စစ်အုပ်စု၏ ရာဇဝတ်မှုများတွင် ကျူးလွန်သူ၊ စေခိုင်းသူ၊ ပံ့ပိုးကူညီသူနှင့် သတင်းမှား ဖြန့်ချိသူအားလုံးကို အရေးယူနိုင်ရေး လုပ်ဆောင်မည်ဟု NUG ထုတ်ပြန်…
၂၀၂၃ ခုနှစ်မှ ယခု မေလ (၁၂) ရက်အထိ စစ်အုပ်စု လေကြောင်းတိုက်ခိုက်မှုများကြောင့် အသက် (၁၈) နှစ်အောက် ကလေးငယ် (၄၄၁) ဦးအပါ အရပ်သားပြည်သူ ၃,၀၄၃ ဦး သေဆုံးခဲ့…
မေ ၁၆၊ ၂၀၂၅
မြန်မာနိုင်ငံတစ်ဝန်း အကြမ်းဖက်စစ်အုပ်စု ကျူးလွန်နေတဲ့ ရာဇဝတ်မှုတွေမှာ ကျူးလွန်သူ၊ စေခိုင်းသူ၊ ပံ့ပိုးကူညီသူနဲ သတင်းမှား ဖြန့်ချိသူအားလုံးကို နိုင်ငံတကာတရားရုံးတွေနဲ့ နိုင်ငံအလိုက်တရားရုံးတွေမှာသာမက ပြည်တွင်းတရားဥပဒေတွေနဲ့ပါ အရေးယူနိုင်ရေး အစွမ်းကုန် ကြိုးပမ်းသွားမယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ကြေညာပါတယ်။
အကြမ်းဖက် စစ်အုပ်စုကျူးလွန်ခဲ့၊ ကျူးလွန်နေဆဲဖြစ်တဲ့ စစ်ရာဇဝတ်မှုတွေမှာ အဓိကတာဝန်ရှိသူ စစ်ခေါင်းဆောင်တွေ၊ အမိန့်ပေးစေခိုင်းသူ အရာရှိတွေ၊ လက်တွေ့လုပ်ကိုင်ဆောင်ရွက်သူ လေယာဉ်မှူးတွေ၊ အကြမ်းဖက် တပ်ဖွဲ့ဝင်တွေ၊ ပံ့ပိုးကူညီသူ အားပေးအားမြှောက်ပြုသူတွေနဲ့ သတင်းမှန်ကို ဖုံးကွယ်လိမ်ညာနေတဲ့ စစ်တပ်လော်ဘီတွေအားလုံးကို ဥပဒေနဲ့အညီ အပြစ်ပေး အရေးယူနိုင်ရေးအတွက် နိုင်ငံတကာတရားရုံးတွေနဲ့ နိုင်ငံအလိုက်တရားရုံးတွေမှာသာမက ပြည်တွင်းတရားဥပဒေတွေနဲ့ပါ တရားမျှတမှုဖော်ဆောင်နိုင်ရေး အစွမ်းကုန်ကြိုးပမ်းဆောင်ရွက်သွားမယ်လို့ ဆိုပါတယ်။
NUG အစိုးရအနေနဲ့ အကြမ်းဖက်စစ်တပ်ရဲ့ လေကြောင်းတိုက်ခိုက်မှုတွေ ရပ်တန့်ရေးနဲ့ အဆိုပါ တိုက်ခိုက်မှုတွေအတွင်း ပြည်သူလူထု အသက်အိုးအိမ်စည်းစိမ် ထိခိုက်ဆုံးရှုံးမှု နည်းနိုင်သမျှ နည်းနိုင်ရေးအတွက် နည်းလမ်းပေါင်းစုံအသုံးပြုကာ အစွမ်းကုန် ဆောင်ရွက်သွားမယ်လို့လည်း ဆိုပါတယ်။
