ငဖဲမြို့နယ်အတွင်းရှိ နတ်ရေကန်စခန်းကို ထိုးစစ်ဆင်တိုက်ခိုက်နေပြီး စစ်ကောင်စီခုခံနေရ

ငဖဲမြို့နယ်အတွင်းရှိ နတ်ရေကန်စခန်းကို ထိုးစစ်ဆင်တိုက်ခိုက်နေပြီး စစ်ကောင်စီခုခံနေရ
ဧရာဝတီတိုင်းမ်
မတ် ၄ရက်
မကွေးတိုင်း၊ ငဖဲမြို့နယ်အတွင်းရှိ စစ်ကောင်စီ၏ နတ်ရေကန်လေကြောင်းရန်ကာကွယ်ရေးတပ်ကို အာရက္ခတပ်တော် AAနှင့် ပူးပေါင်းတပ်ဖွဲ့က ထိုးစစ်ဆင်တိုက်ခိုက်လျက်ရှိကြောင်း သိရသည်။
ပြီးခဲ့သည့် ဖေဖော်ဝါရီ ၂၇ရက်နေ့ကစတင်ပြီး AAနှင့်ပူးပေါင်းတပ်များက အပြင်းအထန်ထိုးစစ်စတင်ခဲ့ပြီး စစ်ကောင်စီတပ်ဖွဲ့များက ဒရုန်းများ၊ လက်နက်ကြီးများပစ်ခတ်ခုခံနေကြောင်း သိရသည်။
နတ်ရေကန်နှင့် စွန်တက်ကြားကို စစ်ကောင်စီတပ်များက လက်ရှိအထိထိန်းချုပ်ထားပြီး နတ်ရေကန်စခန်းကို စုပုံရိက္ခာစခန်းအဖြစ်သုံးနေကာ ရိက္ခာနှင့် ခဲယမ်းများ ထုတ်ပေးနေကြောင်း သိရသည်။
“လက်ရှိအထိ နတ်ရေကန်နဲ့ စွန်တက်ကြား စစ်တပ်လှုပ်ရှားမှုရှိတယ်။စစ်ရေးက နေ့ချင်း ညချင်းဆိုသလိုအပြောင်းအလဲရှိတယ်။ စစ်တပ်ဘက်က တိုက်ခိုက်စွမ်းရည်လည်းမရှိဘူး။ တိုက်ခိုက်လိုစိတ်လည်းမရှိတဲ့သူတွေနဲ့ဆိုတော့ ဒရုန်းတွေသာမပါရင် ကြာကြာခုခံဖို့မလွယ်ပါဘူး” ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
နတ်ရေကန်နှင့် ပျဉ်းဝစစ်ဆေးရေးဂိတ်ကြားရှိ စစ်ကောင်စီ ကာကင်းအဖွဲ့ငယ်များကို နတ်ရေကန်မှတဆင့် ရိက္ခာနှင့် ခဲယမ်း ထုတ်ပေးနေကြောင်း သိရသည်။
တိုက်ပွဲဖြစ်ပွားနေသည့် နတ်ရေကန်စခန်းနှင့် ပျဉ်းဝစစ်ဆေးဂိတ်မှာ ၁၁မိုင်သာကွာဝေးပြီး စစ်ကောင်စီ၏ အမြောက်စစ်ဆင်ရေးဌာနချုပ် မစခ ၉၀၂နှင့် စစ်ဆေးရေးဂိတ်မှာ သုံးမိုင်သာကွာဝေးကြောင်း သိရသည်။
ပြီးခဲ့သည့် ဖေဖော်ဝါရီ ၁၆ ရက်က ငဖဲမြို့နယ်အတွင်းရှိ မထုံး၊ အထက်တုံးကြီး၊ အောက်တုံးကြီးစခန်းတို့ကို AA က သိမ်းယူခဲ့ပြီး နတ်ရေကန်စခန်းအထိ ထိုးစစ်ဆင်လာခြင်းဖြစ်သည်။
နတ်ရေကန်စခန်းမှ စစ်ကောင်စီတပ်များမှာ AA ပိတ်ဆို့ထားစဉ်ကတည်းက လက်နက်ကြီးများသယ်ကာ အဖွဲ့လိုက်ထွက်ပြေးမှုများရှိခဲ့ပြီး ကြားဖြတ်တိုက်ခိုက်ခံရမှုများလည်းရှိကြောင်း သိရသည်။
ပြီးခဲ့သည့် ဖေဖော်ဝါရီ ၂၄ ရက်မှ ဖေဖော်ဝါရီ ၂၆ ရက်အတွင်း နတ်ရေကန်အနီး CDF- Asho က နယ်မြေရှင်းလင်းရာတွင် ကစဉ့်ကလျားထွက်ပြေးနေသည့် စစ်ကောင်စီတပ်ဖွဲ့ဝင် ၂၃ ဦး ကို လက်နက်များနှင့်အတူ ဖမ်းဆီးရမိခဲ့ကြောင်း ထုတ်ပြန်ထားသည်။
#ငဖဲ #နတ်ရေကန် #စစ်ကောင်စီ #ထိုးစစ်ဆင်ခံရ #ကာကွယ်ရေးအဖွဲ့ငယ် #ခုခံ #Ayeyarwaddy_Times