ထောက်ကြန့်မြို့နယ်ရှိ အမှတ် ၃လမ်းနှင့် အမှတ် ၇ လမ်းဆုံမှ စစ်ကောင်စီတပ် ဘန်ကာကင်းကို မိုင်းခွဲတိုက်ခိုက်…
ဇွန် ၁၄ ၊ ၂၀၂၅
ရန်ကုန်တိုင်း၊ ထောက်ကြန့်မြို့နယ်က အကြမ်းဖက်စစ်ကောင်စီတပ်ရဲ့ ဘန်ကာကင်းကို အဝေးထိန်းမိုင်းတွေနဲ့ သွားရောက်ဖောက်ခွဲတိုက်ခိုက်ခဲ့တယ်လို့ Operation Flame (OF) အဖွဲ့ရဲ့ သတင်းနဲ့ပြန်ကြားရေးတာဝန်ခံက မောင်းသတင်းဌာနကို ပြောပါတယ်။
ဇွန်လ ၁၃ ရက် မနေ့ကညပိုင်းက တော်လှန်ရေးပြောက်ကျားတပ်ဖွဲ့ဝင်တွေက အကြမ်းဖက်စစ်ကောင်စီတပ်ဖွဲ့ဝင်တွေ ရှိနေတဲ့ အမှတ် ၃ လမ်းနဲ့ အမှတ် ၇ လမ်းဆုံက ဘန်ကာကို မိုင်းခွဲတိုက်ခိုက်ခဲ့တာဖြစ်ပြီး စစ်ကောင်စီတပ်သားတွေ ထိခိုက်မှုရှိတယ်လို့ သိရပါတယ်။
“အဝေးထိန်း ၂ လုံးသုံးခဲ့ပေမယ့် ၁ လုံးပဲ ကောင်းကောင်း အောင်တယ်။ နောက် ၁ လုံးက ပေါက်ကွဲအား နည်းသွားတယ်။ သိရသလောက် စစ်ခွေးအစောင့် ၃ ကောင်အပြင်ထွက်ချိန် ဆွဲလိုက်တာမှာ ၁ ကောင်ပဲ ထိပြီး လဲကျသွားတယ်ပေါ့။ နောက်ဆက်တွဲထိခိုက်မှုတွေကိုတော့ မြေပြင်ထောက်လှမ်းနေဆဲပါ။”လို့ Operation Flame (OF) ရဲ့ သတင်းနဲ့ ပြန်ကြားရေးတာဝန်ခံက မောင်းသတင်းဌာနကို ပြောပါတယ်။
မိုင်းခွဲတိုက်ခိုက်မှုလုပ်ဆောင်ပြီးတဲ့နောက် ပြောက်ကျားရဲဘော်တွေလည်း ဘေးကင်းရာ ပြန်လည်ဆုတ်ခွာလာနိုင်ခဲ့တယ်လို့ Operation Flame (OF) က သတင်းထုတ်ပြန်ထားပါတယ်။
အဲ့ဒီဖောက်ခွဲတိုက်ခိုက်မှုကို လုပ်ဆောင်ခဲ့တဲ့ Operation Flame (OF) အနေနဲ့ ဆက်လက်ပြီး ရန်ကုန်တော်လှန်ရေးမဟာမိတ်တွေအားလုံးနဲ့ လက်တွဲကာ အကြမ်းဖက်စစ်တပ်ကို အရှိန်မြင့် တိုက်ခိုက်ချေမှုန်းသွားမယ်လို့ ဆိုပါတယ်။
ပြီးခဲ့တဲ့ မေလတစ်လလုံးမှာလည်း ရန်ကုန်တိုင်းထဲကအကြမ်းဖက်စစ်ကောင်စီထောက်တိုင် ယန္တရားတွေကို မြို့ပြပြောက်ကျားတပ်ဖွဲ့ဝင်တွေက ၈ ကြိမ် တိုက်ခိုက်ခဲ့ပါသေးတယ်။
ပုံစာ – ရန်ကုန်မြို့အတွင်း တွေ့ရတဲ့ စစ်တပ်ဘန်ကာတစ်ခု (ပုံဟောင်း)