NUG လူ့အခွင့်အရေးဆိုင်ရာဝန်ကြီးဌာနက ပြုစုထားတဲ့ အချက်အလက်တွေအရ ၂၀၂၃ ခုနှစ် ဇန်နဝါရီလ (၁) ရက်ကနေ ပြီးခဲ့တဲ့ မေလ (၁၂) ရက်အထိ အကြမ်းဖက်စစ်အုပ်စုဟာ ရန်ကုန်နဲ့ နေပြည်တော်ကလွဲပြီး ကျန်တိုင်းနဲ့ ပြည်နယ် (၁၃) ခုမှာ လေကြောင်းတိုက်ခိုက်မှု ဖြစ်စဉ်ပေါင်း ၂,၆၇၉ ခု ပြုလုပ်ခဲ့ရာ အရပ်သားပြည်သူ ၃,၀၄၃ ယောက် သေဆုံးခဲ့တယ်လို့ သိရပါတယ်။
သေဆုံးသူတွေထဲမှာ အသက် (၁၈) နှစ်အောက် ကလေးငယ် (၄၄၁) ယောက် ပါဝင်ပြီး စစ်ကောင်စီရဲ့လေကြောင်းတိုက်ခိုက်မှုတွေကြောင့် စာသင်ကျောင်း (၂၄၀) ကျောင်း၊ ဆေးရုံ၊ ဆေးခန်း (၉၆) ခုနဲ့ ဘာသာရေးအဆောက်အဦး (၄၃၅) ခု ပျက်စီးဆုံးရှုံးခဲ့ရတယ်လို့ NUG က ဆိုပါတယ်။
အကြမ်းဖက်မင်းအောင်လှိုင် ဦးဆောင်တဲ့ စစ်အုပ်စုရဲ့ အကြမ်းဖက်လေတပ်ဟာ မေလ (၁၂) ရက် မနက်ပိုင်းက ဒီပဲယင်းမြို့နယ်၊ အိုးတိန်တွင်းကျေးရွာရှိ စာသင်ကျောင်းကို ဗုံးကြဲတိုက်ခိုက်ခဲ့ရာ ကျောင်းသူကျောင်းသား အယောက် (၂၀) နဲ့ ဆရာမ (၂) ယောက် နေရာမှာပဲ သေဆုံးခဲ့ပြီး အယောက် (၁၀၀) ကျော် ပြင်းထန်ဒဏ်ရာတွေနဲ့ ဆေးဝါးကုသမှု ခံယူနေရတာ ဖြစ်ပါတယ်။
ဒဏ်ရာရသူတွေထဲက မေလ (၁၃) ရက်မှာ ကျောင်းသား ၁ ယောက်၊ မေလ (၁၄) ရက်မှာ ကျောင်းသူတစ်ယောက် ထပ်မံသေဆုံးခဲ့ပြီး ပညာသင်ကြားနေရင်း အသက်ဆုံးရှုံးခဲ့ရတဲ့ ကျောင်းနေအရွယ် ကလေးငယ်တွေ၊ ဆရာ၊ ဆရာမ တွေနဲ့ ကျန်ရစ်သူမိသားစုတွေအားလုံးအတွက် များစွာဝမ်းနည်းနာကျင်ရကြောင်း NUG က ဆိုပါတယ်။
မေလ (၁၃) ရက်ကလည်း အကြမ်းဖက်စစ်တပ်က ရခိုင်ပြည်နယ်၊ ရသေ့တောင်မြိုနယ်၊ ထွန်းရဝေကျေးရွာ (ဟောင်း)ကို လေကြောင်းကနေ ဗုံးကြဲခဲ့ရာ ကလေးငယ်တွေနဲ့ မိခင်တွေအပါအဝင် ပြည်သူ (၁၂) ယောက် သေဆုံးပြီး (၂၃) ယောက် ထိခိုက်ဒဏ်ရာရရှိခဲ့တယ်လို့ သိရပါတယ်။
