စစ်ကောင်စီက BGF ခေါင်းဆောင်ဗိုလ်မှူးကြီး
စောချစ်သူပိုင် ကုမ္ပဏီကို အမည်ပျက်စာရင်းသွင်း
ဇွန်-၁၊၂၀၂၅။ရဲခေါင်/People’s Spring
စစ်တပ်လက်အောက်ခံ ကရင်ပြည်နယ်နယ်ခြားစောင့်တပ်-BGF ခေါင်းဆောင် ဗိုလ်မှူးကြီး စောချစ်သူနှင့် ၎င်း၏ မိသားစုဝင်များပိုင် ချစ်လင်းမြိုင်ကုမ္ပဏီကို စစ်ကောင်စီကအမည်ပျက်စာရင်းကြေညာသည်။
ရွေးကောက်ခံ အရပ်သားအစိုးရလက်ထက်ဖြစ်သော ၂၀၁၆ ခုနှစ်မှ ၂၀၂၀ ပြည့်နှစ်အထိ ပို့ကုန်တင်ပို့ခဲ့ပြီး ပို့ကုန်ရငွေများ ပြန်လည်ဝင်ရောက်ရန် ကျန်ရှိသဖြင့်ဆိုကာ အမည်ပျက်စာရင်းသွင်းသည့် ကုမ္ပဏီ ၁၉၇ ခု တွင် BGFပိုင်ချစ်လင်းမြိုင်ကုမ္ပ
ဏီကိုပါစစ်ကောင်စီ၏ ဗဟိုဘဏ်က ထည့်သွင်းခဲ့ခြင်းဖြစ်သည်။
ကြေညာချက်အရ CHIT LINN MYAING TOYOTA COMPANY LIMITED ၏ဒါရိုက်
တာအဖွဲ့ဝင်အမည်တွင် ဦးစံမြင့်(ဗိုလ်မှူးကြီးစောချစ်သူ)၊ ၎င်း၏ သမီး ဒေါ်နန်းနှင်းနန္ဒာအေး၊သားဖြစ်သူ ဦးစောချစ်ချစ် နှင့် ဦးစောထူးအယ်မှူး၊ BGF ဗိုလ်မှူးကြီး ဦးစောမင်းမင်းဦး၊ဦးထိုက်မောင် ဟု တွေ့ရှိရသည်။
စစ်တပ်လက်အောက်ခံ နယ်ခြားစောင့်တပ်-BGF နှင့် ပြည်သူ့စစ် အဖွဲ့များကို စစ်တပ်က ခေတ်အဆက်ဆက် စီးပွားရေးလုပ်ငန်း များစွာလုပ်ကိုင်ခွင့်ပြုထားပြီး ယခုကဲ့သို့ လူသိများသော BGF
ခေါင်းဆောင်၏ ကုမ္ပဏီကို အရေးယူခြင်းမှာ ရှားရှားပါးပါးဖြစ်သည်။
ထိုအပြင် အာဏာသိမ်းခေါင်းဆောင် မင်းအောင်
လှိုင်က စောချစ်သူကို ၂၀၂၃ ဇန်နဝါရီတွင်သီရိပျံချီဘွဲ့ပေးအပ်ထားသေးသည်။
ကရင်နယ်ခြားစောင့်တပ် အဓိကလှုပ်ရှားသော မြဝတီမြို့ အနီးဝန်းကျင်တွင် KNU/KNLA ကဦးဆောင်သောတော်လှန်ရေးတပ်များက မြန်မာ
-ထိုင်းနယ်စပ်ရှိ စစ်တပ်စခန်းများကို မေလနှင့် ဇွန်လတွင် ဆက်တိုက်သိမ်းပိုက်နေရာ ယခုအခါ ဝေါလေဗျူဟာ ၊ဥကရစ်ထစခန်း နှင့် တိသဲလယ်ကာကင်းစခန်းတို့သာကျန်ရှိတော့သည်။
