ရန်ကုန်မှာ တာမွေမြို့မရဲစခန်း လက်ပစ်ဗုံးပစ်သွင်းတိုက်ခိုက်ခံရပြီး ရဲ ၃ယောက်သေ
သြဂုတ် ၂၉၊ ၂၀၂၄
ရန်ကုန်တိုင်း၊ တာမွေမြို့နယ်မှာ တာမွေမြို့မရဲစခန်း လက်ပစ်ဗုံးနဲ့ ပစ်ခတ်တိုက်ခိုက်ခံရပြီး စခန်းထဲမှာရှိနေတဲ့ ရဲ၃ယောက် သေဆုံးသွားကြောင်း သိရပါတယ်။
သြဂုတ်လ ၂၈ရက်၊ မနေ့က နေ့လည်ပိုင်းမှာ တာမွေမြို့နယ်၊ ဗညားဒလမ်းမပေါ်က တာမွေမြို့မရဲခစန်းကို Anonymous Force (ရန်ကုန်စစ်ဒေသခွဲ-PRF) ရဲဘော်တွေက လက်ပစ်ဗုံး ပစ်သွင်းတိုက်ခိုက်ခဲ့တာဖြစ်ပြီး အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။
“ဟုတ်တယ်ဗျ မွန်းလွဲ ၂နာရီ မိနစ်၄၀ လောက်မှာ လက်ပစ်ဗုံးပစ်သွင်းတိုက်ခိုက်ခဲ့တာပါ။ ၁လုံးပဲသုံးခဲ့တယ်ခင်ဗျ။ မြို့ထဲဖြစ်နေလို့ အတော်လေးတော့ကြိုးစားခဲ့ရပါတယ်။ ရဲ ၂ ယောက်နေရာတင် ပွဲချင်းပြီးသေပြီး ကျန်တဲ့ ၁ယောက်ကတော့ ဒဏ်ရာအပြင်းအထန်ရပြီးမှ သေတယ်လို့သိရတယ်။ ဗုံးပေါက်ပေါက်ချင်း အသံစကြားကြတော့ အကုန်လုံးကြောင်သွားတဲ့သဘောမှာတော့ရှိတယ်။ မကြာဘူး။ အဲ့နားပတ်ချာလည်မှာ စစ်ဆေးတာတွေနဲ့ လူနာတင်ယာဉ်တွေရောက်လာပြီး စခန်းထဲက သေနေတာတွေ ခေါ်ထုတ်သွားတာပါပဲ။”လို့ ပြည်သူ့တော်လှန်ရေးအင်အားစု-PRF တာဝန်ခံ ရဲဘော်မြတ်ကျော်က မောင်းကိုပြောပါတယ်။
စစ်ကောင်စီရဲ့ အကျိုးစီးပွားကိုကာကွယ်ရင်း အရပ်သားပြည်သူတွေကို ဖိနှိပ်နေတဲ့ တာမွေရဲစခန်းကို Anonymous Force (ရန်ကုန်စစ်ဒေသခွဲ-PRF) ရဲဘော်တွေက ” Cheetah Operation” ရဲ့တစ်စိတ်တစ်ပိုင်းအဖြစ် အခုလို ဗုံးခွဲတိုက်ခိုက်ခဲ့တာလို့လည်း ပြည်သူ့တော်လှန်ရေးအင်အားစု-PRF က ထုတ်ပြန်ပါတယ်။
၂၀၂၃ ခုနှစ်၊ ဇန်နဝါရီလက စတင်ခဲ့တဲ့ “Cheetah Operation” အနေနဲ့ အကြိမ် ၄၀ ကျော်အထိ အောင်မြင်အောင်လုပ်ဆောင်ထားနိုင်ပြီး လက်ရှိမှာ Operation အပိုင်း ၂ အဖြစ် ဆက်လက်လုပ်ဆောင်နေတယ်လို့လည်း ရဲဘော်မြတ်ကျော်က ပြောပါတယ်။
” Operation လုပ်ဆောင်ရင်း ကိုယ့်ဘက်က ထိခိုက်ကျရှုံးသွားတာတွေလည်းအများကြီးရှိပါတယ်။ မြို့ထဲမှာပဲ သတင်းပေါ်မရောက်ဘဲ ပျောက်သွားတာတွေမျိုးပေါ့။ အခုချီတာစစ်ဆင်ရေး အပိုင်း၂ မှာတော့ စစ်အုပ်ချုပ်ရေးအပိုင်းနဲ့ စစ်အုပ်စုကို အဓိက ထားဖြိုဖျက်သွားကြမှာပါ။ အပိုင်း ၁၊ ၁၈ လ၊ ကာလတုန်းက လိုအပ်ချက်တွေကို ပြန်လည်သုံးသပ်ပြီး အားနည်းချက်တွေ ဖြည့်ရင်းနဲ့ အရှိန်ပြန်မြှင့်မှာပေါ့” လို့ ပြည်သူ့တော်လှန်ရေးအင်အားစု-PRF တာဝန်ခံ ရဲဘော်မြတ်ကျော်က မောင်းကို ပြောခဲ့ပါတယ်။
