မြစ်သားမြို့အနီးမြေငလျင်လှုပ်၊ သိသိသာသာခံစားလိုက်ရ
ဇွန်-၂၉၊၂၀၂၅။အိမ်သွင်/People’s Spring
မန္တလေးတိုင်း၊ မြစ်သားမြို့အနီးတွင် မြေအနက် ၆မိုင်ခန့်ကို ဗဟိုပြု၍ရစ်ခ်တာစကေး ၄ဒဿမ၈
အဆင့်ရှိ နောက်ဆက်တွဲမြေငလျင်လှုပ်ရှားသွားရာနေအိမ်အဆောက်အအုံများ သိသိသာသာလှုပ်ရမ်းသွားသည်။
စစ်ကိုင်းငလျင်ကြီးလှုပ်ပြီး သုံးလပြည့်ပြီးနာရီပိုင်းအလွန်တွင် နောက်ဆက်တွဲမြေငလျင်မှာ ဇွန်လ
၂၉ ရက်နံနက် ၁နာရီထိုးကာနီး ၌လှုပ်ရှားခဲ့ခြင်းဖြစ်ပြီး မြစ်သားမြို့အပြင် ကျောက်ဆည်၊ ဝမ်းတွင်း၊ မန္တလေးမြို့တို့တွင် ပါသိသိသာသာခံစားခဲ့ရကြောင်းလည်း ဒေသခံများကပြောသည်။
“အသံပါ ကြားပြီး လှုပ်တာပဲ။ နေရတာ မကောင်းဘူး။ ငလျင် ဘယ်တော့ လှုပ်မလဲလို့ နာရီနဲ့အမျှ စိုးရိမ်နေရတယ်”ဟု ကျောက်ဆည်မြို့ခံတစ်ဦးကပြောသည်။
အဆိုပါငလျင်မလှုပ်ခင်နာရီပိုင်းအလိုတွင် နေပြည်
တော်၌ ရစ်ခ်တာစကေး ၂ဒဿမ၉၊ မန္တလေးမြို့အနီး၌ ရစ်ခ်တာစကေး ၃ဒဿမ၉အဆင့်ငလျင်ငယ်များလှုပ်ခဲ့သည်။ ထိုနှစ်ကြိမ်စလုံးတွင်လည်းငလျင်အင်အားနည်းသော်လည်း လှုပ်ရှားမှုသိသာခဲ့သည်ဟု ဒေသခံများကပြောသည်။
မတ်လ ၂၈ရက်က အင်အားပြင်းငလျင်လှုပ်ခဲ့သည့် သုံးလပြည့်နေ့တွင် ငလျင်မကြာခဏလှုပ်ရှားနေ၍ ဘေးသင့်ဒေသမှပြည်သူများ စိုးရိမ်နေကြစဉ် ရစ်ခ်တာစကေး ၄အထက်ငလျင် ထပ်မံလှုပ်ရှားခြင်းဖြစ်သည်။
ဇွန်လဆန်းပိုင်းက ရစ်ခ်တာစကေး ၄ မှ ၅ကြား ငလျင်အချို့သည် ပဲခူးတိုင်း၊ ရှမ်းပြည်နယ်တောင်ပိုင်း၊ ကချင်ပြည်နယ် နှင့် မန္တလေးတိုင်းအတွင်း မကြာခဏ လှုပ်ခဲ့သည်။ ဇွန်လလယ်ပိုင်းတွင် ငြိမ်သက်နေရာမှ ယခု လကုန်ပိုင်း၌ နောက်ဆက်တွဲငလျင်များ ထပ်မံလှုပ်ရှားနေခြင်းဖြစ်သည်။
ဇွန်လ ၂၇ရက်က မန္တလေးမြို့အနီး၌ ရစ်ချ်တာ
စကေး ၄ဒဿမ၃အဆင့်၊ဇွန်လ ၂၅ရက်က ပြင်ဦးလွင်မြို့အနီး၌ ရစ်ချ်တာစကေး ၄ဒဿမ၄အဆင့်၊ဇွန်လ ၂၃ရက်က ပဲခူးတိုင်း ပြည်မြို့အနီး၌ ရစ်ခ်တာစကေး ၄ဒဿမ၂အဆင့်ငလျင်များလှုပ်ရှားခဲ့သည်။
အင်အားပြင်းငလျင်ကြီးများလှုပ်ခတ်ပြီးနောက် နောက်ဆက်တွဲမြေငလျင်များမှာ လနှင့်ချီ၍ ကြာတက်ကြောင်း မြေငလျင်ပညာရှင်များကပြောသည်။
မတ်လ ၂၈ရက်က စစ်ကိုင်းမြို့အနီးကိုဗဟိုပြု၍ ရစ်ချ်တာစကေး၇ ဒဿမ ၇ အဆင့်ရှိ အင်အားအလွန်ပြင်းထန်သောငလျင်ကြီလှုပ်ခဲ့ကာ မိနစ်ပိုင်းအကြာတွင် ရစ်ချ်တာစကေး ၆ ဒဿမ ၈ ငလျင်ကြီးမှာ တံတားဦးမြို့နယ်ကိုဗဟိုပြုလှုပ်ခတ်သော ကြောင့် မြန်မာ့သမိုင်းတလျှောက် လူသေဆုံးမှုနှင့် ပျက်စီးဆုံးရှုံးမှု အများဆုံးဖြစ်ခဲ့သည်။ ငလျင်ကြီးကြောင့် ထိခိုက်ပျက်စီးမှုများကို ပြန်လည်ထူထောင်ရေးလုပ်ငန်းများကောင်းစွာမလုပ်နိုင်သေးသလို သေဆုံးသူများကိုပင် အပြီး
သတ်ရှာဖွေနိုင်ခြင်းမရှိသေးပေ။ စစ်ကောင်စီသည် ငလျင်ဘေး ပြန်လည်ထူထောင်ရေးအစား ရွေးကောက်ပွဲလုပ်နိုင်ရေးကိုသာ ဦးစားပေးလုပ်
ကိုင်နေသည်ဟု ငလျင်ဘေးသင့်ခဲဲ့သူများက ဝေဖန်နေကြသည်။
(မန္တလေးမြို့တွင် စစ်ကိုင်းငလျင်ကြီးလှုပ်ပြီး ၃ လပြည့်သည့်တိုင် ပျက်စီး အဆောက်အအုံများရှင်းလင်း၍ မပြီးသေးသလို ပြည်သူများမှာ ကိုယ်
ထူကိုယ်ထ ရှင်းလင်းနေကြရခြင်းဖြစ်သည်။
ဓါတ်ပုံ-ZA )
