ဦးသိမ်းဝေ FMI ကုမ္ပဏီဥက္ကဌရာထူးမှအနားယူ
စောနွေဦး/People’s Spring
စစ်ကောင်စီဖမ်းဆီးသည့် စီးပွားရေးလုပ်ငန်းရှင် ဦးသိမ်းဝေအား FMIကုမ္ပဏီအုပ်စု၏ အမှုဆောင်ဥက္ကဌရာထူးမှစက်တင်ဘာ၅ ရက်ကစတင်ပြီး အနားယူလိုက်ကြောင်း ကုမ္ပဏီကထုတ်ပြန်သည်။
ဦးသိမ်းဝေကိုစစ်ကောင်စီကဖမ်းဆီးပြီးနောက်
စင်ကာပူစတော့အိတ်ချိန်းစာရင်းဝင် Yoma Strategic ကုမ္ပဏီမှ အစုရှယ်ယာများ ထိုးကျခဲ့သဖြင့် ကုမ္ပဏီ၏ဥက္ကဌရာထူးမှနှုတ်ထွက်ခဲ့သည်။ယခုအခါ FMIကုမ္ပဏီ၏ အမှုဆောင်ဥက္ကဌရာထူးမှပါ ထပ်မံနှုတ်ထွက်လိုက်ခြင်းဖြစ်သည်။
ဦးသိမ်းဝေ၏နေရာတွင်၎င်း၏သားဖြစ်သူဦးထွန်းထွန်းက ဆက်လက်တာဝန်ယူမည်ဟုကုမ္ပဏီကအသိပေးထားသည်။ဦးသိမ်းဝေ နှင့် အတူ နိုင်ငံ
ခြားသား ဒါရိုက်တာနှစ်ဦးလည်း ကုမ္ပဏီမှ အနားယူကြောင်းလည်းထုတ်ပြန်ချက်တွင်ဖော်ပြထားသည်။
FMI ကုမ္ပဏီ၏ ဒါရိုက်တာအဖွဲ့တွင် ဦးထွန်းထွန်း၊ ဒေါက်တာအောင်ထွန်းသက်၊ဦးသန်းအောင်၊ ဦးကြည်အေး နှင့် ဦးလင်းမြိုင်တို့ကဆောင်ရွက်မည်ဟု ကုမ္ပဏီဘက်ကဆိုသည်။
စစ်ကောင်စီက ဇွန်လဆန်းပိုင်တွင်း ဦးသိမ်းဝေအပါအဝင်ကုမ္ပဏီ ဒါရိုက်တာ ၉ ဦးကို ငွေကြေးခဝါချမှုဖြင့် ဖမ်းဆီးခဲ့ခြင်းဖြစ်သည်။
စစ်ကောင်စီက အိမ်ရာချေးငွေများကို သတ်မှတ်ချက်ထာ ပိုမိုထုတ်ချေးခဲ့သည့်ဟု စွပ်စွဲချက်ဖြင့် ရိုးမဘဏ်အပါအဝင် ဘဏ်ခုနှစ်ခုကို အရေးယူမည်ဟုကြေညာချက်ပြီးနောက် ဦးသိမ်းဝေကို နေပြည်တော်တွင် ဖမ်းဆီးထိန်းသိမ်းထားခြင်းဖြစ်သည်။
ဇူလှိုင်လကုန်ပိုင်းတွင် ဦးသိမ်းဝေကို ငွေကြေးခဝါချမှု၊တရားမဝင်ငွေလွှဲပြောင်းစသည့် ဥပဒေပုဒ်မများဖြင့် စစ်ကောင်စီက တရားစွဲဆိုခဲ့သည်။
ဦးသိမ်းဝေကို စစ်ကောင်စီက သီရပျံချီဘွဲ့ပေးထားပြီး တော်လှန်ရေးတပ်များက နေပြည်တော်ကို မတိုက်နိုင်လျှင် စီးပွားရေးလုပ်လို့ ရသည်ဟု ကြွေးကြော်ခဲ့သည့် လုပ်ငန်းရှင်ကြီးတစ်ဦးမှာ စစ်ကောင်စီ ၏ ဖမ်းဆီးတရားစွဲဆို ထောင်ချခြင်းခံရခြင်းလည်းဖြစ်သည်။
ဦးသိမ်းဝေတည်ထောင်ခဲ့သည့် FMIကုမ္ပဏီသည် ဘဏ်လုပ်ငန်း၊ ကျန်းမာရေးဝန်ဆောင်မှုလုပ်ငန်း၊ ဟိုတယ်နှင့်ခရီးသွားလုပ်ငန်း ၊အိမ်ခြံမြေလုပ်ငန်း၊ကုန်သွယ်ရေးလုပ်ငန်းစသည့်တိုကိုလုပ်နေခြင်းဖြစ်ပြီး ရန်ကုန်စတော့အိတ်ချိန်းစာရင်းကုမ္ပဏီအုပ်စုတခုလည်းဖြစ်သည်။ ထိုပြင်ဦးသိမ်းဝေက စင်ကာပူစတော့အိတ်ချိန်းစာရင်းဝင် Yoma Strategic ကုမ္ပဏီကိုလည်းပိုင်ဆိုင်ထားသည်။
စစ်ကောင်စီက ဦးသိမ်းဝေ အပါအဝင်လုပ်ငန်းရှင်များကိုဖမ်းဆီးတရားစွဲ ဆိုခြင်းမှာ လုပ်ငန်းရှင်များထံမှ ငွေများရယူလိုခြင်းကြောင့်ဖြစ်နိုင်သလို ၊ စစ်တပ်နှင့် နီးစပ်သောလုပ်ငန်းရှင်ကြီးများမှာ မည်သူမျှငွေကြေးခဝါချမှုနှင့် မကင်းဘဲ ဦးသိမ်းဝေကို ခရိုနီချင်း တိုင်ကြားမှုကြောင့် အရေးယူခံရခြင်းဖြစ်နိုင်ကြောင်း လုပ်ငန်းရှင်အချို့ကပြောသည်။