ရန်ကုန်တွင် လျှပ်စစ်ဓာတ်အား မလုံလောက်တော့သဖြင့် အုပ်စု ၃ ခွဲ၍ ၄ နာရီမီးပေးပြီး ၈ နာရီ မီးဖြတ်စနစ်ကို စတင်ကျင့်သုံး၊ ဓာတ်အားထုတ်လုပ်မှု တစ်ရက်လျှင် တစ်နိုင်ငံလုံး လိုအပ်ချက်၏ ၃၀ ရာခိုင်နှုန်းအောက်သို့ ကျဆင်းနိုင်
ရန်ကုန်၊ ဇန်နဝါရီ ၅
ရန်ကုန်မြို့တော်တစ်ဝန်းတွင် လျှပ်စစ်ဓာတ်အား မလုံလောက်တော့သဖြင့် မြို့နယ်များကို အုပ်စု ၃ ခွဲ၍ ၄ နာရီမီးပေးပြီး ၈ နာရီ မီးဖြတ်စနစ်ကို စတင်ကျင့်သုံးနေကြောင်း ရန်ကုန်တိုင်းလျှပ်စစ်ဓာတ်အားပေးရေးကော်ပိုရေးရှင်းက တရားဝင် သတင်းထုတ်ပြန်သည်။
ယနေ့ ဇန်နဝါရီလ ၅ ရက်နေ့မှစတင်၍ ရန်ကုန်တိုင်းအတွင်းရှိ မြို့နယ်များအားလုံးကို အုပ်စု ၂ စုခွဲ၍ လျှပ်စစ်မီးပေး၊ မီးဖြတ်တောက်လုပ်နေရာမှ ဓာတ်အားလုံလောက်စွာ မရရှိတော့သဖြင့် ၄ နာရီမီးပေး၍ ၈ နာရီ လျှပ်စစ်မီးဖြတ်တောက်သည့် စနစ်ကို စတင်ကျင့်သုံးမည်ဖြစ်ကြောင်း သက်ဆိုင်ရာ မြို့နယ် လျှပ်စစ်ရုံးများက တရားဝင်သတင်းထုတ်ပြန်ထားသည်။
“အရင် မြို့နယ်တွေမှာ A နဲ့ B အုပ်စု ၂ စုပဲ ခွဲထားတာပါ။ အခုကတော့ A ၊ B ၊ C အုပ်စု ၃ စုခွဲပြီး ၄ နာရီ မီးပေး ၈ နာရီ မီးဖြတ် စနစ်ကို ကျင့်သုံးမှာဖြစ်လို့ အုပ်စုတစ်ခုကတော့ တစ်နေ့မှာ ၈ နာရီပဲ မီးရပြီး ၁၆ နာရီ မီးပြတ်တောက်နေမှာဖြစ်ပါတယ်။ ဒီလ တစ်လလုံးတော့ အဲဒီစနစ်နဲ့သွားပါ့မယ်။ ဓာတ်ငွေ့ လိုင်းတွေ ပြန်ပြင်နေတာ ပြန်ရလာလို့ မီးရရှိမှုများလာရင်တော့ နောက်လတွေမှာ မီးပိုရလာနိုင်ပါတယ်။ ဒါပေမယ့် နွေရာသီထဲဝင်လာလို့ ရေအားလျှပ်စစ်စက်ရုံတချို့လည်း ဓာတ်အား ထုတ်လုပ်မှု ထပ်မံလျှော့ကျလာလို့ မီးပိုရလာဖို့ကတော့ ခက်ခဲနိုင်ပါတယ်” ဟု မြို့နယ် လျှပ်စစ်ရုံးမှ တာဝန်ကျ ဝန်ထမ်းတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
တစ်နိုင်ငံလုံးတွင် တစ်ရက်လျှင် လျှပ်စစ်ဓာတ်အား လိုအပ်ချက် ဓာတ်အား ၅၄၄၃ မဂ္ဂါဝပ်ရှိသော်လည်း လက်ရှိတွင် တစ်ရက်လျှင် ဓာတ် အား ၁၇၀၀ မဂ္ဂါဝပ် ဝန်းကျင် ရာခိုင်နှုန်းအားဖြင့် ၃၀ ရာခိုင်နှုန်းကျော်ဝန်းကျင်သာ ထုတ်လုပ်နိုင်ကြောင်း၊ အဓိကအားဖြင့် ရတနာကမ်းလွန်သဘာ၀ဓာတ်ငွေ့ ပိုက်လိုင်း ပြုပြင်နေခြင်းကြောင့် ဓာတ်ငွေ့သုံးလျှပ်စစ်ဓာတ်အားထုတ်စက်ရုံများ မှာ ဓာတ်အား ထုတ်လုပ်မှု အကြီးအကျယ် လျော့ကျလျက်ရှိကြောင်း၊ အခြားတစ်ဖက်တွင်လည်း ယမန်နှစ်အတွင်း ရေကြီးရေလျှံမှုကြောင့် ပျက်စီးသွားသော ရေအားလျှပ်စစ်စက်ရုံများမှာလည်း ပြန်လည် ပြင်ဆင်နိုင်သေးခြင်းမရှိကြောင်း၊ လာမည့်နွေရာသီကာလတွင်လည်း လက်ရှိ ထုတ်လုပ်နေသော ရေအားလျှပ်စစ်ထုတ်လုပ်ရေးစက်ရုံများတွင် ရေအားလျှော့နည်းလာမည်ဖြစ်၍ ရေအားလျှပ်စစ်ထုတ်လုပ်မှုမှာ ၃၀ ရာခိုင်နှုန်းအောက်သို့ ကျဆင်သွားနိုင်ကြောင်း လျှပ်စစ်ဝန်ကြီးဌာနအသိုင်းအ၀ိုင်းက ထုတ်ဖော်ပြောဆိုသည်။
ရန်ကုန်မြို့ခံများကမူ စစ်ကောင်စီက မီးပေးသည့် နာရီမှာ ၁ ရက်လျှင် ၃ နာရီဝန်းကျင်သာ ရရှိတော့ကြောင်း၊ လျှပ်စစ်မီး ပြတ်တောက်မှု အခြေအနေ အလွန်ဆိုးဝါးနေကြောင်း ပြောဆိုကြသည်။
ဓာတ်ပုံ- ရန်ကုန်မြို့ကို ယခု ဇန်နဝါရီလ ၅ ရက်နေ့မှစတင်၍ တစ်လလုံး ၄ နာရီမီးပေး၊ ၈ နာရီ မီးဖြတ်သည့် စနစ် ကျင့်သုံးမည့် အစီအစဉ်ဇယား။