ပန်းတောင်းမြို့နယ်၊ ညောင်ကျိုးကျေးရွာတွင်ဖြစ်ပွားသည့် AA နှင့် တိုက်ပွဲတွင် မဘသအစွန်းရောက်မိသားစုမှ စစ်တပ် ဒုတပ်ရင်းမှူး ဗိုလ်မှူး သန့်ဇော်ဟိန်း သေဆုံး
ရန်ကုန်၊ မတ် ၂
ပဲခူးတိုင်း၊ ပန်းတောင်းမြို့နယ် ညောင်ကျိုး တိုက်ပွဲတွင် AA နှင့် တိုက်ခိုက်ရင်း မဘသအစွန်းရောက်မိသားစုအသိုင်းအ၀ိုင်းမှ ဒုတပ်ရင်းမှူး ဗိုလ်မှူး သန့်ဇော်ဟိန်း သေဆုံးသွားကြောင်း မိခင်ဖြစ်သူ A 1 သင်္ကန်းတိုက်ပိုင်ရှင် ဒေါ်ခင်ညိုညို က လူမှုကွန်ရက်မှတစ်ဆင့် ကြေညာထားသည်။
ဖေဖော်ဝါရီလ ၂၂ ရက်နေ့ ပဲခူးတိုင်း ၊ ပန်းတောင်းမြို့နယ် ညောင်ကျိုးရွာတိုက်ပွဲတွင် အကြမ်းဖက်စစ်တပ်ဘက်မှ ဒုတပ်ရင်းမှူး သန့်ဇော်ဟိန်း အပါအဝင် အကြမ်းဖက်စစ်သားအများအပြား သေဆုံးကြောင်း CDM ဗိုလ်ကြီး ဇင်ယော်က ရန်ကုန်ခေတ်သစ်သတင်းဌာနသို့ ပြောကြားသည်။
ဒုတပ်ရင်းမှူး သန့်ဇော်ဟိန်း သည် ကသာ ဇာတိဖြစ်ပြီး မိဘများမှာ လက်ရှိ နေပြည်တော်၊ ပုဗ္ဗသီရိမြို့နယ်တွင် နေထိုင်ကာ A-1 သင်္ကန်းတိုက် ဖွင့်လှစ် လုပ်ကိုင်နေကြကြောင်း၊ အကြမ်းဖက်စစ်တပ်ကို အပြည့်အဝ ထောက်ခံသူများဖြစ်ကာ ကသာမြို့တွင် စစ်အာဏာသိမ်းပြီးကာစ တပ်ထောက်ခံပွဲများ လုပ်ဆောင်ချိန်တွင် ဗိုလ်မှူး သန့်ဇော်ဟိန်း ၏မိခင်ဖြစ်သူက လူတစ်ဦးလျှင် ကျပ် နှစ်သောင်းပေး၍ တပ်ထောက်ခံပေးပွဲ တက်ပေးရန် စည်းရုံးခဲ့သူဖြစ်ကြောင်း၊ မဘသနှင့် အမျိုးသားရေးအစွန်းရောက် အမာခံများဖြစ်ကြောင်း သိရှိရသည်။
“ဒုတပ်ရင်းမှူးအဆင့်နဲ့ ညောင်ကျိုးတိုက်ပွဲမှာ ကျတာ။ သူ့မိဘတွေက အစိမ်းတွေ။ သူ့အမေက ကသာဇာတိ။ ၂၀၂၃ လောက်မှ နေပြည်တော်ကို တိမ်းရှောင်တာ။ အရင်တုန်းက တပ်ထောက်ခံပွဲတွေကို ကသာမှာ ကမက ထ လုပ်ခဲ့တဲ့ တကယ့် ဘောမ အစစ်” ဟု CDM ဗိုလ်ကြီး ဇင်ယော်က ရန်ကုန်ခေတ်သစ်သတင်းဌာနသို့ ပြောဆိုသည်။
ဗိုလ်မှူးသန့်ဇော်ဟိန်း သေဆုံးမှုကို မဘသအစွန်းရောက် ဘုန်းကြီးများနှင့် အမျိုးသားရေးအစွန်းရောက် နောင်တောင်လေး၏ Myanmar National Post တို့က ဝမ်းနည်းကြေကွဲရသော ကဗျာများ ပေးပို့ခဲ့ကြပြီး ယင်းကဗျာများကို မိခင်ဒေါ်ခင်ညိုညိုက လူမှုကွန်ရက်တွင် တင်ထားသည်။
A 1 သင်္ကန်းတိုက်ပိုင်ရှင် မိခင် ဒေါ်ခင်ညိုညိုက ညောင်ကျိုးတိုက်ပွဲတွင် သေဆုံးသွားသည့် ဗိုလ်မှူး သန့်ဇော်ဟိန်း၏ အလောင်းကို နေပြည်တော်အထိ သယ်ယူ၍ မီးသင်္ဂြိုဟ်ခဲ့ကြောင်း သိရှိရသည်။
ဗိုလ်မှူးသန့်ဇော်ဟိန်းသည် သေဆုံးချိန်တွင် အသက် ၃၆ နှစ်ရှိနေပြီဖြစ်ပြီး စစ်တက္ကသိုလ် အပတ်စဉ် ၅၀ ကျောင်းဆင်းဖြစ်ကာ သားသမီး ၃ ဦး ကျန်ရစ်ခဲ့သည်။