ငလျင်ကြောင့် သေဆုံးသူ ၃၀၀၀ ကျော်သွားပြီဟု စစ်ကောင်စီ ထုတ်ပြန်
ဧပြီ ၃၊ ၂၀၂၅
ဆိုးရွားပြင်းထန်တဲ့ အင်အားပြင်းငလျင်ကြောင့် ဒီနေ့ ဧပြီလ ၃ ရက်နေ့ မနက်အစောပိုင်းအထိ သေဆုံးသူ အရေအတွက် ၃၀၀၀ ကျော်သွားပြီဖြစ်တယ်လို့ အာဏာသိမ်း စစ်ကောင်စီက ထုတ်ပြန်ပါတယ်။
မတ်လ ၂၈ ရက်ကနေ ဒီနေ့ ဧပြီလ ၃ ရက်အထိ ငလျင်လှုပ်ခတ်အပြီး ၇ ရက်တာအတွင်း သေဆုံးသူ တွေဟာ တရိပ်ရိပ်တိုးနေပြီး အရေအတွက်အားဖြင့် ၃၀၈၅ ယောက်အထိ ရှိလာပြီဖြစ်ပါတယ်။
ကယ်ဆယ်ရေးနဲ့ ရှာဖွေရေးလုပ်ငန်းတွေ ဆက်လက်လုပ်ဆောင်နေပြီး အခက်အခဲမျိုးစုံနဲ့လည်း ရင်ဆိုင်နေရတယ်လို့ ကူညီကယ်ဆယ်ရေးလုပ်ဆောင်နေသူတွေက ဆိုပါတယ်။
ကယ်ဆယ်ရေးလုပ်ငန်းတွေမှာ ယန္တရားတွေကို အသုံးပြုနိုင်ရင် မြန်ဆန်စွာ ရှာဖွေရေး လုပ်ဆောင်နိုင်ပေမယ့် မြေပြင်မှာ ယန္တရားတွေကို ထင်သလောက် အသုံးပြုနိုင်မှုမရှိတာကြောင့် အခက်အခဲတွေ ရှိနေတယ်လို့ ကူညီကယ်ဆယ်ရေး လုပ်ဆောင်နေသူတွေက ပြောပါတယ်။
တဆက်တည်းမှာပဲ နိုင်ငံတစ်ဝန်း ငလျင်ကြောင့် ဒဏ်ရာရရှိသူ ၄၇၁၅ ယောက်နဲ့ ပျောက်ဆုံးသူ ၃၄၁ ယောက်အထိ ရှိနေတယ်လို့ စစ်ကောင်စီရဲ့ ထုတ်ပြန်ချက်က ဆိုပါတယ်။
နိုင်ငံတစ်ဝန်း ထိခိုက်ပျက်စီးဆုံးရှုံးမှုတွေအဖြစ် လူနေအိမ် ၂၁၇၈၃ လုံး၊ ရုံးဌာနအဆောက်အဦး ၈၀၅ လုံး၊ ဝန်ထမ်းအိမ်ရာ ၁၁၅ လုံး၊ စာသင်ကျောင်း ၁၀၄၁ ကျောင်း၊ ဘုန်းကြီးကျောင်းနဲ့ သီလရှင်ကျောင်း ၉၁၂ ကျောင်း၊ ဘုရားစေတီ ၁၆၉၀ ဆူ၊ အခြား ဘာသာရေး အဆောက်အဦး ၃၁၂ လုံးနဲ့ ဆေးရုံဆေးခန်း ၄၈ လုံး ပျက်စီးခဲ့တယ်လို့ စစ်ကောင်စီက ထုတ်ပြန်ပါတယ်။