တမူးမြို့အနီး တိုက်ပွဲပြင်းထန်နေ
ရဲခေါင်/People’s Spring
စစ်ကိုင်းတိုင်း၊ တမူးမြို့အနီး တိုက်ပွဲပြင်းထန်နေပြီး စစ်ကောင်စီက လေကြောင်းပစ်ကူပေးပြီး ခုခံနေကြောင်း ဒေသတွင်းသတင်းရင်းမြစ်များက ပြောသည်။
ဇန်နဝါရီ ၂၇ ရက်ကစ၍ ဇန်နဝါရီ ၂၉ ရက်အထိ တမူးမြို့နယ် ကျွန်းပင်သာနှင့် မင်းသာကျေးရွာတို့ရှိ စစ်ကောင်စီအထိုင်စခန်းများကို တော်လှန်ရေးတပ်ဖွဲ့များက တိုက်ခိုက်နေခြင်းဟု ဆိုသည်။
“တိုက်ပွဲက တမူးမြို့အထက်ပိုင်း ကျွန်းပင်သာနဲ့ မင်းသာရွာမှာ ဖြစ်နေတာ။မနေ့က ရှမ်းနီတပ်မတော်SNAက အရာရှိတစ်ယောက် အပါအဝင် စကစ ပူးပေါင်းတပ်ဖွဲ့တွေ သေဆုံးတာတွေရှိတယ်။နှစ်ဖက်ထိခိုက်မှု များတယ်လို့ကြားတယ်”ဟု တမူးခရိုင် စစ်ရေးနှင့်ဆက်စပ်သူတစ်ဦးက လူထုနွေဦးသို့ ပြောသည်။
ကျွန်းပင်သာနှင့် မင်းသာကျေးရွာတွင် စစ်ကောင်စီတပ်၊ ကသဲ၊ SNA နှင့် နာဂပြည်သူစစ် စုစုပေါင်း အင်အား ၆၀၀ခန့်ဖြင့် တပ်စွဲထားကြောင်းလည်း သိရသည်။
ကျွန်းပင်သာကျေးရွာရှိ စစ်ကောင်စီစခန်းများကို သိမ်းပိုက်နိုင်ပြီဟု သတင်းထွက်ပေါ်နေသော်လည်း လူထုနွေဦးအနေဖြင့် အတည်ပြုနိုင်ခြင်းမရှိသေးဘဲ ဒေသတွင်းတော်လှန်ရေးတပ်ဖွဲ့များထံ ဆက်သွယ်မေးမြန်းနေဆဲ ဖြစ်သည်။
“မနေ့ညက မင်းသာတိုက်ပွဲကို ဂျက်ဖိုက်တာနဲ့လာပစ်တာ အချင်းချင်းမှားပစ်လို့ ခွေးတွေသေတာများတယ်လို့ သိရ”ဟု Tamu Indepth News က ရေးသားထားသည်။
စစ်ကောင်စီနှင့် ပူးပေါင်တပ်ဖွဲ့များ၏ စစ်စခန်းများကို စစ်ကိုင်းတိုင်းပြည်သူ့ကာကွယ်ရေး တပ်ဖွဲ့၏ ဒေသအခြေစိုက် ခရိုင်ပူးပေါင်းတပ်များနှင့် ကူကီးအမျိုး သားတပ်မတော် KNA(B) တို့က ထိုးစစ်ဆင်တိုက်ခိုက်နေခြင်းဖြစ်သည်။
တော်လှန်ရေးပူးပေါင်းတပ်များသည် တမူးမြို့သိမ်းတိုက်ပွဲဆင်နွှဲနိုင်ရန် တမူးမြို့နယ်ရှိ ကျွန်းပင်သာ နှင့် မင်းသာကျေးရွာရှိ စစ်ကောင်စီစခန်းများ သိမ်းပိုက်ခြင်းအပါအဝင် ပန်းသာအ ခြေစိုက်စစ်ကောင်စီစခန်းနှင့် ဟဲဇင်းအခြေစိုက် တပ်စခန်းများသိမ်းနိုင်ရန် လိုအပ်မည်ဟု ဒေသတွင်း သတင်းရင်းမြစ် ခိုနူမ်းသုန်က ဖော်ပြထားသည်။
စစ်ကိုင်းတိုင်းအနောက်ဘက်ခြမ်းရှိ အိန္ဒိယနိုင်ငံနှင့်ထိစပ်နေသည့် တမူးခရိုင်တွင် တမူး၊မြို့သစ်၊ခါမ်းပါတ်မြို့များပါဝင်ကာ မြို့သစ်နှင့် ခါမ်းပါတ် မြို့များအား တော်လှန်ရေးတပ်ဖွဲ့များက သိမ်းပိုက်ထားပြီးဖြစ်သည်။
တမူးမြို့နယ်ပြည်သူ့ကာကွယ်ရေးတပ်ဖွဲ့မှ ရဲဘော်များအား တွေ့ရစဉ်။(ဓာတ်ပုံ – တမူး PDF)