နိုင်ငံခြားငွေလိုအပ်သည့် စစ်ကောင်စီသည် အာရှနိုင်ငံများသို့ ပို့ကုန်တင်ပို့ပြီးရက်ပေါင်း၃၀ အတွင်း နှင့် အခြားနိုင်ငံများသို့တင်ပို့ပါကရက်ပေါင်း ၆၀ အတွင်း ပို့ကုန်တင်ပို့သူ၏ မြန်မာနိုင်ငံအတွင်းရှိ ဘဏ်ငွေစာရင်းသို့နိုင်ငံခြားငွေဖြင့်မပျက်မကွက်
ထည့်သွင်းရန် သတ်မှတ်ထားသည်။
ထိုသတ်မှတ်ချက်အရ ပို့ကုန်ရငွေပြန်လည်ဝင်ရောက်ရန်ကျန်ရှိသည့် ကုမ္ပဏီ ၁၉၇ ခုသည် နိုင်ငံ ခြားသုံးငွေ စီမံခန့်ခွဲမှုဥပဒေ၊ စည်းမျဉ်း၊ အမိန့်ကြော်ငြာစာကို လိုက်နာခြင်း၊စာရင်းရှင်းလင်းခြင်းမရှိခဲ့ဟု စစ်ကောင်စီက ဆိုသည်။
သို့သော် ပို့ကုန်အမည်စာရင်းနှင့် ပို့ကုန်တွင် ရရှိ
မည့် ငွေပမာဏကိုမူ ဖော်ပြထားခြင်းမရှိပေ။
၂၀၀၅ ခုနှစ်ကတည်းက တည်ထောင်ခဲ့သော ဗိုလ်မှူးကြီးစောချစ်သူ၏ CHIT LINN MYAING ကုမ္ပဏီ ဂရုအောက်တွင် Chit Linn Myaing Toyota၊ Chit Linn Myaing Energy၊ Chit Linn Myaing Mining & Industry တို့ရှိသည်။
ထို့အပြင် Yulong Bay Resort Tourism & Development၊ Dawna Thanlwin၊ Htoo Thitsar Aung၊Myanmar Apolo Internation
al Investment၊ Shwe Badaythar Myaing နှင့် Htoo Myittar Htoo ကုမ္ပဏီတို့တွင်စောချစ်သူနှင့်၎င်း၏ သားသမီးများက ရှယ်ယာရှင် သို့မဟုတ် ဒါရိုက်တာအဖြစ် ပါဝင်ပတ်သက်ခဲ့ကြသည်။
ချစ်လင်းမြိုင်ကုမ္ပဏီသည် မြန်မာ-ထိုင်းနယ်စပ် အွန်လိုင်းငွေလိမ်လုပ်ငန်းများ အဓိကအခြေစိုက်ရာ မြဝတီမြို့နယ်တွင် ယင်းလုပ်ငန်းများမှ ငွေ
ကြေးအမြောက်အများရရှိခဲ့ကြောင်း ဥရောပသမဂ္ဂက အသိပေးထားသည်။
ထို့ကြောင့် BGF ဗိုလ်မှူးကြီး စောချစ်သူ၊ ဒုတိယဗိုလ်မှူးကြီး မုတ်သုန်နှင့် ဗိုလ်မှူး တင်ဝင်းတို့ကို ဥရောပသမဂ္ဂက ၂၀၂၄ နှစ်ကုန်ပိုင်းက အရေးယူပိတ်ဆို့မှုရှိခဲ့သည်။
(အာဏာသိမ်းခေါင်းဆောင် မင်းအောင်လှိုင် က
စောချစ်သူကို ၂၀၂၃ ဇန်နဝါရီတွင်သီရိပျံချီဘွဲ့ပေးအပ်စဥ်။ဓါတ်ပုံ-စစ်ကောင်စီ)
