မင်းအောင်လှိုင် လာရန် ရှိနေ၍ မန္တလေးရှိ ငလျင်ဒဏ်သင့် အဆောက်အအုံများ အမြင် တင့်တယ်စွာ ထားရန်နှင့် အပြိုအပျက်အစီးများကို အမြန်ဆုံးရှင်းလင်းရန် စည်ပင်နှင့်စစ်တပ်က အိမ်ပိုင်ရှင်များကို သတိပေး လက်မှတ်ထိုးခိုင်း
ရန်ကုန်၊ မေ ၁၃
အကြမ်းဖက် စစ်ခေါင်းဆောင် မင်းအောင်လှိုင်နှင့်အဖွဲ့ လာရောက်ရန် ရှိနေ၍ မန္တလေးရှိ ငလျင်ဒဏ်သင့် အ ဆောက် အအုံများကို အမြင်တင့်တယ်စွာ ကာ ရန်ထားကြရန်၊ အပြိုအပျက်အစီးများကို အမြန်ဆုံးရှင်းလင်းရန် မန္တလေးစည်ပင်နှင့်စစ်ကောင်စီက ငလျင်ဒဏ်သင့်နေအိမ်နှင့်အဆောက်အအုံပိုင်ရှင်များကို သတိပေးလက် မှတ်ထိုးခိုင်းလာကြောင်း မန္တလေးမှ အိမ်ပိုင်ရှင်တချို့က ရန်ကုန်ခေတ်သစ်သတင်းဌာနထံသို့ ပြောဆိုသည်။
စစ်ကောင်စီလက်အောက်ခံ မန္တလေးစည်ပင်က ငလျင်ဒဏ်သင့် မန္တလေးမှ အိမ်ပိုင်ရှင်များကို အမိန့် အမျိုးမျိုးထုတ်၍ ဖိအားပေးမှုများ လုပ်ဆောင်လျက်ရှိကြောင်း၊ မေလအတွင်း မန္တလေးတွင် ငလျင်ဒဏ်သင့် အဆောက် အဦများကို အမြင်တင့်တယ်စွာ ကာရံထားရန်၊ ပြန်ပြင်မည်ဆိုလျှင် ခွင့်ပြု ချက်ယူရန်နှင့် ဆောက်လုပ်ဆဲ အ ဆောက် အအုံများ အားလုံး ရပ်ဆိုင်းထားရန် အမိန့်ထုတ်ခဲ့ကြောင်း၊ ယခုနောက်ဆုံးတွင် မင်းအောင်လှိုင် လာရောက် ရန်ရှိနေ၍ အပြိုအပျက်အစီးများကို အမြန်ဆုံးရှင်းလင်းရန်၊ မဖြိုနိုင်သေးသော အဆောက် အအုံများကို အမြင်တင့်တယ်အောင် ကာရန်ထားရန် ညွှန်ကြားလာကြောင်း သိရှိရသည်။
” လူကြီးလမ်းကြောင်းရှိတယ်။ အဲဒါကြောင့် ငလျင်အပြိုအပျက်အစီးတွေ အမြန်ဆုံးရှင်းရမယ်။ အမြင်မတင့် တယ်တဲ့ အဆောက် အအုံတွေကိုလည်း ကာ ရန်ထားရမယ်။ အဲဒါကို စည်ပင်နဲ့ နန်းတွင်း တပ်က အရာရှိဆိုတာက ခေါ်ပြောတယ်။ ညွှန်ကြားချက်ကို သိရှိကြောင်း လက်မှတ်ထိုးခိုင်းတယ်” ဟု မန္တလေးမှ ငလျင်ကြောင့် တိမ်းစောင်းခဲ့သော ၂ ထပ်တိုက် အိမ်ပိုင်ရှင်တစ်ဦးက ဆိုသည်။
အကြမ်းဖက် မင်းအောင်လှိုင်သည် ယခု မေလ ၁၈ ရက်နေ့ ဝန်းကျင် (သို့မဟုတ်) မေလနှောင်းပိုင်းအတွင်း လာရောက်ရန် ဖွယ်ရှိသည်ဟု စည်ပင်က အလွတ်သဘော အသိပေးလာသည်ဟု အခြားအိမ်ပိုင်ရှင်တစ်ဦးက ဆိုသည်။
မန္တလေးစည်ပင်က ငလျင်ကြောင့် တိမ်းစောင်းသွားသည့် အထပ်မြင့်တိုက်တာများကို ဖြိုဖျက်ခြင်းများကို ခွင့်ပြုချက်ရှိမှ ဖြို ဖျက်ရမည်ဟု ညွှန်ကြားကြောင်း၊ ၂ ထပ်နှင့် ၃ ထပ်တိုက်တာများကိုမူ ပတ်ဝန်းကျင်ထိခိုက်မှု မရှိလျှင် ရပ်ကွက်အုပ်ချုပ်ရေးအဖွဲ့ထံသို့ အကြောင်းကြား၍ ဖြိုဖျက်ခွင့်ပြုကြောင်း၊ စည်ပင်က လာရောက်ဖြိုဖျက်ပေးရန် လျှောက်ထားမည်ဆိုပါက အနည်း ဆုံး ၃ လ စောင့်ဆိုင်းခိုင်းကြောင်း သိရှိရသည်။
အခြားတစ်ဖက်တွင်လည်း မန္တလေးစည်ပင်က ငလျင်ဒဏ်သင့် အဆောက်အဦများတွင် အပြာရောင်၊လိမ္မော် ရောင်၊အနီရောင်အဆင့်ဟူ၍ ကွင်းဆင်းစစ်ဆေးကာ ခွဲခြားပေးလျက်ရှိပြီးအဆိုပါ အဆောက်အဦများပြင်ဆင်ရန် အတွက် လိုင် စင်ရအင်ဂျင် နီယာများ၏ ထောက်ခံချက် နှင့်အတူ မန္တလေးစည်ပင်သို့ လျှောက်ထားရမည်ဟု ကြေညာထားသည်။
အလားတူ မန္တလေး ၆ မြို့နယ်အတွင်း ဆောက်လုပ်ဆဲ အဆောက်ဦများကိုလည်း ရပ်ဆိုင်းထားရမည်ဖြစ်ပြီး ဆောက် လုပ်ဆဲ အဆောက်ဦများ၏ ပင်မတိုင်များ ပျက်စီးမှု ရှိ၊ မရှိကို စစ်ကောင်စီ၏ စစ်ဆေးရေးအဖွဲ့က စစ်ဆေးပြီးမှသာ ဆက်လက် ဆောက် လုပ်ခွင့်ပေး၊ မပေး ဆုံးဖြတ်မည်ဖြစ်သည်ဟု သိရှိရသည်။
