ရွှေသောင်ယံ၊ ဘောမိရွာ တိုက်ပွဲတွင် ဒဏ်ရာရရှိခဲ့သော စစ်သား ၆၀ ခန့်ကို လျှပ်စစ်မီးဖြတ်၍ ပုသိမ် နတခ နှင့် မဆရ ၄ သို့ ပို့ဆောင် ၊ သာပေါင်းတွင် စစ်သား ၁၇ ဦး ထွက်ပြေးသွား
ရန်ကုန်၊ ဇန်နဝါရီ ၂၀
ဧရာဝတီတိုင်း၊ ပုသိမ်မြို့နယ်၊ ရွှေသောင်ယံမြို့ ၊ ဘောမိရွာ တိုက်ပွဲတွင် ဒဏ်ရာရရှိခဲ့သော အကြမ်းဖက် စစ်သား ၆၀ ခန့်ကို လျှပ်စစ်မီးဖြတ်တောက်၍ ပုသိမ် နတခ နှင့် မဆရ ၄ သို့ ပို့ဆောင်ခဲ့ကြောင်း ပုသိမ် သတင်းအထူးတပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဇန်နဝါရီလ ၁၈ ရက်နေ့ ညပိုင်း ရွှေသောင်ယံမြို့၊ ဘောမိရွာ တိုက်ပွဲအတွင်း ဒဏ်ရာရရှိခဲ့သော အကြမ်းဖက် စစ်သား ၆၀ ခန့်ကို စစ်ကောင်စီ တပ်သားများက စက်လှေများဖြင့် ချောင်းသာသို့ ပို့ဆောင်ပြီးနောက် လူနာတင်ကားများ၊ ကုန်ကားများဖြင့် ပုသိမ်မြို့ရှိ အနောက်တောင်တိုင်းစစ်ဌာနချုပ် (နတခ) နှင့် အမှတ် ၄ စစ်မြေပြင် ဆေးတပ်ရင်းသို့ ပို့ဆောင်လိုက်ကြောင်း သိရသည်။
အဆိုပါ ဒဏ်ရာရ စစ်သားများကို ပို့ဆောင်ရာ လမ်းတစ်လျှောက်၌လည်း အကြမ်းဖက် စစ်တပ်က လျှပ်စစ်မီးများ ဖြတ်တောက်ခဲ့ပြီး ထိခိုက် ဒဏ်ရာရ စစ်သား အများစုသည် တပ်သားသစ်များ ဖြစ်ကြောင်း သိရှိရသည်။
ထို့ပြင် အကြမ်းဖက် စစ်တပ်သည် ရွှေသောင်ယံမြို့ တိုက်ပွဲများအတွင်း ရှေ့တန်း စစ်မြေပြင်ကို လူအင်အား၊ ရိက္ခာနှင့် လက် နက်များ ပို့ဆောင်ရာတွင်လည်း ပြည်သူပိုင် ကုန်ကားများကို ချောဆွဲ၍ ပို့ဆောင်နေ၍ ယာဉ်မောင်းများ အသက်အန္တရယ် စိုးရိမ်နေရကြောင်း သိရသည်။
ထို့ပြင် ဧရာဝတီတိုင်း၊ သာပေါင်းမြို့နယ်တွင်လည်း စစ်ကောင်စီ တပ်သား ၁၇ ဦး ထွက်ပြေးသွား၍ စစ်တပ်က ပိတ်ဆို့ရှာဖွေမှုများ လုပ်ဆောင်နေကြောင်း ပုသိမ် သတင်းအထူးတပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြော ဆိုသည်။
ဇန်နဝါရီလ ၁၆ ရက်နေ့ ညပိုင်းတွင် သာပေါင်းမြို့နယ်ရှိ အကြမ်းဖက် စစ်တပ် ခံစစ်ပြင်ဆင်ထားသော သစ်ဖြူရွာ ၊ ကျားခေါင်းရွာနှင့် သဲဖြူရွာဘက်မှ စစ်ကောင်စီ တပ်သား ၁၇ ဦးသည် ထွက်ပြေး သွားခြင်းဖြစ်ကြောင်း၊ ဇန်နဝါရီလ ၁၇ ရက်နေ့ နံနက်ပိုင်းတွင် အကြမ်းဖက် စစ်တပ်က စစ်ဆေးရေး ဂိတ်များကို ပိတ်ဆို့ရှာဖွေစဉ် ၇ ဦးကို ပြန်လည် ဖမ်းဆီးရရှိခဲ့ပြီး ကျန် ၁၀ ဦးသည် ပျောက်ဆုံးနေဆဲဖြစ်ကြောင်း သိရသည်။
အဆိုပါ ပြန်ဖမ်းမိသွားသော စစ်ကောင်စီ တပ်သား ၇ ဦးကို ဗိုလ်မှူး သန်းနိုင်က စစ်ဆေးမှုများ ပြုလုပ်ပြီး ပြန်လည်ခေါ်ဆောင်သွားကြောင်း၊ သာပေါင်း-ပုသိမ် အဝင် ကြိုးတံတားဂိတ်ကိုလည်း အကြမ်းဖက် စစ်ကောင်စီ တပ်သားများက တင်းကြပ်စွာ စစ်ဆေးမှုလုပ်ဆောင်နေကြောင်း သိရှိရသည်။
ဓာတ်ပုံ – ၁၀၂၇ စစ်ဆင်ရေးအတွင်း ဖမ်းဆီးရမိသော ဒဏ်ရာရ စစ်သုံ့ပန်းများကို MNDAA က ပြန်လွှတ်ပေးစဉ်။ (ပုံအဟောင်းဖြစ်သည်)
