ဧရာဝတီတိုင်းအတွင်းရှိ ဘောမိကျေးရွာကို AA ထိန်းချုပ်ထားပြီး စစ်ကောင်စီတပ်များ ရွှေသောင်ယံ အထိ တပ်ဆုတ်ပြေး
ဧရာဝတီတိုင်းမ်
ဇန်နဝါရီ ၁၈ရက်
ဧရာဝတီတိုင်းအတွင်းရှိ ဘောမိကျေးရွာကို အာရက္ခတပ်တော် (AA) က ထိန်းချုပ်ထားပြီး စစ်ကောင်စီ တပ်များ ရွှေသောင်ယံကမ်းခြေဘက်ထိ တပ်ဆုတ်ပြေးနေကြောင်း ဧရာ၀တီတိုင်း စစ်ရေးသတင်းရင်း မြစ်ထံက သိရသည်။
ယနေ့ ဇန်နဝါရီ ၁၈ရက်နေ့ နေ့လယ် ၂နာရီ ၃၀မိနစ်အချိန်က ဘောမိဘက်သို့ ပုသိမ်မှ လေယာဉ်များ တက်သွားပြီး ယမန်နေ့ကလည်း လေကြောင်းတိုက်ခိုက်မှုပြုလုပ်ခဲ့ကြောင်း သိရသည်။
“လေယာဉ်တွေတက်သွားတယ်။ ဘောမိကတော့စခန်းတွေ ကုန်သလောက်ရှိသွားပါပြီ” ဟု တော်လှန် ရေးတပ်ဖွဲ့များနှင့် နီးစပ်သည့် ဧရာ၀တီတိုင်းရှိ စစ်သတင်းရင်းမြစ်က ဧရာဝတီတိုင်းမ်ကို ပြောသည်။
ပြီးခဲ့သည့် ဇန်နဝါရီ ၁၆ရက်နေ့ကတည်းက ဘောမိကျေးရွာရှိ စစ်ကောင်စီတပ်များနှင့် AA တို့ တိုက်ပွဲအပြင်းအထန်ဖြစ်ပွားခဲ့ပြီး ဘောမိအထက်ပိုင်းကို AA က ထိန်းချုပ်ခဲ့ကြောင်း သိရသည်။
စစ်ကောင်စီသည့် ဘောမိရွာနှင့် မကျီးဇင်တို့ကို လေကြောင်းမှ ဗုံးအလုံးရေများစွာကြဲချတိုက်ခိုက်ခဲ့ပြီး စစ်ကောင်စီတပ်များ ရွှေသောင်ယံ မြို့နယ်ထဲအထိ တပ်ဆုတ်ပြေးကြကြောင်း သိရသည်။
ထို့နောက် ဘောမိမှ တပ်ဆုတ်ထွက်ပြေးလာသည့် စစ်ကောင်စီတပ်ဖွဲ့ဝင်များသည် ဘောမိနှင့် ရွှေသောင်ယံ ကြားရှိ သပေါ့ကန်တွင်ကမ်းကပ်၍တက်လာကြကြောင်း သိရသည်။
ပြီးခဲ့သည့် ဇန်နဝါရီ ၁၀ရက်နေ့ကမှ ဘောမိကို ဝက်သေေကျးရွာမှ တင့်ကား ၁၀စီးနှင့် စစ်ကောင်စီ တပ်ဖွဲ့ဝင်များကို အင်အားတိုးချဲ့ပို့ထားခဲ့ကြောင်း သိရသည်။
စစ်ကောင်စီတပ်များတပ်ဆုတ်ပြေးလာသည့် ရွှေသောင်ယံသည် အနောက်တောင်တိုင်းစစ်ဌာန ချုပ်တည်ရှိရာ (နတခ) ပုသိမ်နှင့် မိုင်အနည်းငယ်သာကွာဝေးတော့ပြီး စစ်ကောင်စီက ကြည်း၊ ရေ၊ လေမှ အင်အားဖြည့်လျက်ရှိကြောင်း သိရသည်။
ဓာတ်ပုံ-အင်တာနက်(ပုံဟောင်း)
