မင်းအောင်လှိုင် ရုရှားမှ ပြန်ရောက်ပြီး ၁ ရက်အကြာ တရုတ်အထူးကိုယ်စားလှယ် နေပြည်တော်သို့ ရောက်ရှိလာ
ရန်ကုန် ၊ မတ် ၁၁
အကြမ်းဖက် စစ်ခေါင်းဆောင်မင်းအောင်လှိုင်ရဲ့ ရုရှားနဲ့ဘီလာရုစ် ခရီးစဉ်အပြီး တရုတ်နိုင်ငံရဲ့ အာဆီယံရေးရာ အထူးကိုယ်စားလှယ် တိန့်ရှီကျွင်းက နေပြည်တော်ရောက်လာပြီး စစ်ကောင်စီနိုင်ငံခြားဝန်ကြီး သန်းဆွေနဲ့ တွေ့ဆုံပါတယ်။
မတ်လ ၉ ရက်နေ့ မင်းအောင်လှိုင်က ရုရှားနိုင်ငံမှ နေပြည်တော်သို့ ပြန်လည်ရောက်ရှိပြီးတဲ့နောက် မတ်လ ၁၀ က်နေ့မှာ တရုတ်ကိုယ်စားလှယ် တိန့်ရှီကျွင်းဟာ စစ်ကောင်စီ နိုင်ငံခြားရေးဝန်ကြီး သန်းဆွေကို နေပြည်တော်မှာ လာတွေ့တာဖြစ်ပါတယ်။
မြန်မာ-တရုတ်နယ်စပ်ဒေသတစ်လျှောက် ငြိမ်းချမ်းရေးနဲ့ တည်ငြိမ်ရေးကို ပိုမိုမြှင့်တင်နိုင်ဖို့ တရုတ်အနေနဲ့ ဆက်လက်ပူးပေါင်းဆောင်ရွက်သွားရေး၊ ပြည်တွင်းငြိမ်းချမ်းရေးနဲ့ အမျိုးသားပြန်လည်သင့်မြတ်ရေး လုပ်ငန်းစဉ် နဲ့ သက်ဆိုင်တာတွေ ဆွေးနွေးခဲ့တယ်လို့ စစ်ကောင်စီက ထုတ်ပြန်ထားပါတယ်။
အလားတူပဲ နယ်စပ်ဒေသမှာ ရှိနေတဲ့ အွန်လိုင်းလောင်းကစား ၊ အွန်လိုင်းငွေလိမ်ဂိုဏ်းတွေကို ပူးပေါင်းတိုက်ဖျက်ရေးကိစ္စတွေကို ဆွေးနွေးခဲ့တယ်လို့ စစ်ကောင်စီက ဆိုပါတယ်။
စစ်ကောင်စီဘက်ကတော့ ရုရှားခရီးစဉ်က အောင်မြင်တဲ့ ခရီးစဉ်ဖြစ်ပြီး ထားဝယ်ရေနက်စီမံကိန်းမှာ ရုရှားတွေ ရင်းနှီးမြှုပ်နှံမယ့်အပြင် နူကလီးယားဓာတ်ပေါင်းဖို တည်ဆောက်ရေး၊ စိုက်ပျိုးရေး၊ လူ့စွမ်းအားအရင်းအမြစ်၊ အာကာသနဲ့ဂြိုလ်တုနည်းပညာ အပါအဝင် နယ်ပယ်အားလုံးမှာ ပူးပေါင်းဆောင်ရွက်မယ်လို့ သတင်းထုတ်ပြန်ထားပါတယ်။