ဒါ့အပြင် မေလ (၁၂) ရက်နဲ့ (၁၃) ရက်တွေမှာလည်း စစ်ကိုင်းတိုင်း မြင်းမူမြို့၊ ရှမ်းပြည်နယ်မြောက်ပိုင်းရှိ မန်တုံမြို့၊ မိုင်းငေါ့မြို့နဲ့ နောင်ချိုမြို့၊ မန္တလေးတိုင်း၊ မိုးကုတ်မြို့ ၊ စစ်ကိုင်းတိုင်း၊ ဝက်လက်မြို့နဲ့ ရွှေဘိုမြို့က ကျေးရွာ(၂)ရွာ ၊ ပဲခူးတိုင်း ရွှေကျင်မြို့ စတဲ့နေရာတွေမှာလည်း လေကြောင်းတိုက်ခိုက်မှုတွေ ပြုလုပ်ခဲ့ပြီး အရပ်သားပြည်သူတွေ သေဆုံးခဲ့ရတယ်လို့ NUG ရဲ့ ထုတ်ပြန်ချက်မှာ ဖော်ပြထားပါတယ်။
အပစ်အခတ်ရပ်စဲရေး ဟန်ပြထုတ်ပြန်ထားတဲ့ အကြမ်းဖက်စစ်တပ်ဟာ လက်တွေ့မှာတော့ လေကြောင်းတိုက်ခိုက်မှုတွေ၊ လက်နက်ကြီးနဲ့ တိုက်ခိုက်မှုတွေ၊ လူအစုလိုက်အပြုံလိုက် သတ်ဖြတ်မှုတွေကို နေ့စဉ်ရက်ဆက်ဆိုသလို ကျူးလွန်နေတဲ့အပြင် အဆိုပါ စစ်ရာဇဝတ်မှုတွေ မကျူးလွန်ကြောင်းကိုလည်း အကြမ်းဖက်စစ်တပ်ရဲ့ မီဒီယာတွေ ဖြစ်တဲ့ MRTV, MWD တို့ကတဆင့် ဗြောင်ကျကျ ငြင်းဆန်တဲ့ သတင်းမှားတွေ ထုတ်လွှင့်နေပြီး စစ်တပ်လော်ဘီများစွာကို ငွေပေးအသုံးပြုကာ သတင်းတုတွေ၊ ပုံဖျက်ထားတဲ့ အချက်အလက်တွေ ဖြန့်ချိပြီး ဖုံးကွယ်ဖို့ ကြိုးစားနေတယ်လို့ NUG က ဆိုပါတယ်။
ကုလသမဂ္ဂအပါအဝင် နိုင်ငံတကာအသိုင်းအဝိုင်းအနေနဲ့လည်း အကြမ်းဖက်စစ်တပ်ရဲ့ စစ်ရာဇဝတ်မှုတွေ ကျူးလွန်နေပြီး လိမ်ညာဝါဒဖြန့်နေမှုတွေကို အမှန်အတိုင်းသိမြင်ကာ စစ်အုပ်စုရဲ့ ရာဇဝတ်မှု ကျူးလွန်နေမှုတွေ ရပ်တန့်စေရေးအတွက် လက်တွေ့ကျတဲ့ အရေးယူ ဖိအားပေးဆောင်ရွက်မှုတွေ ပြုလုပ်နိုင်ဖို့ NUG က တိုက်တွန်းထုတ်ပြန်ထားပါတယ်။
ပုံစာ – အကြမ်းဖက်စစ်တပ် စစ်ရေးပြအခမ်းအနားမှ မင်းအောင်လှိုင်နှင့် ဒီပဲယင်း၊ ရသေ့တောင်မြို့နယ်များတွင် စစ်ကောင်စီ လေကြောင်းတိုက်ခိုက်မှုကြောင့် ထိခိုက်သေဆုံးမှုများ