ရွှေသောင်ယံမြို့ ဘောမိကျေးရွာအနီးတွင်တိုက်ပွဲဖြစ်ပွားပြီး စစ်ကောင်စီမှ ဗုံးကြဲ
ဧရာဝတီတိုင်းမ်
ဇန်နဝါရီ ၁၈ ရက်
ဧရာ၀တီတိုင်း၊ပုသိမ်မြို့နယ် ၊ ရွှေသောင်ယံမြို့ ၊ ဘောမိကျေးရွာအနီးတွင် ဇန်နဝါရီလ ၁၇ ရက်နေ့ နံနက်မှ စတင်ကာ တိုက်ပွဲများပြင်းထန်စွာ ဖြစ်ပွားခဲ့ကြောင်း သိရှိရသည်။
ဘောမိကျေးရွာအနီး ချောင်းဖျားတွင် ယမန်နေ့ နံနက်အစောပိုင်းမှ စတင်ကာ တစ်နေကုန်နီးပါး တိုက်ပွဲဖြစ်ပွားခဲ့ပြီး စစ်
ကောင်စီမှ လေကြောင်းဖြင့် ဗုံးကြဲတိုက်ခိုက်မှုများ ပြုလုပ်ခဲ့ကြောင်း သိရသည်။
“ဘောမိရွာရဲ့ ချောင်းဖျားအထက်ပိုင်းကို တစ်ညလုံးလေယာဉ်နဲ့ဗုံးတွေကြဲချနေတာ။ အိမ်တွေလဲ မီးလောင်ပြီး လူတွေနဲ့လည်းအဆက်အသွယ်ပြတ်ကုန်ပြီ မကျီးဇင်ရွာဘက်မှာတုန်းကလည်း ဗုံးကြဲလို့သေတဲ့သူအများကြီးပဲ”ဟု စစ်ဘေးရှောင်ဒေသခံတစ်ဦးမှ ဧရာ၀တီတိုင်းမ်ကိုပြောသည်။
ပြီးခဲ့သည့်ဇန်နဝါရီ ၉ ရက်နေ့က အာရက္ခတပ်တော် AA နှင့်ပူးပေါင်းတပ်များမှမကျီးဇင်ကျေးရွာရှိ စစ်ကောင်စီတပ်နှင့်ရဲစခန်းကို ဝင်ရာက်သိမ်းပိုက်ပြီးနောက် ဇန်နဝါရီ ၁၆ရက်နေ့အထိ တိုက်ပွဲများမရှိပဲ ငြိမ်သက်နေရာမှ ပြန်လည်ဖြစ်ပွားလာခြင်းဖြစ်ကြောင်း သိရသည်။
“ဟိုရက်တွေက ၀က်သေရွာဘက်နေ စစ်တပ်ကလက်နက်ကြီးတွေနဲ့ တစ်နေ့ကို သုံးလေးချက်ပစ်နေတာကလွဲလို့တစ်ဖက်က ပြန် ပစ်သံမကြားရဘူး။ ခုရက်ပိုင်းမှ ဟိုဘက်ဒီဘက်ပစ်တဲ့အသံတွေပြန်ကြားလာရတာ”ဟုသဘော့ကန်ကျေးရွာ ဒေသခံတစ်ဦးမှ ဧရာ၀တီတိုင်းမ်ကိုပြောသည်။
လက်ရှိတွင် သပေါ့ကန်ရွာ၊ သဲကုန်းရွာ၊ အုန်းချောင်းရွာနှင့် ရွှေသောင်ယံမြို့ပေါ်ရပ်ကွက်များသို့ စစ်ဘေးရှောင် အများအပြားထပ်မံရောက်ရှိနေကြောင်း သိရှိရပြီး စစ်ကောင်စီတပ်မှ ကမ်းခြေတစ်လျှောက်တွင် ကြည်းတပ်၊အမြောက်တပ်၊ စစ်သင်္ဘောများနှင့်ခံစစ်ပြင်နေကြောင်း သိရှိရသည်။
ဓာတ်ပုံ-ဘောမိကျေးရွာအနီးတွင် တိုက်ပွဲဖြစ်ပွားနေသည်ကို ဒေသခံတစ်ဦးမှ ရိုက်ကူးထားသည့်ပုံ