်းဆည်းရရှိခဲ့တယ်လို့ သိရပါတယ်။
အဲဒီစခန်းသိမ်းတိုက်ပွဲတွေကို ရွှေဘိုခရိုင်တပ်ရင်း ၁၅၊ ၁၈၊ ၂၃၊ ၂၆၊ ၁၇၀၁၊ ၉၇၀၆ တပ်ရင်းတွေနဲ့ Brave Brothers (Local PDF)၊ တိုက်နယ်(၄) ရွှေဘိုကျားကြီး(ပကဖ)တို့ ပူးပေါင်းတိုက်ခိုက်ခဲ့ကြတယ်လို့ သိရပါတယ်။
Video-အမှတ် – ၉၇၀၆ တပ်ရင်း