စစ်ကောင်စီက ငလျင်ဒဏ်ကြောင့် ပြိုကျသည့် အဆောက်အဦများကို ချက်ချင်းဖယ်ရှားခိုင်းနေပြီး စက်နှင့်အလုပ်သမားခ သိန်းရာချီ ပေါက်ဈေးရှိနေ
ဧရာဝတီတိုင်းမ်
ဧပြီ ၃ ရက်
အင်အားပြင်းငလျင်ဒဏ်ခံစားခဲ့ရသည့် မန္တလေးမြို့တွင် အဆောက်အဦများ ပြိုကျအက်ကွဲမှုများရှိသည့် အတွက် ဒေသခံများလမ်ဘေးတွင် နေထိုင်စားသောက်နေရသည်ကို စစ်ကောင်စီက ဖယ်ရှားခိုင်းနေ ကြောင်း သိရသည်။
ငလျင်ကြောင့် ပြိုကျပျက်စီးသွားသည့် အဆောက်အဦများကို ဖယ်ရှားရာတွင် စက်ယန္တယားနှင့် အလုပ်သမားငှားခမှာ သိန်းရာချီသည် အထိ ပေါက်ဈေးရှိနေကြောင်း မန္တလေးဒေသခံများထံမှ သိရသည်။
ကျုံးဘေးတွင် သင်္ကြန်ကာလ မဏ္ဍပ်ဆောက်မည်ဖြစ်၍ ငလျင်ဒဏ်ခံ ပြည်သူများကျုံးဘေးတွင် နေထိုင် နေသည်ကို စစ်ကောင်စီက အမြန်ဆုံးဖယ်ရှားခိုင်းထားကြောင်း သိရသည်။
“ငလျင်လှုပ်ပြီးစ နေ့မှာ မြေတူးစက် တစ်နာရီ နှစ်သိန်း။ အဲဒါတောင်အဆက်အသွယ်ရှိမှ ငှားလို့ရတာ။ ဒီနေ့ဆို တစ်နာရီ ငါးသိန်းအထက်ရောက်သွားပြီပြောတယ်” ဟု မန္တလေးမြို့နေ ငလျင်ဘေးသင့် အမျိုးသား တစ်ဦးက ဧရာဝတီတိုင်းမ်ကို ပြောသည်။
စစ်ကောင်စီက ပျက်စီးသွားသည့်အဆောက်အဦများကို ၁၅ ရက်အတွင်း ဖယ်ပေးရမည်ဟု ဒေသခံ များထံ ပြောဆိုထားသည့်အတွက် အလုပ်သမားငှားရမ်းခဈေးများမှာ မြင့်တက်လျက်ရှိကြောင်း သိရသည်။
“အပျက်အစီးနည်းရင် အလုပ်သမားခက သိန်း ၃၀ ကစတယ်။ ဖြိုချရမယ်ဆိုရင် သိန်း ၄၀၀ အထိ တောင်းတာရှိတယ်။ ရွှေငွေစာရွက်စာတမ်းနဲ့ တန်ဖိုးရှိတာတွေကိုလည်း လုံခြုံမှုမပေးနိုင်ဘူး”ဟု ဒေသခံအမျိုးသမီး တစ်ဦးက ဧရာဝတီတိုင်းမ်ကို ပြောသည်။
မမ္တလေးမြို့အတွင်းရှိ အဆောက်အဦများမှာ ပျက်စီး ဆုံးရှုံးမှုများသည့်အတွက် ကယ်ဆယ်ရေးနှင့် စက်အင်အားမလုံလောက်ဘဲ ပြည်သူများမှာ လမ်းဘေးနှင့် ကျုံးနံဘေးအနီးတဝိုက်တွင် ဆင်း၍ နေထိုင်နေရကြောင်း သိရသည်။
စစ်ကိုင်ကို ဗဟိုပြု၍ ရစ်(ချ်)တာစကေး ၇ ဒသမ ၇ နှင့် ၇ဒသမ၅ ပြင်းအားရှိ ငလျင်ကြီး လှုပ်ခတ်ပြီးနောက် မန္တလေးနှင့် နေပြည်တော်တို့တွင် အင်အား ၅ဒသမ၁ အဆင့်ရှိ ငလျင်ငယ်များ ဆက်တိုက်လှုပ်ခတ်မှုများရှိကြောင်း ငလျင်အန္တရာယ်စောင့်ကြည့်အဖွဲ့များထံမှ သိရသည်။
ဓာတ်ပုံ-Mg Nyarna
ပုံစာ-မန္တလေးတွင် ငလျင်ကြောင့် ပြိုပျက်သွားသည့် အဆောက်အဦကို စက်ယန္တယားနှင့်ဖယ်ရှားရန် ပြင်ဆင်နေစဉ်
