နေပြည်တော် ပေါင်းလောင်းဆည် ငလျင်ဒဏ်ကြောင့် တမံနှင့် နံရံများ ထိခိုက်ပျက်စီးမှုရှိ၍ ပြည်သူများ သတိပြုရန် လိုအပ်နေ၊ ရေဖောက်ချမှု ရှိ၊ မရှိ အတည်မပြုနိုင်သေး
ရန်ကုန်၊ မတ် ၂၈
နေပြည်တော် ပေါင်းလောင်းဆည် ငလျင်ဒဏ်ကြောင့် ပျက်စီးမှု ရှိခဲ့ကြောင်း သက်ဆိုင်ရာ ဆည်မြောင်းသတင်းရင်းမြစ်တချို့က ပြောဆိုသည်။
ယနေ့ မတ်လ ၂၈ ရက်နေ့တွင် စစ်ကိုင်းတိုင်းကို ဗဟိုပြု၍ လှုပ်ခဲ့သော အင်အားပြင်း မြေငလျင်ကြောင့် နေပြည်တော် ပေါင်းလောင်းဆည် ထိခိုက်မှုရှိခဲ့ကြောင်း၊ ဆည်တာတမံ နံရံများ၊ မြေသားနံရံကြီးများ ကွဲအက်ခြင်းများ ၊ ထိခိုက်ပျက်စီးမှုများရှိကြောင်း သိရှိရသည်။
ပေါင်းလောင်းဆည်မှ ရေများ ဖောက်ချသည်ဆိုသော သတင်းများ ထွက်ပေါ်နေသော်လည်း ရန်ကုန်ခေတ်သစ်သတင်းဌာနက အတည်ပြုနိုင်ခြင်းမရှိသေးပေ။
ပေါင်းလောင်းဆည်နှင့် စစ်တောင်းမြစ်တစ်လျှောက်ရှိ နေပြည်တော်၊ ပျဥ်းမနား၊ ရေနီ ၊ ရေတာရှည်၊ တောင်ငူနှင့် ပဲခူးမှ မြို့များအနေဖြင့်လည်း ထိခိုက်မှုရှိထားသော ပေါင်းလောင်းဆည်အခြေအနေကြောင့် ရေဘေးအခြေအနေကို သတိထားရန် လိုအပ်နေကြောင်း သက်ဆိုင်ရာ ဆည်မြောင်းသတင်းရင်းမြစ်က အကြံပြုတိုက်တွန်းသည်။
