သရက်ချောင်းတွင် ထိုးစစ်ဆင်လာသော စစ်ကြောင်းနှင့် စစ်တပ် ဂိတ်စခန်းများကို ဒရုန်းဖြင့် ဗုံး ၁၀၀ ကျော် ကျဲချ တိုက်ခိုက် (ရုပ်/သံ)

သရက်ချောင်းတွင် ထိုးစစ်ဆင်လာသော စစ်ကြောင်းနှင့် စစ်တပ် ဂိတ်စခန်းများကို ဒရုန်းဖြင့် ဗုံး ၁၀၀ ကျော် ကျဲချ တိုက်ခိုက် (ရုပ်/သံ)
ရန်ကုန်၊ မတ် ၁

တနင်္သာရီတိုင်း၊ သရက်ချောင်းမြို့နယ်တွင် စစ်ကြောင်းထိုးနေသည့် အကြမ်းဖက် စစ်တပ်နှင့် ဂိတ်စခန်းများကို ဒရုန်းဖြင့် ဗုံးအလုံး ၁၀၀ ကျော် ကျဲချ တိုက်ခိုက်ခဲ့ကြောင်း DRAGON SQUAD-TNI မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၉ ရက်နေ့မှ ၂၄ ရက်နေ့ထိ သရက်ချောင်းမြို့နယ် အတွင်းရှိ ပန်းပြင်၊ ပိန်းတော၊ မဲနယ်အိုး၊ ရွေဂူ၊ ရန်တောင်၊ ဥတ္တူ၊ သရက်နှစ်ခွ ကျေးရွာများကို စစ်ကြောင်းထိုးလာသော အကြမ်းဖက် စစ်ကောင်စီ တပ်သားများကို မဟာမိတ်ပူးပေါင်း ဒရုန်းတပ်ဖွဲ့များနှင့် ထားဝယ်ခရိုင်တပ်ပေါင်းစုက တိုက်ခိုက်ခဲ့ကြောင်း သိရသည်။
ဖေဖော်ဝါရီလ ၁၅ ရက်နေ့ ပန်းပြင်ကျေးရွာကို ဝင်ရောက်လာသော စစ်တပ် စစ်ကြောင်းကို ဒရုန်းဖြင့် တိုက်ခိုက်ခဲ့ကြောင်း၊ ဖေဖော်ဝါရီလ ၁၆ ရက်နှင့် ၁၇ ရက်နေ့တို့တွင် ပိန်းတောကျေးရွာတွင် ထပ်မံ တိုက်ပွဲဖြစ်ပွားခဲ့ကြောင်း၊ ဖေဖော်ဝါရီလ ၁၉ ရက်နေ့မှ ၂၄ ရက်နေ့ထိ အမှတ် ၈ လမ်းမပေါ်ရှိ ဆက်ကြေးကောက်ခံနေသော အကြမ်းဖက် စစ်တပ်၏ သရက်နှစ်ခွဂိတ် နှင့် ရွေဂူဂိတ် အပါအဝင် စစ်တပ် စစ်ကြောင်းတစ်ကြောင်းလုံးကို တိုက်ခိုက်နိုင်ခဲ့ကြောင်း သိရှိရသည်။
ထို တိုက်ခိုက်မှုများ အတွင်း အကြမ်းဖက် စစ်တပ် ဘက်မှ ဗိုလ်မှူး၊ အရာရှိ အပါအဝင် စစ်ကောင်စီ တပ်သား ၃၀ ကျော် သေ ဆုံး ခဲ့ပြီး ထိခိုက်ဒဏ်ရာ အများအပြားရရှိခဲ့ပြီး ဒရုန်းဖြင့် ဗုံးကျဲ တိုက်ခိုက်မှု ၅၂ ကြိမ် ပြုလုပ်ခဲ့ကာ စုစုပေါင်း ဗုံးအလုံးရေ ၁၀၀ ကျော်ကျဲချ တိုက်ခိုက်နိုင်ခဲ့ကြောင်း သိရသည်။
အဆိုပါ တိုက်ခိုက်မှုကို တိုင်းစစ်ဌာန၏ လက်ရုံး ဒရုန်းတပ်ဖွဲ့ဖြစ်သည့် Dragon Squad မှ ဦးဆောင်မှူဖြင့် မဟာမိတ် ပူးပေါင်း ဒရုန်းတပ်ဖွဲ့များဖြစ်သော ဒေါင်းညီနောင် ဒရုန်းတပ်ဖွဲ့ ၊ T5 wings ၊ DEF Drone Force ၊ DGRF Drone Force တို့က ပူးပေါင်း လုပ်ဆောင်ခဲ့ကြောင်း သိရှိရဿည်။