KIAထိန်းချုပ်နယ်မြေအတွင်း TNLAတပ် အင်အားအလုံးအရင်းဖြင့် ဝင်ရောက်လာသောကြောင့် နှစ်ဖက် အချင်းများ။ KIAတပ်ဖွဲ့တစ်ဦးကို TNLAတပ်ဖွဲ့ဝင်များမှ သေနတ်ဒင်းဖြင့်ထုလိုက်သောကြောင့် ဒဏ်ရာရ။

KIAထိန်းချုပ်နယ်မြေအတွင်း TNLAတပ် အင်အားအလုံးအရင်းဖြင့် ဝင်ရောက်လာသောကြောင့် နှစ်ဖက် အချင်းများ။
KIAတပ်ဖွဲ့တစ်ဦးကို TNLAတပ်ဖွဲ့ဝင်များမှ သေနတ်ဒင်းဖြင့်ထုလိုက်သောကြောင့် ဒဏ်ရာရ။
နမ့်ဖက်ကာ- ၂၆ ဇန်နဝါရီ ၂၀၂၅။

KIOအစိုးရ ထိန်းချုပ်ထားပြီး မြို့ပြ စီမံရေးဖော်ဆောင်နေလျက်ရှိသော နမ့်ဖက်ကာသို့ TNLAတပ်များ အင်အား အလုံးအရင်းဖြင့် တိုးဝင်လာသောကြောင့် KIAနှင့် ဒေသကာကွယ်ရေးတပ်ဖွဲ့ဝင်များ တားဆီးထားကာ နှစ်ဖက် အချင်းများနေလျက်ရှိကြောင်းနှင့် KIAတပ်ဖွဲ့တစ်ဦးက TNLAတပ်များမှ သေနတ်ဒင်းဖြင့် ထုလိုက်သောကြောင့် ဒဏ်ရာရရှိခဲ့ကြောင်း သိရသည်။
ယနေ့ ဇန်နဝါရီလ (၂၆)ရက်နေ့ မွန်းလွဲ (၁)နာရီခွဲခန့်မှစ၍ နမ့်ဖက်ကာသို့ TNLAတပ်များမှ အင်အားအလုံးအရင်းဖြင့် ဝင်ရောက်လာသော အခြေအနေဖြစ်ပြီး KIAနှင့် ဒေသကာကွယ်ရေးတပ်ဖွဲ့ဝင်များမှ တားဆီးထားရသည့်အပြင် TNLAတပ်များ အတင်းအဓမ္မ ဝင်ရောက်လာရန် ကြိုးစားသောကြောင့် နှစ်ဖက် အခြေအနေ တင်းမာမှုများရှိနေကြောင်း KIA သတင်းရင်းမြစ်တစ်ဦးက 7 Stars Newsကို ပြောသည်။
“ဒီမနက်ပိုင်းကနေပြီးတော့ ကွတ်ခိုင်ကနေ သူတို့ အင်အား ၁၀၀ကျော်လောက် တက်လာခဲ့တယ်၊ ခုနက နမ့်ဖက်ကာအဝင်မှာ ကျွန်တော်တို့ဘက်က စကားအကောင်းပြောနေတဲ့ကြားကနေ အင်အားသုံးပြီး အတင်းတိုးဝင်လာတဲ့အတွက်ကြောင့် စကားများလာရတဲ့အခြေအနေဖြစ်ခဲ့တယ်၊ အခုတော့ ကျွန်တော်တို့ဘက်ကနေပြီးတော့ သူတို့ကို ဆုတ်ထားခိုင်းနေပါတယ်၊ ကျွန်တော်တို့ တစ်ဖက်မှာ စစ်မျက်နှာဖွင့်နေရတဲ့အချိန်မှာ အခုလို ခြေကန့်လန့်လိုက်ထိုးနေတာကတော့ ဖြစ်လဲမဖြစ်သင့်ဘူး။”ဟု အဆိုပါ သတင်းရင်းမြစ်က ပြောသည်။
ထို့အပြင် နမ့်အွမ်ကျေးရွာတွင်လည်း TNLAတပ်များ ဝင်ရောက်လာခဲ့သောကြောင့် တားဆီးရာတွင် TNLAတပ်များမှ သေနတ်ဒင်းဖြင့်ထုလိုက်တော့သောကြောင့် KIAတပ်ဖွဲ့ဝင်တစ်ဦး ဒဏ်ရာရရှိခဲ့ကြောင်း သိရသည်။
ပြီးခဲ့သည့်ရက်မှစ၍ KIA တောင်ပိုင်းတိုင်း စစ်ဌာနချုပ် တပ်မဟာ (၆) အနီးရှိ ရွှေပြည်သစ်(Ja Mungdan)နေရာတွင် TNLAတပ်များ အတင်းဝင်ရောက်လာစဉ် KIAနှင့် ဒေသကာကွယ်ရေးတပ်GMHတို့မှ တားဆီးရာမှစ၍ နှစ်ဖက် အချင်းများမှုများ ဖြစ်ပွားခဲ့ပြီး ယခုအခါတွင် TNLAတပ်များမှ အင်အားအလုံးအရင်းစုကာ KIAထိန်းချုပ်နယ်မြေအတွင်းသို့ ကြိုးစားလာခဲ့ခြင်းဖြစ်သည်။
ကချင်လွတ်လပ်ရေးတပ်မတော် KIAနှင့် တော်လှန်ရေးပူးပေါင်းတပ်များသည် ယခုအချိန်တွင် ကချင်ပြည်နယ်၊ ဗန်းမော်မြို့သိမ်းတိုက်ပွဲကြီးကို ဖော်ဆောင်နေကြရချိန်ဖြစ်ပြီး ထိုအချိန်နှင့် ကိုက်ညီစွာ TNLAတပ်များမှ KIAထိန်းချုပ်နယ်မြေအတွင်းသို့ အတင်းအဓမ္မ ဝင်ရောက်ရန် ကြိုးစားလာကြခြင်းခြစ်သည်။