လေးနာရီလာ လေးနာရီပြတ်စနစ်ဖြင့် လျှပ်စစ်ဓာတ်အားဖြန့်ဖြူးနေသည့် ရန်ကုန်တိုင်းဒေသကြီး အရှေ့ပိုင်းခရိုင်အား အုပ်စုသုံးစုခွဲကာ လေးနာရီလာ ရှစ်နာရီပြတ်စနစ်သို့ ပြန်လည်ပြောင်းလဲ
လိုက်ကြောင်း မြို့နယ်လျှပ်စစ်ရုံးများ၏ ကြေညာချက်များအရ သိရသည်။
မတ် ၂၄ ရက်မှ စတင်ကာ ရန်ကုန်တိုင်းဒေသကြီး အရှေ့ပိုင်းခရိုင်တွင် ပါဝင်သည့် မြို့နယ်များကို ယင်းသို့ လျှပ်စစ်ဓာတ်အား ဖြန့်ဖြူးနေခြင်းဖြစ်သည်။
“A,B,C သုံးအုပ်စု ပြန်ဖြစ်သွားပါသဖြင့် ၄ နာရီလာ ၈ နာရီပျက် ဖြစ်မည်ဖြစ်ကြောင်း
အသိပေးအပ်ပါသည်” ဟု ရန်ကင်းမြို့နယ် လျှပ်စစ်ဓာတ်အားဖြန့်ဖြူးရေးအဖွဲ့က လူမှုကွန်ရက်တွင် ရေးသားထားသည်။
ရန်ကုန်တိုင်းဒေသကြီး အရှေ့ပိုင်းခရိုင်တွင် ရန်ကင်း၊ မြောက်ဒဂုံ၊ သာကေတ၊ ဒေါပုံ၊ သင်္ဃန်းကျွန်း၊ တာမွေ၊ မြောက်ဥက္ကလာပ၊ မင်္ဂလာတောင်ညွန့်၊ တောင်ဒဂုံ၊ အရှေ့ဒဂုံ၊ ဒဂုံဆိပ်ကမ်း၊ တောင်ဥက္ကလာပ၊ ဗိုလ်တထောင်၊ ပုဇွန်တောင်မြို့နယ်များ ပါဝင်သည်။
“ဒီနေ့မှ မီးက အရင်လို ၄ နာရီလာ ၄ နာရီပြတ်မဟုတ်တော့တာ သတိထားမိတယ်။ အခုလည်း မီးပြတ်နေတယ်” ဟု သာကေတမြို့နယ်တွင် နေထိုင်သူတစ်ဦးက ပြောကြားသည်။
ရန်ကုန်တိုင်းရှိ အရှေ့ပိုင်းနှင့် အနောက်ပိုင်း ခရိုင်နှစ်ခုကို ၄ နာရီအလှည့်ကျစနစ်၊ ကျန်ခရိုင်နှစ်ခုကို လေးနာရီလာ ရှစ်နာရီ ပိတ်စနစ်ဖြင့် လျှပ်စစ်ဓာတ်အားဖြန့်ဖြူးနေပြီး ဓာတ်အားပိုမိုရရှိပါက ညပိုင်းတွင် အပိုဆောင်းပေးနေကြောင်း လျှပ်စစ်စွမ်းအားဝန်ကြီးဌာနက မတ်လလဆန်းပိုင်းတွင် မီဒီယာများသို့ ဖြေကြားသည်။