ဗန်းမော်မြို့ကို မိတ္တီလာလေတပ်မှ တက်လာသော စစ်တိုက်လေယာဉ်က ဗုံးကျဲပစ်ခတ်တိုက်ခိုက်
ရန်ကုန်၊ မတ် ၃၀
ကချင်ပြည်နယ်၊ ဗန်းမော်မြို့ကို မိတ္တီလာလေတပ်မှ တက်လာသော စစ်တိုက်လေယာဉ်က ဗုံးကျဲပစ်ခတ်တိုက်ခိုက်ခဲ့ကြောင်း ကချင်စစ်ရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ မွန်းတည့် ၁၂ နာရီကျော်အချိန် ဗန်းမော်မြို့ကို ဗုံးကျဲချသွားခြင်းဖြစ်ပြီး လက်ရှိအချိန်အထိ အထိအခိုက် အပျက်အစီး မသိရှိရသေးပေ။
ဗန်းမော်မြို့သည် ၂၀၂၄ ခုနှစ် ၊ ဒီဇင်ဘာလ ၄ ရက်နေ့မှစတင်၍ စစ်ကောင်စီတပ်များနှင့် KIA ဦးဆောင်သော တော်လှန်ရေးတပ်များအကြား အပြင်းအထန်တိုက်ပွဲဖြစ်ပွားနေသော မြို့ဖြစ်ပြီး တော်လှန်ရေးတပ်များက သိမ်းပိုက်ရန် ထိုးစစ်ဆင်နေခြင်းဖြစ်သည်။ လက်ရှိတွင် စစ်တပ်က စကခ ၂၁ အတွင်းမှ နေ၍ အပြင်းအထန် ခုခံနေပြီး လေကြောင်းတိုက်ခိုက်မှုများကို ဆက်တိုက် လုပ်ဆောင်နေခြင်းဖြစ်သည်။
မတ်လ ၂၈ ရက်နေ့ မွန်းလွဲ ၁၂ နာရီ ၅၂ မိနစ်အချိန် မန္တလေးကို ဗဟိုပြုနေသည့် ငလျင်ကြောင့် ပြည်သူများ ထိခိုက်သေဆုံးပြီး အဆောက်အအုံများစွာ ပြိုလဲနေသော်လည်း စစ်တပ်က လေကြောင်းတိုက်ခိုက်မှုများကို မရပ်မနား ဆက်လက် လုပ်ဆောင်နေခြင်းဖြစ်သည်။
NUG က ငလျင်ဒဏ်ကယ်ဆယ်ရေးအတွက် နှစ်ပတ် အပစ်ရပ်ထားသော်လည်း ပေါက်မြို့နယ်အတွင်းတွင် စစ်တပ်က စစ်ရဟတ်ယာဉ်ဖြင့် ဗုံးကျဲပစ်ခတ်တိုက်ခိုက်
ရန်ကုန်၊ မတ် ၃၀
မကွေးတိုင်း၊ ပေါက်မြို့နယ်အတွင်းတွင် အကြမ်းဖက်စစ်ကောင်စီတပ်က စစ်ရဟတ်ယာဉ်ဖြင့် ပစ်ခတ်ဗုံးကျဲ တိုက်ခိုက်ခဲ့ကြောင်း ပခုက္ကူခရိုင် အမှတ် ၁၅ တပ်ရင်းမှ တာဝန်ရှိသူတစ်ဦးက ရန်ကုန်ခေတ်သစ် သတင်းဌာနထံသို့ ပြောကြားသည်။
ယနေ့ မတ်လ ၃၀ ရက်နေ့ နံနက် ၁၀ နာရီ ၃၀ မိနစ်အချိန် ပေါက်မြို့နယ် အနောက်မြောက်ပိုင်းအတွင်းသို့ အကြမ်းဖက်စစ်ကောင်စီတပ်က စစ်ရဟတ်ယာဉ် ၁ စီးဖြင့် ဗုံးကျဲခဲ့ ပြီး ကပစ ၂၄ အတွင်းသို့ ဆင်းသက်သွားကြောင်း၊ ဗုံးကျဲတိုက်ခိုက်မှုကြောင့် ထိခိုက်ပျက်စီးမှုအခြေ အနေကို မသိရှိရသေးဘဲ သွားရောက် နေဆဲဖြစ်ကြောင်း သိရသည်။
“လေကြောင်းကနေ တိုက်ခိုက်သွားတာ ဟုတ်ပါတယ်။ ဖုန်းလိုင်းတွေလည်း အဆက်အသွယ်မရ သေးလို့ အသေးစိတ်အခြေအနေတော့ မသိရသေးဘူး ။ ထိခိုက်ပျက်စီးမှုတွေလည်း မေးလို့မရသေးပါ ဘူး” ဟု ပခုက္ကူခရိုင်အမှတ် ၁၅ တပ်ရင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံ သို့ ပြောကြားသည်။
အမျိုးသားညီညွတ်ရေးအစိုးရက ငလျင်ဒဏ်သင့် ပြည်သူများကို အရေးပေါ် ကူညီရေးနှင့် ကယ်ဆယ်ရေး လုပ်ဆောင်နိုင်ရန် ယနေ့ မတ်လ ၃၀ ရက်နေ့မှ ဧပြီလ ၁၂ ရက်နေ့အထိ နှစ်ပတ်ကြာ ထိုးစစ်များ ရပ်တန့်ကြောင်း ယမန်နေ့ ညပိုင်း ထုတ်ပြန်ကြေညာခဲ့သော်လည်း စစ်တပ်က လေကြောင်းတိုက်ခိုက်မှုများကို ဆက်လက် လုပ်ဆောင်လာခြင်းဖြစ်သည်။